Bakalavr va magistratura talabalari uchun Shveysariyada barcha xarajatlari qoplanadigan 2 oylik yozgi amaliyot dasturi

The Student Summer Research Fellowship dasturi kompyuter texnologiyasi va shunga yaqin sohalardan birida bakalavr yoki magistratura bosqichida tahsil olayotgan talabalar uchun moʻljallangan. Shveysariya davlati tomonidan eʼlon qilingan ushbu dasturda bakalavr bosqichini kamida ikkinchi bosqichida boʻlgan va oʻqishni dasturga borib kelgandan keyin yakunlaydigan barcha davlat talabalari ishtirok etishlari mumkin.

Amaliyot dasturi yozgi taʼtil davomida yaʼni 1-iyuldan 31-avgustgacha toʻliq ikki oy davomida Shveysariyaning Zurich shahrida bo'lib o'tadi.  Dastur davomida talabalar oʻzlari tanlagan mavzudagi tadqiqot loyihasi ustida ish olib borishadi. Har bir talabaga turar-joy va yashash xarajatlariga ishlatish uchun har oy stipendiya beriladi. Shuningdek, Shveysariyaga borish va viza xarajatlari ham dastur maʼmuriyati tomonidan qoplab beriladi. Dasturga ariza topshirish jarayoni 2024-yil 16-dekabrgacha davom etadi.

Dastur haqida ushbu havola orqali toʻliq maʼlumot olish mumkin.

Dasturda ishtirok etish uchun ishtirokchilarga quyidagi talablar qoʻyilgan:

• Nomzod dasturga ariza topshirish davrida bakalavr yoki magistratura bosqichini kompyuter texnologiyasi yoki shunga yaqin sohada (masalan, elektr muhandisligi, matematika, fizika) oʻqiyotgan boʻlishi lozim;
• Dasturga oʻqishni amaliyot dasturi tugagandan keyin yakunlaydiganlar qatnashishlari mumkin. Yaʼni oxirgi bosqichda oʻqiyotgan yoki dastur boshlanishidan oldin oʻqishni tugatadigan nomzodlar ishtirok eta olmaydilar;
• Bakalavr bosqichi talabalari ariza toshirish davrigacha ikkinchi bosqichni tugatgan boʻlishlari kerak;
• Dastur ikki oy toʻliq davom etadi va ishtirokchilar ushbu davr mobaynida amaliyot dasturida toʻliq qatnasha olishga rozi boʻlishlari zarur;
• Amaliyot dasturi ingliz tilida olib boriladi. Shuning uchun ham nomzodlardan ingliz tilini bilish talab qilinadi. Ammo rasmiy sertifikat yoki hujjat soʻralmaydi. Ishtirokchilarning til bilish darajasi intervyu davomida aniqlanadi.

Dastur talablari haqida ushbu havola orqali batafsil maʼlumot olish mumkin.

Dasturning quyidagi foydali tomonlari mavjud:

• Ishtirokchilar 2 oy davomida yashashlari uchun yaxshi turar-joy bilan taʼminlanadi;
• Shvetsariyaga borish va viza xarajatlari ham dastur maʼmuriyati tomonidan toʻliq qoplab beriladi;
• Har bir talabaga turar-joy va yashash xarajatlarini qoplash uchun har oy stipendiya beriladi;
• Dastur doirasida guruh aʼzolari va boshqa tengdosh talabalar bilan fikr almashish hamda maʼlumotlar olish imkoni ham mavjud boʻladi;
• Dastur davomida talabalar oʻzlari tanlagan mavzudagi tadqiqot loyihasi ustida ish olib borish imkonini qoʻlga kiritishadi;
• Zurich shahri madaniyati va xalqi bilan tanishish, boʻsh vaqtlarida esa Shveysariyaning togʻli manzaralarini tomosha qilish imkoniyatiga ega boʻlishadi.

Dasturning foydali jihatlari haqida ushbu havola orqali toʻliq maʼlumot olish mumkin.

Ishtirokchilar dasturning quyidagi yoʻnalishlardan biriga ariza topshirishlari mumkin:

• Maʼlumotlarni boshqarish va mashinalarni oʻrganish;
• Axborot va tizim xavfsizligi;
• Kompyuter tizimlari;
• Intellektual interaktiv tizimlar va fizik hisoblash;
• Dasturlash tillari va dasturiy taʼminot muhandisligi;
• Nazariya va algoritmlar;
• Vizual hisoblash;

Dasturga ariza topshirish jarayoni quyidagicha:

1. Avvalambor, ushbu havola orqali kirib roʻyxatdan oʻtish lozim.
2. Soʻngra, ushbu havola orqali kirib onlayn ariza shaklini toʻldirish kerak.
3. Ariza shaklini toʻldirib boʻlgandan soʻng “Apply now” tugmasini bosish lozim.

Eslatma! Dasturga ariza topshirishdan avval barcha yoʻriqnomalarni oʻqib chiqing. Ariza shaklida soʻralgan barcha hujjatlar topshirilmagan taqdirda ariza qabul qilinmasligi yoki koʻrib chiqilmasligi mumkin.

Dasturga ariza topshirish jarayoni haqida ushbu havola orqali ariza maʼlumot olish mumkin.

Dastur boʻyicha qoʻshimcha savollar tugʻilgan taqdirda SSR_Fellowship@inf.ethz.ch оrqali javob topish mumkin.

Amaliyot dasturi professorlari haqida ushbu havola orqali maʼlumot olish mumkin.

Dastur haqidagi maʼlumotlarni quyidagi ijtimoiy tarmoqlar orqali ham topish mumkin:

-facebook;

-twitter;

-youtube;

-LinkedIn.