Bakalavr va magistratura talabalari uchun Shveytsariyada yozgi amaliyot — CERN Summer Student Programme dasturi

Shveytsariyaning CERN tashkiloti tomonidan fizika, muhandislik, informatika va matematika yoʻnalishida oʻqiyotgan kunduzgi bakalavr va magistr talabalari uchun maxsus CERNʼs Summer Student Programme tashkil etilgan.

8-13 hafta davom etadigan ushbu amaliyot davrida ishtirokchilar oʻz yoʻnalishlariga doir maʼruzalarda qatnashish imkoniyatiga ega boʻladi. Bunda butun dunyo boʻylab tajribali olimlar nazariy va eksperimental fizika, muhandislik va hisoblash sohalaridagi mavzular boʻyicha oʻz bilimlarini baham koʻrishadi. Dastur asosini CERN obyektlariga tashriflar, shuningdek, muhokama sessiyalari va seminarlarda ishtirok etish tashkil etadi.

Amaliyot yakunida qatnashchilar oʻzlari ishtirok etgan loyiha yoki tajriba boʻyicha hisobot topshirishlari kerak. Dastur davomidagi seminar va mashgʻulotlar haqida batafsil ushbu havola orqali maʼlumot olish mumkin.

Dasturga qabul qilingan ishtirokchilarning safar xarajatlari moliyalashtiriladi va yashash xarajatlari uchun kunlik stipendiya bilan taʼminlanadilar.

Dasturda ishtirok etish uchun nomzodlar quyidagi talablarga javob berishi lozim:

• Dasturda fizika, muhandislik, informatika va matematika yoʻnalishida oʻqiyotgan kunduzgi bakalavr va magistr talabalari ishtirok etishi mumkin. Bunda bakalavr bosqichi talabalari 2024-yil yozdagi holatiga koʻra, kamida 3-bosqichni yakunlagan boʻlishi shart;
• Nomzodlar avval CERN da 3 oydan ortiq ishlamagan va amaliyot oʻtamagan boʻlishi kerak;
• Ingliz tilini mukammal darajada bilishi shart. Fransuz tilini bilish afzallik beradi.

Dastur talablari haqida batafsil ushbu havola orqali maʼlumot olish mumkin.

Dasturga qabul qilinganlar quyidagi imtiyozlarga ega boʻladi:

• Dastur davomida yashash va oziq-ovqat xarajatlarini qoplash uchun kunlik 90CHF (~$103.51) stipendiya bilan taʼminlanadi;
• Dastur soʻnggida ishtirokchilarga Jeneva va oʻz yashash joyi oʻrtasidagi sayohat xarajatini toʻlashda yordam berish uchun bir martalik moddiy yordam beriladi;
• Texnik loyiha ustida ishlash uchun 8 haftadan 13 haftagacha amaliyot oʻtash imkoniyatiga ega boʻladi. Bunda CERN tashkilotiga aʼzo boʻlmagan davlatlar, jumladan, Oʻzbekiston fuqarolari 8 haftagacha amaliyot qilishlari mumkin.
• Fizika maʼruza dasturida qatnashadi(Talabalar Openlab tomonidan tashkil etilgan IT maʼruzalarida ham qatnashishlari mumkin);
• Tibbiy sugʻurta xarajatlari qoplanadi;
• CERN amaliyot hududiga yaqin turar joy topishda yordam beriladi.

Dasturning manfaatli jihatlari haqida batafsil ushbu havola orqali maʼlumot olish mumkin.

Dasturga ariza topshirish uchun ishtirokchilar ushbu havola orqali roʻyxatdan oʻtishlari va onlayn ariza topshirishlari mumkin.

Kerakli hujjatlar:

• CV;
• Universitet olingan eng soʻnggi semestr baholari;
• 2 ta tavsiyanoma.

Eslatma! Ushbu hujjatlar ariza topshirish jarayonida aniq (“CV”, “Motivation letter”, “Academic transcript”) nom bilan PDF shaklda boʻlishi va ingliz tilida taqdim etilishi shart.

Ariza topshirishni boshlashdan avval ushbu hujjatlar tayyorlab qoʻyilishi kerak. Chunki ariza shakli toʻldirib boʻlgandan soʻng qayta hujjat qoʻshishning imkoni mavjud emas.

Ariza topshirilgandan soʻng nomzodning email manziliga tasdiqlovchi xabar yuboriladi. Agar ariza topshirayotganda tavsiyanomalar yuklanmagan boʻlsa, ushbu havola kamida bitta ilmiy rahbar yoki oʻqituvchiga yuborish kerak. Shunda ular oʻzlarining tavsiyanomalarini yuklashi mumkin boʻladi.

Muhim! Bu jarayon ariza topshirishning oxirgi muddatidan oldin (2024-yil 31-yanvar dushanba 16:00) amalga oshirilishi kerak.

Dastur ishtirokchilari amaliyot oʻtashni 2024-yil 7-,13-,20-,27-iyun va 4-iyul sanasida boshlashlari mumkin.

Dastur haqida batafsil ushbu havola orqali maʼlumot olish mumkin.