7-30 yoshdagi amaliy sanʼat yoʻnalishida ijod qiluvchilar uchun “Yosh havaskorlar” koʻrik- tanlovi

Madaniyat vazirligi, Yoshlar ishlari agentligi va boshqa qator tashkilotlar tomonidan amaliy sanʼat sohasi vakillarini qoʻllab-quvvatlash maqsadida “Yosh havaskorlar”amaliy sanʼat koʻrik- tanlovi eʼlon qilindi.

Tanlovning asosiy maqsadi quyidagilardan iborat:

• Yoshlarni badiiy axloqiy, umuminsoniy qadriyatlar ruhida tarbiyalab, ularning maʼnaviy olamini boyitish, badiiy didini shakllantirish hamda madaniy darajasini oshirish;
• Mahallalarda yoshlarning oʻz qobiliyatini namoyon etishi uchun zarur sharoit va imkoniyatlar yaratish;
• Intellektual salohiyatli yoshlarni, yosh iqtidorlarni izlab topish va ularni ragʻbatlantirish, qoʻllab-quvvatlash.

Tanlov quyidagi yosh toifalari boʻyicha oʻtkaziladi:

• 7 yoshdan 13 yoshgacha boʻlgan yosh ijodkorlar;
• 14 yoshdan 17 yoshgacha boʻlgan yosh ijodkorlar;
• 18 yoshdan 30 yoshgacha boʻlgan yosh ijodkorlar.

Yosh toifasi boʻyicha har bir bosqichning 1,-2,-3-oʻrin sohiblari keyingi bosqichga yoʻllanmani qoʻlga kiritadi.

• Tanlovda 7 yoshdan 30 yoshgacha boʻlgan yoshlar amaliy sanʼat yoʻnalishlari (naqqoshlik, ganchkorlik, yogʻoch oʻymakorligi, kandakorlik, zargarlik, kashtachilik, zardoʻzlik, gilamdoʻzlik, xattotlik va h.k.) boʻyicha yaratilgan ijodiy ishlari bilan ishtirok etishlari mumkin;
• Tanlov Qoraqalpogʻiston Respublikasi, viloyat markazlari, tuman (shahar) va mahallalarda hamda Toshkent shahrida oʻtkaziladi.

Tanlov shartlari va baholash mezonlari

Ijodiy ishlar (tanlov ishtirokchilarining ishlari) Hakamlar hayʼati tomonidan quyidagi asosiy mezonlar boʻyicha baholanadi:

• Ijodiy ishlarda boy ijodiy fantaziya orqali birlashtirilgan shakllarning maqsadga muvofiqligi;
• Ranglarning uygʻunligi va oʻziga xos kompozitsiyalarda yaratilganligi, bejirim shakldan, material fakturasidan mohirlik bilan foydalanib yorqin ifodalikka erishilganligi;
• Badiiy bezak elementlari maʼlum qonun-qoidalarga amal qilgan holda joylashtirilganligi;
• Ijodiy ish yaxlit kompozitsiyani hosil qilishi va uning tugallanganlik darajasi;
• Bajarilish texnikasi, bezak ijrolarining barqarorligi, oddiyligi va shakllarining qatʼiyligi bilan ajralib turishi;
• Ishtirokchilar maʼlum bilim va malakaga ega boʻlishlari;
• Ijodiy ishlar badiiy gʻoyasining tomoshabin hamda asar oldiga qoʻyilgan vazifalarga mosligi.

Tanlov shartlari bilan batafsil ushbu havola orqali tanishish mumkin.

• Tanlovning yosh toifalari boʻyicha gʻoliblari va ishtirokchilari tashkilotchilar tomonidan taʼsis etiladigan maxsus diplom, sertifikat va esdalik sovgʻalari bilan taqdirlanadi.
• Tanlov gʻoliblari va sovrindorlari homiylar tomonidan (tashkiliy qoʻmita bilan kelishilgan holda) taʼsis etilgan qoʻshimcha sovrinlar bilan taqdirlanishlari mumkin.

Batafsil ushbu havola orqali maʼlumot olish mumkin.

Tanlovning 1-bosqichida ishtirok etish istagini bildirgan yoshlar respublikamizdagi taʼlim muassasalariga hamda Yoshlar ishlari agentligining mahallalardagi vakillariga joriy yilning 5-sentyabriga qadar ariza bilan murojaat qiladi va barcha taʼlim muassasalarida tashkil etiladi.

Tanlovning mahalla bosqichida har bir yosh toifasida I, II, III-oʻrinni qoʻlga kiritgan gʻoliblarga ikkinchi bosqich-tuman(shahar) bosqichiga yoʻllanma beriladi. 1-bosqich gʻoliblari hujjatlari joriy yilning 16-sentyabridan 20-sentyabriga qadar Madaniyat vazirligi, Xalq taʼlimi vazirligi, Oliy va oʻrta maxsus taʼlim vazirligi hamda Yoshlar ishlari agentligining joylardagi boshqarma va boʻlimlari tomonidan tuman (shahar)larda tashkil etiladigan hududiy Tashkiliy qoʻmitalarga taqdim qilinadi.

Tuman (shahar) bosqichida har bir yosh toifasida I, II, III-oʻrinni qoʻlga kiritgan gʻoliblarga viloyat bosqichiga yoʻllanma beriladi.

Tuman (shahar) bosqichlari gʻoliblari hujjatlari joriy yilning 1-oktyabridan 5-oktyabriga qadar qadar Badiiy ijodkorlar uyushmasining Qoraqalpogʻiston Respublikasi va viloyat boʻlimlariga topshiriladi.

Viloyat bosqichida har bir yosh toifasida I, II, III-oʻrinni qoʻlga kiritgan gʻoliblarga Respublika bosqichiga yoʻllanma beriladi.

Uchinchi bosqich – viloyat bosqichi gʻoliblarining hujjatlari 1-noyabridan 5-noyabriga qadar qadar tanlovning respublika bosqichi Tashkiliy qoʻmitasiga taqdim qilinadi.

Tanlovning respublika bosqichiga yoʻllanma olgan ishtirokchiga hududiy Tashkiliy qoʻmitalar tomonidan quyidagi hujjatlar taqdim qilinishi lozim: 

• Hududiy tanlov natijalari boʻyicha Tanlov Hakamlar hayʼati bayonnomasidan nusxa;
• Ishtirokchi shaxsini tasdiqlovchi hujjat (pasport, tugʻilganlik haqidagi guvohnoma) nusxasi;
• Ishtirokchining oxirgi 3 oy ichidagi 3×4 hajmdagi 2 dona fotosurati.

Tanlov quyidagi bosqichlarda tashkil etiladi:

1. “Taʼlim muassasasi” bosqichi: mahallalar bilan hamkorlikda: 5-15-sentyabr kunlari respublika boʻylab taʼlim muassasalarida oʻtkazilib, Yoshlar ishlari agentligining mahallalardagi vakillari, madaniyat markazlari hamda taʼlim muassasalari hamkorligida tashkil etiladi. Bunda tegishli taʼlim muassasasi joylashgan mahalladagi yoshlarning faol ishtirokini taʼminlash Yoshlar yetakchilari va madaniyat markazlari zimmasiga yuklanadi;
2. Mahalliy, tuman (shahar)lar boʻyicha: 20-30-sentyabr kunlari tuman (shahar)lar kesimida Qoraqalpogʻiston Respublikasi Vazirlar Kengashi, Toshkent shahar, barcha shaharlar va tumanlar hokimliklari, Badiiy ijodkorlar uyushmasining hududiy boʻlimlari, Madaniyat vazirligining joylardagi madaniyat boshqarmalari, Oliy va oʻrta maxsus taʼlim vazirligining hududiy boshqarmalari, Xalq taʼlimi vazirligining joylardagi xalq taʼlimi boshqarmalari, Yoshlar ishlari agentligining joylardagi boʻlimlari tomonidan oʻtkaziladi;
3. Hudud-viloyat bosqichi: oktyabr oyida Badiiy ijodkorlar uyushmasining hududiy boʻlimlari masʼulligida Qoraqalpogʻiston Respublikasi Vazirlar Kengashi, viloyatlar hokimliklari, Madaniyat vazirligining joylardagi madaniyat boshqarmalari, Oliy va oʻrta maxsus taʼlim vazirligining hududiy boshqarmalari, Xalq taʼlimi vazirligining joylardagi xalq taʼlimi boshqarmalari, Yoshlar ishlari agentligining joylardagi boʻlimlari vakillaridan iborat hududiy Tashkiliy qoʻmitalari tomonidan tashkil etiladi;
4. Respublika bosqichi: noyabr oyida respublika Tashkiliy qoʻmitasi tomonidan oʻtkaziladi.

Tashkiliy qoʻmita har bir yosh toifasi boʻyicha kelib tushgan hujjatlarni 5-noyabrdan 10-noyabrga qadar koʻrib chiqadi, respublika bosqichi ishtirokchilari roʻyxatini shakllantiradi hamda nomzodlarning yakuniy roʻyxatini tasdiqlaydi.

Tasdiqlangan roʻyxat Hakamlar hayʼatiga taqdim qilinadi. Tanlov Hakamlar hayʼati 20-noyabrga qadar nomzodlar orasidan Tanlov gʻoliblarini aniqlaydi hamda Tanlov natijalari boʻyicha qaror qabul qiladi.

Tanlovning respublika bosqichi uchun ijodiy ishlar tegishli hujjatlar bilan birgalikda Toshkent shahri, Yakkasaroy tumani, Yusuf Xos Hojib koʻchasi, 37/A-uy manzili, Xalqaro madaniyat karvon saroyi binosida ( telefon: (71) 252-30- 88, (71) 256-35-56) qabul qilinadi.

• Tanlov nizomi bilan shu yerda tanishish mumkin;
• Tanlovda qatnashish uchun ariza anketasini ushbu havola orqali yuklab olish mumkin.
• Qoʻshimcha maʼlumotlar uchun: (+99871) 232-17-66