Bakalavr talabalari uchun Yaponiyada barcha xarajatlari qoplanadigan 1 yillik “Yapon tili va Yaponiya madaniyati” dasturi

Yaponiya Hukumati (Monbukagakusho: MEXT) Yaponiya universitetlarida bir yil davomida yapon tili, mamlakat geografiyasi, yapon madaniyati sohasidagi bilimlarini chuqurlashtirish uchun “Yapon tili va Yaponiya madaniyati” grantini eʼlon qiladi. Ushbu grant bakalavr bosqichining ikkinchi yoki uchinchi bosqichida tahsil olayotgan talabalar uchun ajratilgan boʻlib, dasturda 18 yoshdan 30 yoshgacha boʻlgan talabalar ishtirok etishlari mumkin. Shuningdek, nomzodlardan universitetda yapon tili va madaniyatiga yaqin sohada tahsil olayotgan boʻlishlari soʻraladi.

Ishtirokchilarning yoʻl, oʻqish xarajatlari va kontrakt pulini grant maʼmuriyati toʻliq qoplab beradi. Bundan tashqari, ularga 117,000 yapon iyenasi miqdorida oylik stipendiya ham toʻlanadi. Dasturga qabul jarayoni 2025-yil 27-yanvargacha davom etadi. Nomzodlardan hujjatlarning asl nusxasini Yaponiyaning Oʻzbekistondagi elchixonasiga topshirish soʻraladi.

Dastur haqida ushbu havola orqali toʻliq maʼlumot olish mumkin.

Dasturda ishtirok etish uchun quyidagi talablar mavjud:

• Dasturda bakalavr bosqichida oʻqiyotgan Oʻzbekiston fuqarolari ishtirok etishlari mumkin;
• Nomzodlar 18-30 yosh oraligʻida boʻlishlari zarur. Yaʼni nomzodning tugʻilgan sanasi 1995-yil 2-apreldan 2007-yil 1-aprelgacha boʻlgan davrga toʻgʻri kelishi kerak;
• Talabgorlar Yaponiyaga kelish paytida ham, oʻz Vataniga qaytib ketish paytida ham oliy oʻquv yurtining talabasi boʻlishi zarur. Bu esa bitiruvchi kurs hamda birinchi kurs talabalari dasturda qatnasha olmasliklarini bildiradi. Yaʼni dasturda faqat ikkinchi yoki uchinchi kurs talabalari qatnashishlari mumkin;
• Ishtirokchilar universitetda yapon tili va madaniyatiga yaqin sohada tahsil olayotgan boʻlishlari zarur. Shuningdek, ular 2025-yil 1-sentyabrga qadar bakalavr sohasida kamida bir yil davomida yapon tili, madaniyati yoki shunga oid sohani oʻrgangan boʻlishlari kerak;
• Nomzodlardan yapon tilini grant mashgʻulotlarida ishtirok eta olish darajasida bilish talab qilinadi;
• Ishtirokchilar ruhiy va jismoniy jihatdan sogʻlom boʻlishlari kerak. Chunki ulardan sogʻliqlari toʻgʻrisidagi maʼlumotnoma ham soʻraladi;
• Grant gʻoliblaridan dastur boshlanishidan 2 hafta oldin Yaponiyaga yetib borish talab qilinadi.

Dastur talablari haqida ushbu havola orqali batafsil maʼlumot olish mumkin.

Dastur talablari boʻyicha ingliz tilidagi qoʻllanmani ushbu havola orqali topish mumkin.

Dastur talablari boʻyicha yapon tilidagi qoʻllanmani ushbu havola orqali topish mumkin.

Dasturning quyidagi foydali jihatlari mavjud:

• Dastur ishtirokchilarining kontrakt, kirish imtihoni va shu bilan bogʻliq barcha xarajatlari grant tomonidan qoplanadi;
• Talabalarga 117,00 yapon iyenasi miqdorida oylik stipendiya beriladi;
• Maxsus hududda oʻquvchi talabalar uchun har oy 2000-3000 iyena miqdorida ham pul toʻlab beriladi;
• Yoʻl xarajatlari, yaʼni Yaponiyaga borish va qaytish aviachipta puli toʻlab beriladi.

Dasturning foydali jihatlari haqida ushbu havola orqali toʻliq maʼlumot olish mumkin.

Dasturga qabul jarayoni 2025-yil  27-yanvargacha davom etadi. Nomzodlar soʻralgan hujjatlarni Yaponiyaning Oʻzbekistondagi elchixonasiga olib borishlari kerak boʻladi. Onlayn joʻnatilgan hujjatlar qabul qilinmaydi. Ariza uchun soʻralgan hujjatlar roʻyxati quyidagicha:

1. Soʻrovnoma-ariza (Application form);
2. Institutlarni tanlash (Placement Preference Form);
3. Talabaning reyting daftarchasidan koʻchirma. Yapon tili va madaniyatiga oid fanlar “*” bilan belgilanishi kerak. Hujjatlarda universitet muhri va rahbar imzosi boʻlishi shart;
4. Oliy oʻquv yurtida kamida bir yil yapon tilini oʻrganganligini tasdiqlovchi hujjat. Bu hujjat 3-banddagi hujjat boʻlmagan taqdirda topshiriladi;
5. Ariza beruvchi oliy oʻquv yurtining talabasi ekanligini tasdiqlovchi hujjat;
6. Oliy oʻquv yurtining oʻqituvchisi, ilmiy rahbari yoki dekani nomidan yozilgan tavsiyanoma;
7. Tibbiy guvohnoma;
8. Yapon tili boʻyicha malakani tasdiqlovchi hujjat.

Eslatma! Nomzodlar taqdim etgan hujjatlar qaytarib berilmaydi. Hujjatlar asl nusxada boʻlishi lozim.

Dasturga ariza topshirish davomida quyidagilarga alohida eʼtibor berish lozim:

1. Barcha hujjatlar qatʼiyan ingliz yoki yapon tillarida toʻldirilgan va tuzilgan boʻlishi lozim;
2. Toʻgʻri toʻldirilmagan yoki hujjatlar toʻliq topshirilmagan taqdirda, Yaponiya elchixonasi nomzodni saralashning keyingi bosqichiga oʻtkazmaslik huquqini saqlab qoladi;
3. Soʻrovnomaning 1-bandida ingliz tilidagi ismi-sharifingiz pasport boʻyicha yozilishi lozim (ota ismini yozilmaslik kerak). 17-bandida Oʻzbekiston tizimi boʻyicha olingan taʼlim maʼlumotida “Primary Education” degan joyida 1-sinfdan 4-sinfgacha 4 yil koʻrsatiladi; “Lower Secondary Education” qismida 5-sinfdan 9-sinfgacha 5 yil; “Upper Secondary Education” degan qismida kollej va litseydagi 3 yil; “Tertiary (Higher) Education (Undergraduate)” qismida oliy oʻquv yurtidagi bakalavr oʻquv yillari (taʼtil oylari qoʻshilgan holda toʻliq yil inobatga olinsin);
4. Talab etilgan barcha hujjatlarning yuqori oʻng burchagiga 1 dan 8 gacha raqamlab chiqish lozim;
5. Hujjatlarni stepler bilan biriktirmaslik kerak;
6. Nomzod taʼlim olishni istagan universitetni (Institutlarni tanlash shakli) Yaponiyaning elchixonasida bor “Course Guide for Japanese Studies Students” katalogdan koʻrsatiladi;
7. Ushbu dasturda oʻqishni tugatgandan soʻng Oʻzbekistonga qaytish talab qilinadi. Ishtirokchi taʼlim muassasasining ilmiy rahbari yoki rahbariyati bilan keyingi taʼlim rejasini muhokama qilishi shart;
8. Tibbiy guvohnoma taqdim etilgandan soʻng nomzod sogʻligʻida oʻzgarishlar yuz bergan taqdirda, bu haqda darhol Yaponiya elchixonasiga xabar berishi shart.

Dastur saralash jarayoni quyidagicha:

Birinchi bosqich - Nomzodning Yaponiya elchixonasiga taqdim etilgan hujjatlari, yozma imtihon va suhbatlashish yakunlari boʻyicha tanlov asosida saralash oʻtkazadi. Saralash natijalari 2025-yil 4-fevralda eʼlon qilinadi. Natijalarni Yaponiya elchixonasiga telefon qilib bilib olish mumkin;

Ikkinchi bosqich - Saralashning birinchi bosqichidan oʻtgan nomzodlar Yaponiya taʼlim vazirligiga (MONBUKAGAKUSHO: MEXT) tavsiya etiladi. MEXT tanlovning ikkinchi (yakuniy) bosqichini olib boradi. Ushbu bosqich 2025-yil 16-fevralda boʻlib oʻtadi va unda yapon tili boʻyicha yozma imtihon olinadi. Natijada tavsiya etilgan nomzodlar orasidan grant gʻoliblari aniqlanadi.

Dasturga ariza topshirish jarayoni haqida ushbu havola orqali batafsil maʼlumot olish mumkin.

Ariza topshirish jarayoni boʻyicha ingliz tilidagi qoʻllanma bilan ushbu havola orqali tanishish mumkin.

Ariza topshirish jarayoni boʻyicha yapon tilidagi qoʻllanma bilan ushbu havola orqali tanishish mumkin.

Ariza topshirish jarayoni boʻyicha rus tilidagi qoʻllanma bilan ushbu havola orqali tanishish mumkin.

Dasturning yapon tilidagi rasmiy saytiga ushbu havola orqali tashrif buyurish mumkin.

Oʻquv dasturlari, soʻrovnomalarni toʻldirish va dastur bilan bogʻliq savollar tugʻilgan taqdirda elchixonaning “Madaniyat va axborot boʻlimi”ning quyidagi raqamlariga qatʼiyan soat 09:00-13:00 yoki 14:30-18:00 oraligʻida qoʻngʻiroq qilib bogʻlanishlari mumkin:

-(78)-120-80-76;

-(78)-120-80-60;

-(78)-120-80-61;

-(78)-120-80-62.