Belgiyada magistratura bosqichida o'qish uchun Ghent universitetidan Top-up Grants grant dasturi; oylik stipendiya - €1000

Top-up Grants — Belgiyaning yetakchi universitetlaridan biri boʻlgan Ghent Universitetida ingliz tilida oʻqitiladigan magistrlik va ikkinchi magistrlik darajalarida tahsil olmoqchi boʻlgan xorijiy talabalar uchun grant dasturi.

Grant uchun alohida hujjat topshirish talab etilmaydi. Grant universitetda magistrlik darajasi, ikkinchi magistrlik darajasi dasturlariga hujjat topshirgan va qabul qilingan talabalar orasidan eng iqtidorli talabalarga taqdim etiladi.

2022-2023-oʻquv yili uchun jami 10 nafar talaba grant sohibi sifatida tanlab olinadi.

Universitetdagi magistrlik darajasi dasturlari va yoʻnalishlari bilan ushbu havola orqali toʻliq maʼlumot olish mumkin.

• Nomzod magistrlik darajasida oʻqish uchun bakalavr darajasi diplomiga ega boʻlishi kerak; Ikkinchi magistrlik darajasida oʻqish uchun magistrlik darajasi diplomiga ega boʻlishi kerak;
• Nomzod OESO-DAC roʻyxatidagi mamlakatlardan birining fuqaroligiga ega boʻlishi kerak (Oʻzbekiston ham kiradi);
• Nomzod tanlagan yoʻnalishidagi dastur talablariga mos kelishi va qabul qilingan boʻlishi lozim;
• Ingliz tilini yaxshi bilishi kerak. Til bilish talablari yoʻnalishlarga qarab oʻzgarishi mumkin (minimum 6.5).

2022-2023-oʻquv yili uchun jami 10 ta grant ajratilgan.

Grant quyidagi xarajatlarni qoplaydi:

• Oylik stipendiya — €1000;
• Barcha sugʻurta xarajatlari (tibbiy, fuqarolik javobgarligi, repatriatsiya)

Grantga ega boʻlgan nomzodlar uchun universitetda tanlagan yoʻnalishidagi oʻqish toʻlovi Yevropa Iqtisodiy Hududi (YIH)ga kiruvchi davlat fuqarolari boʻlgan talabalar toʻlaydigan miqdorga tushiriladi/tenglashtiriladi. Yaʼni, talaba €1847 dan €5867 gacha boʻlgan odatiy miqdorda emas, balki €947 (YIH dan boʻlgan talabalar uchun) miqdoridagi oʻqish toʻlovini toʻlashi kerak boʻladi.

Muhim: Parvoz chiptalari va viza olish xarajatlari grant dasturi ichiga kirmaydi.

Grant dasturi uchun alohida hujjat topshirish talab etilmaydi.

Universitetda mavjud ingliz tilida oʻqitiladigan magistrlik darajasi har bir dasturlari boʻyicha hujjat topshirgan talabalar orasidan eng iqtidorli 3 nafar talabalar grantga tavsiya etiladi va yakunda 10 nafar talabaga grant taqdim etiladi.

Grantga nomzodlik qilish uchun, magistrlik dasturlariga ariza toʻldirayotganda, “Finanacial Means” > “Scholarship” > “Top-up Grants” boʻlimlari ketma-ketligi tanlanishi lozim.

Universitetdagi barcha magistrlik dasturlari va ikkinchi magistrlik dasturlari bilan tanishib chiqish va tanlangan dasturga oid boʻlgan barcha talablar bilan tanishib chiqish tavsiya etiladi.

Ayrim kerakli hujjatlar:

• Avvalgi daraja diplomi va ilovasi nusxasi (tarjima idorasida qilingan golland, fransuz, nemis yoki ingliz tilidagi tarjimasi bilan);
• Xorijga chiqish uchun moʻljallangan pasport nusxasi (qizil pasport);
• Til bilish sertifikati.

Ushbu havola orqali hujjat topshirish jarayonlari, talablari, kerakli hujjatlar haqida batafsil maʼlumot olish mumkin.

Grant dasturi boʻyicha savol va murojaatlar uchun: developmentcooperation@UGent.be

Magistrlik darajasi dasturlariga qabul boʻyicha savol va murojaatlar uchun: admission@UGent.be

Tanlov natijalari 2022-yil may oyida eʼlon qilinadi.

Grant uchun nomzodlar quyidagi mezonlarga koʻra tavsiya etiladi:

• Nomzodning akademik yutuqlari;
• 40 yoshdan kichik boʻlgan nomzodlar afzal koʻriladi;
• Nomzod tanlagan magistrlik dasturi oʻz mamlakati (Oʻzbekiston) uchun ahamiyati;
• Nomzodning oladigan bilim va koʻnikmalarini oʻz mamlakatiga qaytgach qoʻllay olishi.