DAAD tashkiloti tomonidan Germaniyada arxitektura yoʻnalishida magistratura va qisqa kurslarda taʼlim olish imkoniyati
-
10/07/2022 Qabul boshlanishi
-
Toʻliq Moliyalash turi
-
Germaniya Davlat
-
30.09.2022 Oxirgi muddat
Umumiy maʻlumotlar
Germaniyaning nufuzli DAAD tashkiloti tomonidan tashkil etilgan “Postgraduate Studies in the Field of Architecture” stipendiyasi 2023-2024-yillarda arxitektura va unga aloqador yoʻnalishlar boʻyicha magistratura va undan keyingi qisqa kurslarni Germaniyada oʻqish istagida boʻlgan talabalar uchun moʻljallangan.
Dasturda ijtimoiy va akademik jihatdan faol, ingliz yoki nemis tilini biluvchi, arxitektura yoʻnalishi boʻyicha yetarli bilimga ega nomzodlar ishtirok etishi mumkin.
Dastur davomiyligi tanlangan universitetning oʻquv muddatiga bogʻliq. Lekin odatda quyidagicha davom etadi:
- Magistratura bosqichi — 10-24 oy. Bunda darslar odatda 1-oktyabrdan boshlanadi. 1-oʻquv yili yakunida talabalarning oʻzlashtirish natijasi talab darajasiga javob bersagina kelgusi yilda ham stipendiya olish imkoniga ega boʻladi;
- Qisqa qoʻshimcha kurslar - 1 akademik yil. Bunda ham darslar 1-oktyabrdan boshlanadi. Lekin oʻqitish tili nemis tili boʻlgan kurslar ertaroq boshlanishi mumkin. Bunday kurslar hech qanday daraja yoki diplom bilan taʼminlamaydi.
Maqbullik shartlari
Dastur talablari:
- Nomzod arxitektura va unga aloqador (interyer dizayni, yodgorliklarni muhofaza qilish, shaharsozlik, landshaft arxitekturasi, landshaftni rejalashtirish) yoʻnalishda bakalavr diplomiga ega boʻlishi lozim. Bakalavr bitiruvchi kurs talabalari ham dasturga ariza topshira oladi;
- Oʻqishni bitirganligiga 6 yildan oshmagan boʻlishi shart;
- Nemis tilini kamida B1 darajada yoki ingliz tilini kamida B2 (IETLS 6.0) darajada bilishi zarur. Baʼzi universitetlarning til bilish talablari yoʻnalishga qarab farq qilishi mumkin;
- Germaniya hududida 15 oydan ortiq vaqt davomida istiqomat qilayotgan fuqarolar ushbu dasturga ariza topshira olmaydi.
Dastur talablari bilan batafsil ushbu havola orqali tanishish mumkin.
Foydali tomonlari
Dastur imkoniyatlari:
- Ishtirokchilarga € 861 miqdorda oylik stipendiya beriladi;
- Safar xarajatlari quyidagi tartibda moliyalashtiriladi. Oʻzbekiston fuqarolariga €875 gacha moliyaviy yordam berilishi mumkin;
- Sogʻliq, baxtsiz hodisa va shaxsiy ehtiyojlar bilan bogʻliq sugʻurta xarajatlari qoplanadi;
- Bir martalik oʻquv puli (study allowance) beriladi;
- Nomzod oylik ijara toʻlasa yoki oila aʼzolari hamrohlik qilsa, unga oylik qoʻshimcha mablagʻ ajratiladi;
- Ishtirokchilar onlayn/oflayn til kurslarida bepul ishtirok etishi, dasturga qabul qilingandan soʻng olingan TestDaF yoki DSH imtihonlari toʻlovi qoplab beriladi.
Eslatma: dastur oʻquv kontrakt toʻlovlarini moliyalashtirmaydi.
Dastur imkoniyatlari bilan ushbu havola orqali tanishish mumkin.
Qoʻshimcha maʻlumotlar
Saralash jarayoni. Ariza hujjatlarini DAAD portaliga yuklagandan soʻng, DAAD birinchi navbatda rasmiy tekshiruvdan oʻtadi. Ariza talablari bajarilganligi va arizaning toʻliqligi tekshiriladi. Agar arizalar talabga javob bersa,nomzoddan ish namunalarini topshirish soʻraladi.
Germaniya universitetlari professorlaridan tashkil topgan maxsus DAAD qoʻmitasi arxitektura sohasidagi stipendiyalar boʻyicha yakuniy qarorni qabul qiladi. Qaror yozma arizalar va topshirilishi kerak boʻlgan ish namunalariga asoslanadi. Batafsil ushbu havola orqali maʼlumot olish mumkin.
Saralash mezonlari:
- Akademik yutuqlari va ijodiy ishlarning sifati, badiiy estetik jihatdan mukammalligi;
- Oʻquv rejasi va motivatsion xatning sifatliligi.
Koʻp berilgan savollar va ularning javobi bilan ushbu havola orqali tanishish mumkin.
Qoʻshimcha savol va murojaatlar uchun: portal@daad.de