Bakalavr, magistratura va PhD talabalari uchun Koreyada xarajatlari qoplanadigan KF Fellowship for Korean language 2024 dasturi. Oylik stipendiya — $1045 gacha

2024 KF Fellowship for Korean Language Training (KLT) dasturi 1993-yildan beri koreys tilini umumiy targʻib qilish va ommalashtirish uchun Koreya Jamgʻarmasi tomonidan tashkil etilgan koreys tilini oʻqitish (KLT) boʻyicha yillik stipendiya dasturi hisoblanadi.

Ushbu dastur koreys tilini oʻrganish va Koreyadan tashqarida Koreya bilan bogʻliq faoliyatni ilgari surishning asosi sanaladi. Fond hozirda 2024-yilgi KLT dasturiga arizalarni qabul qilmoqda.

Dasturda koreys tiliga oid sohada oʻqiyotgan PhD, bakalavriat va magistratura talabalari, koreysshunos tadqiqotchilar qatnashishi mumkin. Ishtirokchilar Koreyadagi universitetda olti oy davomida intensiv immersion dasturida koreys tilini oʻrganish imkoniyatiga ega boʻladilar.

Dastur gʻolibi deb topilganlar 6 oy davomida oylik stipendiya, bir martalik sayohat uchun toʻlov, bepul tibbiy sugʻurta bilan taʼminlanadilar. Dastur uchun nomzodlar orasidan 30 ta g'olib tanlab olinadi.

 Dasturga hujjat topshirishning oxirgi muddati - 2023-yil, 31-avgust soat 14:00 gacha.

Ushbu dasturda quyidagi toifalar ishtirok etishi mumkin:

• Koreys tili fanlari bilan bogʻliq sohada oʻqiyotgan magistratura talabalari;
• Koreys tiliga oid mavzu boʻyicha batafsil tezis/dissertatsiyaga ega PhD bosqichi talabalari;
• Koreys tili (Koreys tili va adabiyoti) yoʻnalishining kamida 3-bosqichida oʻqiyotgan va sakkizta koreys tili kurslarini olgan bakalavriat talabalari;
• Koreys tiliga oid darslar oʻtilmaydigan universitetning kamida 3-bosqichida oʻqiyotgan va sakkizdan ortiq koreys tili kurslarini oʻqigan bakalavriat talabalari. Bunda nomzodlar universitetida koreys tiliga oid darslar oʻtilmasligini tasdiqlovchi dalillarni (masalan, tegishli universitet veb-saytidagi oʻtiladigan daraja kurslarining skrinshoti) topshirishi kerak;
• Koreys tilidagi asosiy jumlalarni tushunishi va gapira olishi kerak.

Quyidagi shaxslar dasturda ishtirok eta olmaydi:

• Koreya fuqarolari;
• Koreyada oʻqiyotgan yoki tadqiqot olib borayotganlar;
• Dastur davomida Koreyadagi oliy taʼlim muassasasiga oʻqishga kirishni rejalashtirayotgan shaxslar (Dastur tugagandan keyin boshlanadigan oʻqishga topshirish mumkin) ;
• Soʻnggi 2 yil ichida (2022–2023) koreys tilini oʻrganish uchun KF stipendiyasini olgan shaxslar;
• Dastur davomida Koreya yoki xorijdagi boshqa muassasadan stipendiya oluvchilar.

Eslatma: Dastur davomida Koreya universitetlarida oʻqish uchun hujjat topshirish mumkin emas!

Dastur talablari haqida batafsil maʼlumotni ushbu havola orqali olish mumkin.

• Koreyada 6 oy davomida bepul koreys tilini oʻrganish imkoniyati;
• Har oyda yashash xarajatlarini qoplash uchun stipendiya beriladi: bakalavriat va magistratura talabalari uchun oyiga — 1,200,000 Janubiy Koreya voni ($895); PhD nomzodlari uchun —  1,400,000 Janubiy Koreya voni ($1045);
• Bir martalik sayohat puli beriladi: bakalavriat va magistratura talabalari uchun 300,000 Janubiy Koreya voni ($224); PhD nomzodlari uchun 500,000 Janubiy Koreya voni ($373);
• Koreya sugʻurta kompaniyasi tomonidan taqdim etilgan tibbiy sugʻurta xarajatlari qoplanadi.

Eslatma: aviachipta xarajatlari qoplab berilmaydi!

Dasturning foydali jihatlari haqida ushbu havola orqali batafsil maʼlumot olish mumkin.

• Dasturga hujjat topshirish uchun ushbu havolada keltirilgan eʼlonning pastki qismidagi “Apply“ tugmasini bosish va onlayn ariza shaklini toʻldirish kerak.

Ariza shaklida quyidagi hujjatlarni yuklash kerak:

• Onlayn ariza shakli:

1. Ariza beruvchining shaxsiy maʼlumotlari; 
2. Ingliz yoki koreys tilida 400 ta soʻz bilan yozilgan koreys tilini oʻrganishdan maqsad, oʻqish yoki hozirgi ishida koreys tilini bilish zarurati va kelajakdagi rejalari ifodalangan insho (proposal);

• Eng soʻnggi akademik darajani tasdiqlovchi hujjat. (Talabalar oʻqishni qachon tugatish haqida maʼlumotnoma yuklashi kerak);
• Koreys tilini bilish sertifikati: 

1. TOPIK yoki Korean Language Proficiency Test (KLPT). TOPIK 3 yoki 4-darajaga ega boʻlganlarga ustunlik beriladi;
2. Universitetda koreys tilini oʻqiganligini tasdiqlovchi transkriptlar yoki boshqa tegishli hujjatlar;
3. Ariza beruvchining koreys tilini bilishini tasdiqlovchi rasmiy mukofot, masalan, Koreya elchixonasi tomonidan oʻtkazilgan koreys tilida nutq tanlovi mukofoti;

• 2 ta tavsiyanoma:

1. Vakolatli institut boshligʻi/ilmiy rahbar tomonidan berilishi kerak;
2. Koreys tili oʻqituvchilari (Ular koreys tiliga ixtisoslashgan vakolatli professor yoki oʻqituvchi boʻlishi va nomzodning koreys tilini bilish darajasini baholay olishi kerak.)

• Transkript:

1. Bakalavr bosqichi talabalari shu paytgacha olgan baholarini topshirishi lozim;
2. Magistratura va PhD talabalari ham bakalavriat ham magistraturada olgan transkriptlarini topshirishi kerak.

Eslatma: 

• Ariza shakli va barcha hujjatlar ingliz yoki koreys tilida topshirilishi kerak. Agar hujjatlar boshqa tilda taqdim etilsa, original faylni ham, notarial tasdiqlangan tarjimasini ham taqdim etish kerak;
• Faqat skanerlangan fayllar (PDF formatida) qabul qilinadi, shuning uchun jpg, png yoki boshqa rasm fayllarini PDF fayllarga aylantirib topshirish lozim.

Dasturga ariza topshirish haqida batafsil maʼlumotni ushbu havola orqali olish mumkin.

• Dasturga oid eng koʻp berilgan savollarga javoblarni (FAQs) ushbu havola orqali oʻqish mumkin.
• Dastur haqida qoʻshimcha savol va takliflarni fellow@kf.or.kr elektron manziliga yuborish mumkin. 
• Onlayn ariza portaliga oid savollar uchun tech-support@kf.or.kr elektron manziliga murojaat qilish kerak.

2023-yil noyabr oyida koreys tilini bilish darajasini tekshirish uchun suhbat oʻtkaziladi: Bu boʻyicha hujjatlarni koʻrib chiqish bosqichidan oʻtganlar elektron pochta orqali aniq koʻrsatmalar oladi.

Stipendiyaga sazovor boʻlganlardan KFga qoʻshimcha hujjatlarni topshirish talab qilinishi mumkin.

Ariza topshiruvchilar oʻzlarining onlayn arizalarini topshirgandan soʻng, tizim avtomatik ravishda nomzodlar tavsiyanomada elektron pochta manzillarini koʻrsatgan hakamlarga email yuboradi. Shuning uchun, ariza berishdan oldin tavsiyanoma bergan shaxslarga tavsiya xati soʻrovi haqida xabar berishlari kerak. (Ikkala tavsiyanoma ham arizani koʻrib chiqish uchun ariza topshirish davrida qabul qilinishi kerak).

Yakuniy natijalar 2023-yil dekabr oyida email yuborish orqali eʼlon qilinadi.

Dastur 2024-yil mart oyida boshlanadi.