Bakalavr talabalari uchun AQShning nufuzli Kaliforniya universitetida barcha xarajatlari qoplanadigan amaliyot dasturi - Research in Industrial Projects for Students Program

Research in Industrial Projects for Students (RIPS) dasturi dunyo boʻylab matematika, informatika kabi sohalarga katta qiziqish va bilimga ega boʻlgan bakalavr va magistratura bosqichi talabalari uchun AQShning Kaliforniya universitetida amaliyot oʻtash imkoniyatini taqdim etadi.

Ushbu dasturda talabalar oʻzlariga tayinlangan mentorlar va soha mutaxassislar koʻmagida tegishli muammoni tadqiq qiladi va yechimlarini ogʻzaki va yozma ravishda taqdim etadi.

Dastur 2022-yil 21-iyundan 19-avgustgacha davom etadi va bu vaqt davomida RIPS talabalari Los-Anjelesda joylashgan Kaliforniya universiteti (UCLA) kampusidagi yotoqxonada yashaydilar va IPAM (Sof va amaliy matematika instituti)da amaliyot olib boradi. Dastur davomida toʻqqizta loyihani amalga oshirish rejalashtirilgan. Loyiha homiylari 2022-yil mart oyida eʼlon qilinadi. Loyihalar turlicha, lekin barchasi matematika, statistika, maʼlumotlar va hisoblash kabi sohalarni oʻz ichiga oladi. Dasturga oid barcha xarajatlar toʻliq moliyalashtiriladi.

Dasturda ishtirok etish uchun nomzodlar quyidagi talablarga javob berishi lozim:

• Dasturda 18 yoshdan yuqori boʻlgan bakalavr bosqichida oʻqiyotgan yoki 2021-yil dekabrdan keyin tugallaydigan talabalar ishtirok etishi mumkin;
• Matematika sohasi boʻyicha kuchli bilim yoki qiziqishga ega boʻlishi va uni haqiqiy hayotda ham qoʻllay olishi kerak;
• Loyihalarning aksariyati muhim hisoblash komponentiga ega, shuning uchun kompyuter fanlari, maʼlumotlarni tahlil qilish yoki raqamli hisoblash boʻyicha malakaga yoki hech boʻlmaganda biroz tajribaga ega boʻlishi kerak (majburiy emas);
• Ingliz tilini mukammal darajada bilishi shart.

Dasturga qabul qilinganlar quyidagi imtiyozlarga ega boʻladi:

• AQShga borish-kelish xarajatlari moliyalashtiriladi;
• Ishtirokchilarga $3,800 stipendiya beriladi;
• UCLA (Los-Anjelesdagi Kaliforniya universiteti) kampusidan bepul turar joy va oziq ovqat bilan taʼminlanadi;
• Dasturga aloqador konferensiyalarda ishtirok etish uchun safar xarajatlarida yordam koʻrsatiladi;
• J-1 viza olishida yordam beriladi.

Dasturda ishtirok etish uchun nomzodlar ushbu havola orqali ariza topshirishlari kerak. Ariza topshirish quyidagi ketma-ketlikda amalga oshiriladi:

• Ariza topshirish boʻlimiga kirib Apply tugmasi bosiladi;
• Nomzod oʻzining elektron pochta manziliga kirib, parolini kiritadi va birinchi loginiga “this is my first login…” yacheykasiga tasdiq belgisi qoʻyiladi;
• Tizimga kirgandan soʻng, kerakli maʼlumotlar toʻldiriladi va 2 ta tavsiyanoma beruvchining maʼlumotlari ham yuklanadi;
• “Submit” tugmasi bosiladi va ariza shakliga qaytiladi;
• RIPS application form, yaʼni ariza shakli toʻldiriladi. Bunda xalqaro talabalar faqat RIPS-LA uchun ariza topshirishlari mumkin;
• Kerakli hujjatlar(CV, baholar roʻyxati va 2 ta tavsiyanoma beruvchi maʼlumotlari) taqdim etiladi. Bunda tavsiyanoma beruvchi shaxs ismi yonidagi katakchaga tasdiq belgisi qoʻyiladi va yashil tugma bosilgandagina tegishli shaxsga tavsiya berish uchun elektron xabar yuboriladi. Muhim! tavsiya beruvchilar nomi yonidagi holat “email sent” ga oʻzgarishi shart. Aks holda tavsiya beruvchi shaxsga bu soʻrov yuborilmagan boʻladi;
• Ariza shaklini toʻldirib “Apply” tugmasi bosiladi va ekranda “Thank you for submitting your application” yozuvi chiqadi.

RIPS 2022 dasturi anʼanaviy (oflayn) tarzda oʻtkazilishi reja qilingan, ammo COVID-19 pandemiya vaziyati yomonlashsa, onlayn tarzda oʻtkazilishi ham mumkin.

Koʻp berilgan savollar va ularning javoblari bilan ushbu havola orqali tanishish mumkin.

Qoʻshimcha savol va maʼlumotlar uchun: rips@ipam.ucla.edu