Tavsif
Innovatsion rivojlanish agentligiga qarashli oʻquvchi-yoshlarga bagʻishlangan ilmiy-texnikaviy, tahliliy-ommabop nashr – “INNOVATOR” jurnali 30-iyun – “Yoshlar kuni” munosabati bilan onlayn tanlovlar doirasida “Raqamli texnologiya yoshlar nigohida” shiori ostida tanlov eʼlon qiladi.
Turmush tarzimizda keng foydalanadigan koʻplab ixtirolar aynan bolalar tomonidan yaratilgan. Tadqiqotlarga koʻra, har yili dunyo boʻylab 500 mingdan ortiq bolalar va oʻsmirlar tomonidan turli ixtirolar, jumladan, moslamalar, oʻyinlar, robotlar yaratilar ekan. Ushbu tanlovning asosiy maqsadi isteʼdodli yoshlarni kashf qilish va ularning ixtirolarini ommaga tanishtirishdir.
Gʻoliblar 2023-yil 1-avgust kuni soat 17:00 da “INNOVATOR” jurnalining ijtimoiy tarmoqlardagi sahifalarida eʼlon qilinadi.
Maʼlumot uchun: Ishtirokchilar oʻz turmush tarzidan kelib chiqqan holda, foydali ixtirolarni oʻylab topib, ularni qogʻozda aks ettirishi lozim. Masalan, 2021-yili shu nom ostida oʻtkazilgan tanlovda 6 yoshli Neʼmatova Muslimaxon oʻz loyihasi bilan qatnashib, gʻoliblikni qoʻlga kiritgan edi. Loyihaning nomi “Aqlli papka” boʻlib, u dars jadvali boʻyicha kitoblar roʻyxatini koʻrsatadi hamda qaysi kitob yoʻq boʻlsa, turli xil smayliklar orqali ogohlantiradi.