Aviatsiya muhandisligi va suyuqliklar mexanikasi boʻyicha Yevropaning 3 ta universitetida oʻqish uchun grant — TFMASA Program

Iqtidorli talabalar uchun barqaror aviatsiya muhandisligi va suyuqliklar mexanikasi boʻyicha grant — TFMASA (Aeronautical Sustainable Applications) taqdim etiladi.

Dastur aviatsiya sohasida qayta tiklanuvchi energiya manbalarini integratsiya qilish va ularning atrof-muhitga taʼsirni oʻrganish kabi innovatsion xususiyatga ega. U Erasmus+ dasturining maqsadlariga, xususan “Atrof-muhit va iqlim oʻzgarishi” ustuvor yoʻnalishiga mos keladi.

TFMASA bu uchta universitet tomonidan taklif etiladigan qoʻshma xalqaro magistratura dasturi boʻlib, ular quyidagilar:

• Université de Bordeaux (Fransiya);
• BTU Brandenburgische Technische Universität Cottbus (Germaniya);
• Louvain (EPL, Belgiya).

Dastur aviatsiya va kosmik sohalar uchun barqaror yechimlarni taklif qila oladigan, gender muvozanati yaxshiroq taʼminlangan, yuqori malakali muhandislar va tadqiqotchilarning yangi avlodini tayyorlashni maqsad qilgan.

Talabalarga quyidagi sohasi boʻyicha bilim beriladi:

• Fluid Mechanics;
• Materials Science;
• Aerospace Structures;
• Energy and Propulsion Systems;
• Multicultural Engineering Management;
• Industrial & Academic Mobility.

2026-2028 oʻquv yili uchun beriladigan grant tanlov asosida (yozma va ogʻzaki baholashlarda) eng yuqori ball toʻplagan nomzodlarga beriladi.

Dastur haqida batafsil ushbu havola orqali maʼlumot olish mumkin.

• Dasturda barcha mamlakat fuqarolari qatnashishi mumkin;
• Ingliz tilini B2 darajada bilish talab qilinadi;
• Nomzod bakalavr darajasiga ega boʻlishi (yaʼni 180 ECTS ga teng) yoki Milliy qonunchilik va mexanika/fizika sohasidagi amaliyotlarga muvofiq tan olingan ekvivalent darajani koʻrsata olishi shart;
• Yuqori akademik koʻrsatkichlarga ega boʻlish kerak.

• Dasturda ishtirok etish xarajatlari toʻliq moliyalashtiriladi;
• Barcha oʻqish va maʼmuriy toʻlovlar toʻlab beriladi;
• Oyiga 1,400 yevro miqdorida stipendiya beriladi va u quyidagilarni qoplaydi:
  • Turar joy xarajatlari;
  • Sayohat sayohat xarajatlari;
  • Materiallarga ketadigan xarajatlar.
• Aviatsiya va kosmik sohada innovatsiyalarni boshqarish uchun zarur koʻnikmalarni egallash;
• Soha boʻyicha yetakchi tadqiqotchilardan bilim olish;
• Fransiya, Belgiya va Germaniyada oʻqish imkoniyati.

Dasturda qatnashishni istaganlar ushbu havola orqali ariza topshirishlari mumkin.

Ariza topshirish mezonlari:

• Faqat bitta ariza qabul qilinadi, toʻliq boʻlmagan hujjatlar koʻrib chiqilmaydi;
• Grant asosida va oʻz mablagʻi hisobidan oʻqishga topshirayotgan nomzodlar bir xil ariza formasidan foydalanadilar;
• Belgilangan muddatdan keyin hech qanday hujjat qabul qilinmaydi;
• Nomzodlarga arizani soʻnggi daqiqaga qoldirmaslik tavsiya etiladi;
• Toʻliq topshirilgan hujjatlar arxivlanadi va oshkora hamda adolatli tarzda baholanadi.

Talab etiladigan hujjatlar:

• CV (Europass formatida) — universitet yoki maktabidagi reyting aniq koʻrsatilgan boʻlishi kerak;
• Motivatsion xat — bir betdan iborat boʻlib, nomzodning maqsadlari dastur bilan qanday mos kelishini tushuntirib berishi lozim;
• Tavsiyanoma(lar);
• Transkript va diplomlar — ingliz yoki fransuz tiliga tasdiqlangan (sertifikatlangan) tarjimalari bilan birga topshirilishi majburiy;
• Ingliz tilini bilish darajasini tasdiqlovchi hujjat (TOEFL/IELTS va boshqalar) — kamida B2 daraja talab etiladi.

Ariza topshirish jarayoni:

1. Ariza topshirish onlayn tarzda E-Mundus platformasi orqali amalga oshiriladi (Qogʻoz shaklidagi arizalar qabul qilinmaydi).
2. Tanlov bosqichlari moslikni tekshirish (mart oyining boshida), dastlabki saralash (mart oyining oʻrtalarida) va suhbatlarni (mart oyining oxirida) oʻz ichiga oladi.

• Dasturga hujjat topshirish uchun oxirgi muddat: 1-mart, 2026-yil (16:00);
• Tel: +33 (0)5 40 00 83 33;
• Email: contact@tfmasa.com.