Barcha professional va havaskor musiqachilar uchun AQShda xarajatlari qoplanadigan rezidentlik dasturi — OneBeat Program

OneBeat — bu AQSh Davlat Departamentining Taʼlim va Madaniyat Masalalari Byurosi tashabbusi boʻlib, Nyu-Yorkdagi Found Sound Nation tashkiloti tomonidan tashkil etilgan xalqaro almashinuv va rezidentlik dasturi.

OneBeat Virtual dasturi 2025-yil uchun jami 50 ta mamlakat va hududlardan 25 nafar eng iqtidorli professional/havaskor musiqachi, qoʻshiqchi va bastakorlarni tanlab oladi. Dastur 2025-yil aprel/may oylarida boʻlib oʻtadi.

Ushbu davr mobaynida ishtirokchilar hamkorlikning yangi shakllarini oʻrganadi, musiqa olamidagi mavjud janrlar bilangina cheklanib qolmay, yangi va noodatiy janrlardagi musiqalarni bastalash, kuylash, yozish, va ishlab chiqarish uchun ansambllar tuzadi, virtual mahorat darslarida qatnashadi, ochiq studiyalar, onlayn seminarlarda ishtirok etadi va omma uchun striming konsert tashkil qiladi. Shuningdek, dastur ishtirokchilari nafaqat musiqa yaratish bilan shugʻullanadi, balki musiqa orqali jamiyatdagi dolzarb mavzular doirasida turli ijtimoiy muammolarga yechim topishni ragʻbatlantiruvchi loyihalar ustida ishlash imkoniyatiga ega boʻladi

Dasturga har qanday soha vakili boʻlgan ammo musiqa yaratish/bastalash/kuylashga qiziquvchi va kuchli iqtidor egasi boʻlgan, jamiyatda faol boʻlgan, ijtimoiy mavzularga befarq boʻlmagan barcha professional va havaskor musiqachilar taklif etiladi.

Dastur ingliz tilida olib boriladi, shu sababli ishtirokchilardan ingliz tilini yetarli darajada bilishi talab etiladi. Shuningdek, dasturda toʻliq ishtirok etish uchun barqaror internet aloqasi va kerakli texnik jihozlarga (kameraga ega boʻlgan telefon, kompyuter va b.) ega boʻlishi lozim.

Tanlovda ishtirok etish talablari:

• Nomzodlar 19-35 yosh oraligʻida boʻlishi kerak;
• Koʻrsatilgan davlatlarda doimiy istiqomat qilishi va fuqaroligiga ega boʻlishi kerak (Oʻzbekiston ham roʻyxatga kiritilgan);
• Mutaxassislik sohasidan qatʼi nazar, professional yoki havaskor musiqachilar/bastakorlar/qoʻshiqchilar ishtirok etishi mumkin;
• Barqaror internet aloqasiga va onlayn mashgʻulotlarda ishtirok eta olish uchun ayrim texnik jihozlarga ega boʻlishi lozim (telefon, kompyuter, planshet va b);
• Ingliz tilini yetarli darajada bilishi lozim.

Tanlovda ishtirok etish talablari va shartlari bilan ushbu havola orqali batafsil tanishib chiqish mumkin.

Dasturi taqdim etadigan imtiyozlar:

• Dasturga qatnashish bilan bog’liq barcha xarajatlar: AQShga borish va kelish, turarjoy xarajatlari qoplanadi;
  Tanlangan nomzodlarga $600 miqdoridagi gonorar beriladi;
• Onlayn mashgʻulotlarda ishtirok etish uchun qoʻshimcha mablagʻ taqdim etiladi.
• Butun dunyo boʻyicha tanlab olingan 25 nafar ishtirokchilar bilan birgalikda hamda soha mutaxassislari bilan musiqa sanʼatining yangi koʻrinishlarini kashf etish va yirik loyiha ustida ishlash imkoniyatiga ega boʻladi.

Tanlovda ishtirok etish uchun onlayn tarzda roʻyxatdan oʻtish va kerakli hujjatlarni taqdim etish lozim (ingliz tilida).

Ayrim kerakli hujjatlar:

• CV/Resume (ingliz tilida);
• Tavsiyanoma (2tagacha). Tavsiyanomalar nomzodning musiqa boʻyicha mentori yoki ustozidan boʻlishi mumkin.
• Nomzodlardan musiqiy ijod namunalari soʻraladi;
• Nomzodning musiqiy faoliyati va kuylagan/bastalagan/chalgan musiqasini ijro etganini aks ettirgan video yoki audio;
• Onlayn ariza topshirish jarayonida nomzodlardan ularning musiqa sohasiga boʻlgan qiziqishi, tajribasi, ijodkorlik va jamoada ishlash qobiliyati, avval ishtirok etgan loyihalari, musiqa orqali jamiyatga qanday foyda keltirgani va boshqalar haqida maʼlumotga ega boʻlish maqsadida bir nechta savollar soʻraladi. Har bir savollarga taqdim etiladigan javoblar 150 soʻzdan oshmasligi lozim.

Ariza berishdan avval tez-tez soʻraladigan savollar(FAQs) boʻlimi bilan tanishib chiqish lozim.

Tez-tez soʻraladigan savollar boʻlimi — FAQs.

Qoʻshimcha savol va murojaatlar uchun: apply@1beat.org