Bakalavr bosqichida taʼlim olayotgan ayol-qizlar uchun AQShda toʻliq moliyalashtiriladigan 4 haftalik dastur — SUSI Young Women Leaders Program
-
15/09/2024 Qabul boshlanishi
-
Toʻliq Moliyalash turi
-
Oʻzbekiston Davlat
-
20/10/2024 18:00 Oxirgi muddat
Umumiy maʻlumotlar
AQShning Toshkentdagi elchixonasi tomonidan yetakchilik qobiliyatiga ega 18-25 yosh oraligʻidagi ayol-qizlar uchun toʻliq moliyalashtiriladigan Albright Young Women Leaders Program dasturi taqdim etiladi. Dastur AQSh Davlat Departamentining Taʼlim va Madaniyat masalalari Byurosi tomonidan moliyalashtiriladi.
Dasturdan maqsad ishtirokchilarga Amerika Qoʻshma Shtatlari haqida chuqurroq tushuncha berish va shu bilan birga ularning yetakchilik mahoratini oshirishdan iborat. Ishtirokchilar AQShning demokratik tamoyillari va jamiyati, madaniyati, qadriyatlari hamda institutlari haqidagi bilimlarini oshiradi, shu bilan birga tanqidiy fikrlash, muloqot qilish, qaror qabul qilish va boshqaruv kabi sohalarda yetakchilik qobiliyatlarini rivojlantiradi. 4 haftaga moʻljallangan ushbu rezidentlik dasturi koʻplab nazariy va amaliy mashgʻulotlar hamda madaniy tadbirlarni oʻz ichiga oladi.
Dasturda ayollar bilan bogʻliq quyidagi global muammolar muhokama qilinadi:
- Taraqqiyot va ayollar yetakchiligi imkoniyatlari;
- Ayollarga nisbatan zoʻravonlikka qarshi kurash;
- Ish joyidagi ayollar uchun daromadlar nomutanosibligi va boshqa muammolarni hal qilish;
- Ayollar salomatligi bilan bogʻliq muammolar;
- Ayollarning global tinchlik, xavfsizlik va barqarorlikka hissa qoʻshish yoʻllari.
Markaziy Osiyo mamlakatlari uchun 2025-yilga moʻljallangan dasturning mavzusi — ekologiya muammolari. Unda ayollarning atrof-muhit muammolaridagi ishtiroki, barqaror rivojlanish, atrof-muhitga adolat bilan muomala qilish, jamoat salomatligi va iqlim oʻzgarishining aholiga taʼsiri kabi mavzularni oʻrganadi.
Dastur 2025-yil 21-iyundan 26-iyulgacha oʻtkazilishi rejalashtirilgan.
Dastur haqida batafsil ushbu havola orqali maʼlumot olish mumkin.
Maqbullik shartlari
- Bakalavriatning 1-,2-,3-kursida oʻqiyotgan barcha ayol-qizlar qatnashishi mumkin;
- Ingliz tilini yaxshi bilish lozim;
- Nomzodlar 18 yoshdan 25 yoshgacha boʻlishi kerak;
- Dastur mavzulariga kuchli qiziqish koʻrsatish soʻraladi (Atrof-muhit muammolari, Ayollar yetakchiligi va Amerika Qoʻshma Shtatlarini oʻrganish);
- Ishtirokchining yuqori akademik yutuqlari, yetakchilik qobiliyati va jamoat ishlarida ishtiroki inobatga olinadi;
- Talabgorning AQSh yoki boshqa xorijiy mamlakatlardagi oʻqish yoki sayohat tajribasi kam yoki umuman boʻlmasligi kerak;
- Nomzod masʼuliyatli, mustaqil, ishonchli, ochiq fikrli, bagʻrikeng va izlanuvchan boʻlishi lozim;
- Kelib chiqishi va dunyoqarashidan qatʼiy nazar barcha ishtirokchilarga hurmat bilan muomala qilish talab qilinadi;
- Dastur doirasidagi barcha mashgʻulotlarda ishtirok etish shart;
- Dastur taklif qiladigan kampusda yashash va faoliyat olib borishga tayyor boʻlish kerak.
Muhim: Taʼlim yoʻnalishlari ijtimoiy fanlar, gumanitar fanlar, taʼlim, biznes va boshqa kasbiy sohalarni oʻz ichiga olishi mumkin. Bakalavriat bosqichini tugatishiga kamida 1 semestr qolganlar dastur yakunida universitetga oʻqishni davom ettirish uchun qaytish sharti bilan qatnashishi mumkin.
Foydali tomonlari
- Dasturda bepul qatnashish mumkin;
- Barcha turdagi sayohat va transport xarajatlari toʻliq qoplanadi;
- Turarjoy va ovqatlanish bilan taʼminlanadi;
- Dastur bilan bogʻliq boshqa xarajatlar ham moliyalashtiriladi (book, cultural and incidental allowances);
- Agar dastur virtual tarzda oʻtkazilsa, ishtirokchilarga maxsus stipendiya beriladi.
Eslatma: Sogʻliqni saqlash, xavfsizlik va sayohat sharoitlari bilan bogʻliq muammo yuzaga kelgan taqdirda dastur virtual formatga oʻtkaziladi. AQShga bir haftalik oʻquv safari uyushtirilishi mumkin!
Qoʻshimcha maʻlumotlar
- Dasturga hujjat topshirish uchun oxirgi muddat: 20-oktyabr, 2024-yil (18:00);
- Email: Tashkent-Program@state.gov;
- Tel: +998 781205450;
- Faks: +998 781206335.
Quyidagi ijtimoiy tarmoqlar orqali qoʻshimcha maʼlumot olish mumkin: