Talabalar, professor va tadqiqotchilar uchun Slovakiyada toʻliq grant asоsida oʻqish va tadqiqot olib borish imkoniyati — The National Scholarship Programme of the Slovak Republic (NSP) almashinuv dasturi

Slovakiya hukumati butun dunyo boʻylab boshqa universitetlar bilan xalqaro aloqalarni yoʻlga qoʻyish, qolaversa, kuchli bilim va salohiyatga ega talabalarni shu yerda oʻqishga, professor va tadqiqotchilarni esa ilmiy ish olib borishga ruhlantirish maqsadida The National Scholarship Program of the Slovak Republic almashinuv dasturini joriy etgan.

Dasturga har yili 2 marta ariza topshirish imkoniyati mavjud:

• Kuzgi mavsum — har yili 31-oktyabr sanasigacha;
• Bahorgi mavsum — har yili 30-aprel sanasigacha.

Hozirda kuzgi mavsum uchun qabul davom etmoqda.

Dastur davomida ishtirokchilar Slovakiya universitetlaridan birida bepul oʻqishi, tadqiqotchilar esa ilmiy izlanishlar olib borishi mumkin. Dastur tanlangan kurs va yoʻnalishga qarab ingliz yoki slovak tilida 1 oydan 10 oygacha (talabalar uchun 3 oydan 10 oygacha) davom etadi. Shu muddatda ishtirokchilar oʻqish toʻlovlaridan ozod etiladi, oylik stipendiya va yoʻl xarajatlari uchun mablagʻ bilan taʼminlanadi.

Grant haqidagi maʼlumotlar bilan GrantGO tomonidan tayyorlangan quyidagi video/ovozli chat orqali ham tanishish mumkin:

Dasturda qatnashish uchun nomzodlar quyidagi talablarga javob berishi lozim:

• Nomzodlar bakalavr, magistratura, doktorantura bosqichida oʻqiyotgan boʻlishi kerak;
• Bakalavr talabalari uchun qo'yilgan talablar:
  • Bakalavr bosqichining kamida 2.5 yilini tugallagan boʻlishi shart;
  • Slovakiya universitetlarining biriga almashinuv dasturi uchun qabul qilingan boʻlishi kerak.
• Doktorantura talabalari Slovakiya oliygohlaridan birida o'qish yoki tadqiqot markazida ilmiy ish olib borish uchun qabul qilingan bo'lishi kerak;
• Universitet oʻqituvchilari, tadqiqotchi olimlar Slovakiya oliygohlarida dars berish yoki berilgan tadqiqot markazlarida (biznes kompaniyalaridan boshqa) tadqiqot olib borish uchun taklif xati olgan bo'lishi lozim;
• Barcha nomzodlar ingliz yoki slovak tilini yaxshi bilishi lozim (Sertifikat shart emas);
• Slovakiyada avval to'liq kunduzgi bosqichida ta'lim olgan yoki hozirda ta'lim olayotgan bakalavr, magistratura yoki doktorantura talabalari dasturda ishtirok eta olmaydi;
• Universitet o'qituvchilari, tadqiqotchi va san'at sohada faoliyat olib boruvchilar PhD (yoki ekvivalent) darajaga, qolaversa 4 yillik tajribaga ega bo'lishi shart. Istisno holatlar mavjud. Batafsil ushbu havola orqali ma'lumot olish mumkin;
• Ariza topshirish vaqtida Slovakiya hududida kamida 3 yildan buyon istiqomat qilayotgan nomzodlar dasturda ishtirok eta olmaydi;
• Boshqa dasturlar, jumladan, ERASMUS+, International Visegrad Fund, CEEPUS kabi dasturlar bo'yicha stipendiya olayotgan talabalar ham ushbu dasturga ariza topshira olmaydi;
• Dasturning avvalgi bosqichlarida g'olib bo'lgan nomzodlar kamida 2 yil o'tib ariza topshirishlari mumkin. 

Talablar haqida batafsil ushbu havola orqali bilib olishingiz mumkin.

Dasturga qabul qilinganlar quyidagi imtiyozlarga ega boʻladi:

• Yashash xarajatlari uchun oylik stipendiya:
  • Bakalavr va magistratura talabalari uchun €620;
  • PhD talabalari uchun €1025.50;
  • Universitet oʻqituvchilar va tadqiqotchilar uchun daraja va ish tajribasiga qarab €1025.50 dan €1470 gacha;
• Yoʻl xarajatlari uchun moddiy yordam. Bunda masofaga qarab €250 dan €1500 gacha mablagʻ beriladi. Oʻzbekistonliklar uchun €750;
• Dastur ishtirokchilar Slovakiyaga borganda tibbiy ko'rikdan o'tkaziladi va bunga ham mablag' ajratiladi;
• Tanlagan kurs va yoʻnalishiga qarab Slovakiyaning universitetlari yoki tadqiqot markazlarida 1 oydan 10 oygacha bepul oʻqish yoki tadqiqot olib borish imkoniyatiga ega boʻlishlari mumkin.

Dasturning manfaatlari tomonlari haqida batafsil ushbu havola orqali maʼlumot olishingiz mumkin.

Dasturga qatnashish uchun avval onlayn roʻyxatdan oʻtiladi. Maʼlumotlar toʻldirilib, kerakli hujjatlar joylanadi. Kerakli hujjatlar:

• CV/ tarjimayi hol;
• Motivatsion xat;
• Study program, yaʼni qachon va qancha muddat Slovakiyada boʻlishi, u yerda nimalar qilishi batafsil yozilgan boʻlishi kerak;
• Universitet oʻqituvchilaridan 2 ta tavsiyanoma;
• Universitetda oʻqiyotganligi haqida maʼlumotnoma;
• Diplom yoki semestr baholari va tarjimasi;
• Admission/Invitation letter, yaʼni tanlagan universitetiga almashinuv dasturi uchun qabul qilinganligi haqida xat;
• PhD talablari, universitet oʻqituvchilari va tadqiqotchilar uchun qo'shimcha chop etilgan ilmiy ish va maqolalar roʻyxati va batafsil yozilgan tadqiqot rejasi taqdim etishlari talab etiladi;

Barcha hujjatlar ingliz yoki slovak tilida berilgan boʻlishi shart. Ariza topshirish jarayoni va kerakli hujjatlar haqida batafsil ushbu havola orqali maʼlumot olish mumkin.

Avvalgi yillarda dasturga qabul qilinganlar roʻyxati bilan ushbu havola orqali tanishib chiqish mumkin.

Nomzodlar muvaffaqiyatli ariza topshirishlari uchun ushbu tiplardan foydalanishi tavsiya etiladi. Natijalar dastur boshlanishidan kamida 6 hafta oldin (bahorgi mavsum uchun yanvar oyining oxiriga qadar) eʼlon qilinadi.

Qoʻshimcha savol va murojaatlar uchun: nsp-foreign@saia.sk

Tel: +421-2-5930 4733
Dastur haqida suhbat: