Barcha bosqich talabalari hamda bitiruvchilar uchun haq toʻlanadigan UNICEF amaliyot dasturi

Butun dunyoga mashhur UNICEF xalqaro tashkiloti bakalavriat, magistratura yoki PhD bosqichida oʻqiyotgan yoki uni tamomlaganiga 2 yildan oshmagan xalqaro talaba va bitiruvchilar uchun global doirada amaliyot oʻtash imkoniyatini beruvchi UNICEF Internship Programme dasturini taqdim etadi. Dasturning davomiyligi odatda 6 haftadan 26 haftagacha boʻladi. Amaliyot toʻliq yoki yarim kunlik boʻlishi mumkin va amaliyot imkoniyatlari yil davomida taqdim etiladi.

UNICEF tashkilotida amaliyotchilar gumanitar sohada tajriba oʻrganish imkoniyatlariga ega boʻladilar, shuningdek, tashkilot ularning akademik, kasbiy va shaxsiy rivojlanishini qoʻllab-quvvatlaydigan mazmunli amaliyot tajribasini taklif qiladi.

Maʼlumot uchun: UNICEF dunyoning barcha nuqtasida yashaydigan kam taʼminlangan bolalar va oʻsmirlarga yordam berish va har bir bolaning huquqlarini himoya qilish bilan shugʻullanadigan keng tarmoqli xalqaro tashkilotdir. Tashkilot 190 dan ortiq mamlakat va hududlarda faoliyat olib boradi va bolalarning erta bolalikdan oʻsmirlik davrigacha boʻlgan muddatda omon qolishi, rivojlanishi va oʻz imkoniyatlarini toʻliq roʻyobga chiqarishiga yordam beradi.

Dastur haqida batafsil ushbu havola orqali maʼlumot olish mumkin.

• Dasturda bakalavriat, magistratura yoki PhD bosqichida oʻqiyotgan yoki uni tamomlaganiga 2 yildan oshmagan xalqaro talaba va bitiruvchilar qatnashishi mumkin;
• Nomzodlar kamida 18 yosh boʻlishi lozim;
• Quyidagi tillardan kamida bittasini bilish talab qilinadi:
  • Ingliz tili; 
  • Fransuz tili;
  • Ispan tili.
• Nomzodning UNICEF tashkilotida ishlaydigan yaqin qarindoshi (masalan, ota-ona, opa-singil, aka-ukalari) yoki vakolat doirasida xizmat qiladigan boshqa qarindoshlari boʻlmasligi kerak;
• Kuchli akademik koʻrsatkichga ega boʻlish lozim;
• Ariza topshirilayotgan yoʻnalishga tegishli har qanday professional tajriba hisobga olinadi.

Muhim: Nomzod murojaat qilayotgan idoraning ish tilini ravon bilish ham talab qilinishi mumkin. Shuning uchun tanlangan yoʻnalishdagi idoraning ichki talablari bilan ham tanishib chiqish lozim.

• Xalqaro tashkilotda 6 haftadan 26 haftagacha bevosita amaliy ish tajribasiga ega boʻlish;
• Oylik stipendiya beriladi;
• Sayohat va viza xarajatlari uchun hissa sifatida bir martalik toʻlov berilishi mumkin;
• Agar kerak boʻlsa, UNICEF nomzodning viza arizalari uchun tegishli tasdiqlovchi hujjatlarni taqdim etadi.

Eslatma: Amaliyot muddati va stipendiyalar miqdori ariza topshirilgan yoʻnalishga qarab farqlanadi.

• Dasturda ishtirok etishni istaganlar dastlab ushbu havola orqali boʻsh ish oʻrinlari bilan tanishib chiqishi lozim;
• Maʼqul boʻsh ish oʻrinini aniqlagandan soʻng “Apply now” tugmasini bosish va ariza berish jarayoni boʻyicha koʻrsatmalarni bajarish kerak;
• UNICEFdagi koʻpgina ish uchun nomzoddan quyidagilar soʻraladi:
  • Onlayn ishga qabul qilish uchun profil yaratish;
  • CV;
  • Cover letter (maksimal 1 bet).

Eslatma: Har bir amaliyot imkoniyati uchun talablarni diqqat bilan koʻrib chiqish lozim. Arizalar koʻpligi sababli faqat saralangan nomzodlar bilan bogʻlaniladi.

Ariza topshirish boʻyicha foydali maslahatlar bilan ushbu havola orqali tanishib chiqish mumkin.

UNICEF tashkilotiga ariza topshirishni oʻrgatish maqsadida Agora platformasi “Yozma ariza tayyorlash“ kursini taqdim etadi.

Quyidagi ijtimoiy tarmoqlar orqali qoʻshimcha maʼlumot olish mumkin:

• Linkedin;
• Facebook;
• Twitter;
• Youtube.

Takroran soʻraladigan savollarga javob bu yerda;

Email: internship@unicef.org.