Ayol-qizlar uchun Qirgʻizistonda xarajatlari qoplanadigan 10 kunlik tadqiqot dasturi
-
01/03/2026 Qabul boshlanishi
-
Toʻliq Moliyalash turi
-
Qirgʻiziston Davlat
-
01.04.2026 Oxirgi muddat
Umumiy maʻlumotlar
Ayol-qizlar uchun Qirgʻizistonda xarajatlari qoplanadigan ekspeditsiya — Adventure of Science: Women and glaciers in Central Asia taqdim etiladi. Ekspeditsiya uchun jami 10 nafar ayol saralab olinadi.
Dastur tanqidiy fikrlash, qiziquvchanlik va har qanday fikrni ifoda etishni ragʻbatlantirish uchun moʻljallangan. Dastur davomida atrof-muhit bilan bogʻliq mavzular, jumladan iqlim oʻzgarishi va muzshunoslik haqida maʼlumot beriladi. Bundan tashqari, guruh boʻlib oʻz ilmiy loyihasini ishlab chiqish orqali bu mavzularga qanday yondashish mumkinligi oʻrganiladi.
Dastur 2026-yil 18-avgustdan 28-avgustgacha Qirgʻizistondagi Ala-Archa Milliy Parkining yovvoyi tabiatini oʻrganish uchun olib boriladi.
Ekspeditsiyadan soʻng 2 ta ommaviy tadbir oʻtkaziladi (Qirgʻizistonda post-ekspeditsiya tadbiri va xalqaro onlayn simpozium) va unda oʻrganilgan bilimlarni olimlar va tegishli soha mutaxassislari bilan boʻlishish imkoniyati mavjud.
Maʼlumot uchun: Ushbu sayohat davomida tajribali, faqat ayollardan iborat instruktorlar jamoasi va togʻ boʻyicha gid ayol kuzatib boradi. Barcha instruktorlar togʻ xavfsizligi boʻyicha tayyorlangan, shuningdek, sertifikatga ega professional gid ekspeditsiya davomida xavf-xatarlarni boshqarish va xavfsizlikni taʼminlash uchun masʼul boʻladi. Ishtirokchilarga alp togʻlarida xavfsiz harakat qilish koʻnikmalari oʻrgatiladi.
Dasturga Shveysariya Rivojlanish va Hamkorlik Agentligi (SDC) tomonidan sertifikat berilgan.
Dastur haqida batafsil ushbu havola orqali maʼlumot olish mumkin.
Maqbullik shartlari
- 18-25 yosh oraligʻidagi Markaziy Osiyo mamlakatlaridan boʻlgan ayol-qizlar qatnashishi mumkin (Qozogʻiston, Qirgʻiziston, Tojikiston, Turkmaniston va Oʻzbekiston);
- Ingliz yoki rus tilini dasturda qatnashish darajasida bilish lozim;
- Ishtirokchilardagi bilim, tajriba va ishtiyoq hisobga olinadi:
- ilm-fanga qiziquvchi, tabiat va atrof-muhit haqida koʻproq bilishni xohlovchilar;
- yovvoyi tabiatni kashf etish imkoniyatini va oʻzi bilan bir xil dunyoqarashli ayollar bilan fikr almashishni istayotganlar.
Maʼlumot uchun: Dasturi STEM sohalari (fan, texnologiya, muhandislik va matematika) hamda alpinizmda mavjud boʻlgan gender tafovutini kamaytirishni maqsad qilgan. Shu sababli, bu sohalarda ayollarning ishtirokini ragʻbatlantirish uchun dasturda faqat ayollar qatnashishga taklif qilinadi.
Muhim: Avval dasturda qatnashganlar ariza topshirishi mumkin emas.
Foydali tomonlari
- Dasturda bepul qatnashish mumkin;
- Bishkekkacha borish-kelish xarajatlari qoplanadi;
- Ovqatlanish va turar joy bilan taʼminlanadi;
- Ekspeditsiya uchun zarur boʻlgan jihozlar (togʻda yurish uchun kiyimlar/poyabzal va texnik jihozlar) taqdim etiladi;
- Togʻ muhitini oʻrganish, muzliklarni koʻrish va ayollar jamoasi rahbarligidagi lager hayotida tajriba oʻtkazish imkoniyati.
Qoʻshimcha maʻlumotlar
- Dasturga hujjat topshirish uchun oxirgi muddat: 1-aprel 2026-yil;
- Email: centralasia@inspiringgirls.org;
- Takroran soʻraladigan savollarga javob bu yerda;
- Qoʻshimcha savol paydo boʻlganda Instagram orqali maʼlumot olish mumkin.