Barcha bosqich talabalari, professor va tadqiqotchilar uchun Slovakiyada o'qish va tadqiqot olib borish imkonini beruvchi The National Scholarship Programme of Slovak Republic almashinuv dasturi. Oylik stipendiya va yo'l xarajatlari uchun mablag'

Slovakiya hukumati boshqa universitetlar bilan xalqaro aloqalarni yo'lga qo'yish, qolaversa, kuchli bilim va salohiyatga ega talabalarni shu yerda o'qishga, professor va tadqiqotchilarni esa ilmiy ish olib borishga ruhlantirish maqsadida The National Scholarship Program of Slovak Republic almashinuv dasturini joriy etgan. Dastur davomida ishtirokchilar Slovakiya universitetlaridan birida bepul o'qishi, tadqiqotchilar esa ilmiy izlanishlar olib borishi mumkin. Dastur tanlangan kurs va yo'nalishga qarab 1 oydan 10 oygacha davom etadi. Shu muddatda ishtirokchilar o'qish to'lovlaridan ozod etiladi, oylik stipendiya va yo'l xarajatlari uchun mablag' bilan ta'minlanadi. 

Dasturda qatnashish uchun nomzodlar quyidagi talablarga javob berishi lozim:

• Nomzodlar bakalavr, magistratura, doktorantura bosqichida o'qiyotgan bo'lishi kerak. Bakalavr bosqichining kamida 2.5 yilini tugallagan bo'lishi shart;
• Universitet o'qituvchilari, tadqiqotchi olimlar ham dasturda qatnashishi mumkin;
• Slovakiya universitetlarining biriga almashinuv dasturi uchun qabul qilingan bo'lishi kerak;
• Ingliz yoki slovak tilini yaxshi bilishi lozim.

Talablar haqida batafsil ushbu havola orqali bilib olishingiz mumkin.

Dasturga qabul qilinganlar quyidagi imtiyozlarga ega bo'ladi:

• Yashash xarajatlari uchun oylik stipendiya:
  • Bakalavr va magistratura talabalari uchun €400;
  • PhD talabalari uchun €734;
  • Universitet o'qituvchilar va tadqiqotchilar uchun daraja va ish tajribasiga qarab €734 dan €1050 gacha;
• Yo'l xarajatlari uchun moddiy yordam. Bunda masofaga qarab €250 dan €1000 gacha mablag' beriladi;
• Tanlagan kurs va yo'nalishiga qarab Slovakiyaning quyidagi universitetlari yoki tadqiqot markazlarida 1 oydan 10 oygacha bepul o'qish yoki tadqiqot olib borish imkoniyatiga ega bo'lishlari mumkin.

Dasturning manfaatlari tomonlari haqida batafsil ushbu havola orqali ma'lumot olishingiz mumkin.

Dasturga qatnashish uchun avval onlayn ro'yxatdan o'tiladi. Ma'lumotlar to'ldirilib, kerakli hujjatlar joylanadi. Kerakli hujjatlar:

• CV/ tarjimayi hol;
• Motivatsion xat;
• Study program, ya'ni qachon va qancha muddat Slovakiyada bo'lishi, u yerda nimalar qilishi batafsil yozilgan bo'lishi kerak;
• Universitet o'qituvchilaridan 2 ta tavsiyanoma;
• Universitetda o'qiyotganligi haqida ma'lumotnoma;
• Diplom yoki semester baholari va tarjimasi;
• Admission/Invitation letter, ya'ni tanlagan universitetiga almashinuv dasturi uchun qabul qilinganligi haqida xat;
• PhD talablari, universitet o'qituvchilari va tadqiqotchilar uchun: chop etilgan ilmiy ish va maqolalar ro'yxati.

Barcha hujjatlar ingliz yoki slovak tilida berilgan bo'lishi shart. Ariza topshirish jarayoni va kerakli hujjatlar haqida batafsil ushbu havoladan ma'lumot olishingiz mumkin.

Avvalgi yillarda dasturga qabul qilinganlar ro'yxati bilan ushbu havola orqali tanishib chiqishingiz mumkin.

Nomzodlar muvaffaqiyatli ariza topshirishlari uchun ushbu tiplardan foydalanishi tavsiya etiladi.

Qo'shimcha savol va murojaatlar uchun: nsp-foreign@saia.sk 

Tel: +421-2-5930 4733