7-30 yosh oralig’idagi yoshlar uchun “Ranglar jilosida — ona diyor” rasmlar tanlovi

Oʻzbekiston Respublikasi Prezidentining “Madaniyat va sanʼat sohasini yanada rivojlantirishga doir qoʻshimcha chora-tadbirlar toʻgʻrisida” 02.02.2022 yildagi PQ-112-son qaroriga asosan Oʻzbekiston Badiiy akademiyasi taʼlim muassasalari oʻquvchilari oʻrtasida “Ranglar jilosida —ona diyor” rasmlar tanlovi taqdim etiladi.

Tanlov Badiiy ijodkorlar uyushmasining Qoraqalpogʻiston Respublikasi va viloyat boʻlimlari masʼulligida Toshkent shahrida har yili anʼanaviy tarzda oʻtkaziladi.

Tanlovdan asosiy maqsad yoshlar ongida mustaqillik tuhfa etgan aziz neʼmat Vatanimizdagi bugungi tinch va osuda hayot, farovonlik, oʻzlikka qaytish va uni anglash, mustaqillik xalqimiz uchun erkin, baxtli va farovon, hech kimdan kam boʻlmagan hayot kechirish imkonini bergani, yoshlarimizning barcha sohalarda oʻz isteʼdod va qobiliyatini toʻla namoyon etishi, istiqlolning qadr qimmati, uning bebaho neʼmat ekanligini his ettirish, intellektual salohiyatli yoshlarni, yosh iqtidorlarni izlab topish va ularni ragʻbatlantirishdan iborat.

Tanlov quyidagi yosh toifalari boʻyicha oʻtkaziladi:

• 7 yoshdan 13 yoshgacha boʻlgan yosh ijodkorlar;
• 14 yoshdan 17 yoshgacha boʻlgan yosh ijodkorlar;
• 18 yoshdan 30 yoshgacha boʻlgan yosh ijodkorlar.

Tanlov quyidagi bosqichlarda tashkil etiladi:

Birinchi bosqich — viloyat bosqichi: 1-avgustdan 20-avgustga qadar Badiiy ijodkorlar uyushmasining Qoraqalpogʻiston Respublikasi va viloyat boʻlimlari tomonidan tashkil etiladi. Viloyat bosqichida har bir yosh toifasida 1-, 2-, 3-oʻrinni qoʻlga kiritgan gʻoliblarga Respublika bosqichiga yoʻllanma beriladi.

Ikkinchi bosqich — respublika bosqichi: sentyabr oyida respublika Tashkiliy qoʻmitasi tomonidan oʻtkaziladi.

Tanlovning gʻolib va sovrindorlarini taqdirlash marosimi hamda tanlov gʻoliblarining ijodiy koʻrgazmasi 2024-yil sentyabr oyida Oʻzbekiston Badiiy akademiyasining Xalqaro madaniyat karvon saroyida oʻtkaziladi.

Dastur haqida batafsil ushbu havola orqali maʼlumot olish mumkin.

• Tanlovda 7 yoshdan 30 yoshgacha boʻlgan Oʻzbekiston Badiiy akademiyasi taʼlim muassasalari oʻquvchilari ishtirok etishi mumkin;
• Nomzodlar tasviriy sanʼat yoʻnalishi (rangtasvir, grafika, haykaltaroshlik) boʻyicha ijodiy ish yaratishlari lozim;
• Har bir ishtirokchi faqat 1 dona ijodiy ish taqdim etishi kerak.

Ijodiy ishlarning mazmuniga qoʻyilgan talablar:

• Ijodiy ishning mazmuni tanlov mavzusiga mos kelishi;
• Ijodiy ishning mazmuni yoshlarni vatanparvarlik, ularning qalbida vatanga sadoqat, milliy anʼana va qadriyatlarga hurmat tuygʻusini mustahkamlashi, barkamol shaxs etib tarbiyalashga yoʻnaltirilgan boʻlishi;
• Ishtirokchilarning sohadagi bilim darajasi va dunyoqarashini koʻrsatib berishi lozim.

Ijodiy ishlar quyidagi mezonlar boʻyicha baholanadi:

• Mazmundorlik, ijodiy ishning mazmuni tanlov mavzusiga mos kelishi;
• Ranglarning aniq tanlanganligi va mutanosibligi;
• Kompozitsiyaning ishlanish mahorati va uning tugallanganlik darajasi;
• Ijodiy ishlar badiiy gʻoyasining tomoshabin hamda asar oldiga qoʻyilgan vazifalarga mosligi.

• Dasturda bepul qatnashish mumkin;
• Tanlov gʻoliblari va ishtirokchilari diplom, sertifikat va esdalik sovgʻalari bilan taqdirlanadi.

Muhim: Tanlov gʻoliblari homiylar tomonidan taʼsis etilgan qoʻshimcha sovrinlar bilan ham taqdirlanishi mumkin.

Dasturda qatnashishni istagan yoshlar arizalari 2024-yil 1-avgustga qadar Badiiy ijodkorlar uyushmasining Qoraqalpogʻiston Respublikasi va viloyat boʻlimlari tomonidan qabul qilinadi.

Ariza topshirishda quyidagilar soʻraladi:

• Shaxsiy maʼlumotlar;
• Pasport yoki tugʻilganlik haqidagi guvohnoma (nusxasi ilova qilinadi);
• Oʻqish joyi;
• Tanlovga topshirilgan ijodiy ish nomi;
• Tanlov bosqichi: (maktab, tuman(shahar), viloyat, respublika);
• Yоʼnalishi.

Tanlovning respublika bosqichiga yoʻllanma olganlar quyidagi hujjatlarni taqdim etishlari kerak:

• Hududiy tanlov natijalari boʻyicha Tanlov Hakamlar hayʼati bayonnomasidan nusxa;
• Ishtirokchi shaxsini tasdiqlovchi hujjat (pasport yoki tugʻilganlik haqidagi guvohnoma) nusxasi;
• Nomzodning oxirgi 3 oy ichidagi 3x4 hajmdagi 2 dona fotosurati.

Eslatma: Tanlovning respublika bosqichi uchun ijodiy ishlar tegishli hujjatlar bilan birgalikda joriy yilning 1-sentyabriga qadar Toshkent shahri, Yakkasaroy tumani, Yusuf Xos Hojib koʻchasi, 37/A-uy Ikuo Xirayama xalqaro madaniyat karvon saroyi binosida qabul qilinadi.

Dasturga hujjat topshirishdan oldin tanlovning Nizomi va Anketasi bilan tanishib chiqish lozim.

• Dasturga hujjat topshirish uchun oxirgi muddat: 1-avgust, 2024-yil;
• Respublika bosqichi ishtirokchilari 2024-yil 25-avgustga qadar aniqlanadi;
• Yakuniy natijalar 2024-yil sentyabr oyida eʼlon qilinadi;
• Tel: (71) 252-74-73/(71) 232-06-75.