2024-yil Parijda oʻtkaziladigan yozgi Olimpiya oʻyinlarida volontyorlik

Fransiya, Parijda oʻtkaziladigan 2024-yil yozgi Olimpiya oʻyinlari uchun butun dunyodan volontyorlar qabul qilinmoqda. Volontyorlik dasturiga 2023-yil 3-mayga qadar onlayn ravishda ariza berilishi lozim.

Volontyorlar 18 yoshdan katta boʻlishi, fransuz va/yoki ingliz tillarida muloqot qila olishi va belgilangan vaqt davomida tadbirda ishtirok eta olishi lozim.

Qabul qilingan volontyorlar 2024-yil 2-choragidan boshlab, onlayn trening dasturlarida va keyinchalik amaliy tayyorgarliklarda ishtirok etadi.

Volontyorlar arizada bergan maʼlumotlariga qarab turli rol va lavozimlarga tayinlanadi. 

Tadbir nizomi orqali volontyorlik lavozimlari, rollari va vazifalari haqida batafsil maʼlumot olish mumkin. 

Volontyorlarga qoʻyiladigan talablar:

• 2024-yil 1-yanvar holatida 18 yoshga toʻlgan boʻlishi;
• Fransuz va/yoki ingliz tillarida muloqot qila olishi kerak; 
• Athletes Village ochilishidan kamida 10 kun va Paralimpiya oʻyinlari tugaganidan keyin ikki kun davomida volontyor sifatida ishtirok eta olishi lozim.

Dastur talablari va shartlari bilan batafsil tadbir nizomi orqali tanishib chiqish mumkin.

Dasturda ishtirok etishning imtiyozli jihatlari:

• Oʻyinlarning oʻziga xos muhitini his qilish;
• Xalqaro darajadagi tadbirda ishlash orqali jamoada ishlash va muammolarni hal qilish koʻnikmalarini rivojlantirish;
• Turli mamlakatlardan boʻlgan insonlar bilan tanishish va ular bilan birga ishlash imkoniyati;
• Shuningdek, volontyorlar butun dunyodan ishtirok etuvchi sportchilar va tomoshabinlarni birinchi boʻlib qarshi oluvchilar hisoblanadi va tadbir davomida hamrohlik qiladilar.

Volontyorlik dasturida ishtirok etish uchun onlayn roʻyxatdan oʻtish va ariza berish lozim. 

Onlayn arizada quyidagi maʼlumotlar soʻraladi:

1. Ayrim shaxsiy maʼlumotlar;
2. Nomzodning qanday koʻnikmalarga egaligi, qanday vazifalarni bajara olishi, qanday lavozimda volontyorlik qilishi boʻyicha maʼlumotlar.

Saralangan volontyorlar unga mos deb topilgan rol va lavozimga qarab intervyu qilinishi va til bilish darajasini tekshiruvchi testdan oʻtkazilishi mumkin.

• Tez-tez soʻraladigan savollar boʻlimi — FAQs.
• Natijalar 2023-yil kuzda eʼlon qilinadi.