Birlashgan Millatlar Tashkilotidan 14-35 yosh oraligʻidagilar uchun hududiy yoshlar tanlovi — UNODC ROCA Regional Youth Competition

Birlashgan Millatlar Tashkilotining Giyohvand moddalar va jinoyatchilik boʻyicha boshqarmasi (UNODC) Markaziy Osiyo davlatlaridan (Qozogʻiston, Qirgʻiziston, Tojikiston, Turkmaniston va Oʻzbekiston) 14-35 yosh oraligʻidagilar uchun hududiy yoshlar tanlovini — UNODC ROCA Regional Youth Competition taqdim etadi. Tanlov xalqaro giyohvandlikka qarshi kurash kuni munosabati bilan oʻtkazilmoqda.

Har bir yoʻnalish boʻyicha mintaqaning 5 ta davlatidan 1 nafardan gʻolib aniqlanadi. Gʻoliblarga giyohvandlikdan holi jamoalarni ijodiy himoya qilishni qoʻllab-quvvatlovchi qimmatli vositalar taqdim etadi.

Tanlov mavzusi: “The evidence is clear: invest in prevention”.

Dasturdan asosiy maqsad yoshlarga oʻzlarining ijodkorlik qobiliyati, ishtiyoqi va fidokorligi orqali ijobiy oʻzgarishlarni amalga oshirishi, barqaror va giyohvandlikdan holi jamiyat qurishga hissa qoʻshishi uchun imkoniyat yaratishdan iborat. Tanlov Markaziy Osiyo boʻylab yoshlarni ijodiy va innovatsion yechimlar orqali giyohvandlik va noqonuniy savdo bilan bogʻliq koʻp qirrali muammolarni hal qilishga jalb etishga qaratilgan.

Tanlovda quyidagi yoʻnalishlar boʻyicha qatnashish mumkin:

1. Written (yozma): Ocherk, tadqiqot ishlari, maqola, sheʼr, hikoya va boshqa koʻrinishdagi yozma ishlar (maksimal 1000 ta soʻz);
2. Audio-Visuals (audio-vizual): Video, podkast, multimedia taqdimotlari va hokazo (maksimal 2 daqiqa);
3. Visuals (vizual/tasvir): Sanʼat asari, fotografiya, raqamli illyustratsiya, grafik dizayn, plakat va boshqa koʻrinishdagi tasvirlar (maksimal 3 dona).

Dastur haqida batafsil ushbu havola orqali maʼlumot olish mumkin.

• Tanlovda 14-35 yosh oraligʻidagi Markaziy Osiyo davlatlaridan boʻlgan fuqarolar qatnashishi mumkin (Oʻzbekiston roʻyxatda bor);
• Ingliz yoki rus tilini dasturda qatnashish darajasida bilish lozim;
• Nomzodlar giyohvand moddalarni isteʼmol qilishning oldini olish boʻyicha yangicha gʻoya va yechim taqdim etishlari kerak.

Taqdim etiladigan ishlarga qoʻyilgan talablar:

1. Ishlar sunʼiy intellektdan foydalanmasdan, faqat ishtirokchi tomonidan yaratilgan original boʻlishi kerak.
2. Materiallar ingliz yoki rus tillarida boʻlishi lozim.
3. Ishlar boshqa joyda nashrga taqdim etilmagan boʻlishi shart.
4. Nomzod yaratilgan ish boʻyicha toʻliq mualliflik huquqiga ega boʻlishi talab qilinadi.
5. Ishning asosi, maqsadi va gʻoyasini koʻrsatuvchi qisqacha xulosa ilova qilinishi kerak.

Talabgorlar amal qilishi kerak boʻlgan koʻrsatmalar:

1. Taqdim etilgan materiallar giyohvand moddalarni isteʼmol qilishning oldini olish boʻyicha aniq va toʻgʻri xabarlarni taqdim etishi kerak.
2. Noaniq iboralardan qochish (masalan: “Giyohvand moddalarga yoʻq” va hokazo) hamda giyohvandlikning oldini olishni har tomonlama tushunishga hissa qoʻshadigan maxsus strategiya, harakat va xabarlarni ifoda etish lozim.
3. Ishlar tanlov mavzusini (The evidence is clear: invest in prevention) yoritishi va “Yoshlar oʻrtasida giyohvandlikning oldini olishga qanday qilib ijodiy hissa qoʻshishlari mumkin?” degan savolga javob berishi talab qilinadi.
4. Giyohvand moddalarni isteʼmol qilishning oldini olish boʻyicha yangicha fikrlash va yoshlarga yoʻnaltirilgan amaliy yondashuvlarni aks ettiruvchi ijodiy yechimlarni taklif qilish kerak.

• Dasturda bepul qatnashish mumkin;
• Gʻoliblarga planshet, naushnik va dinamikalar (tovush uzatuvchi qurilma) taqdim etiladi.

Dasturda qatnashishni istaganlar ushbu havola orqali ariza topshirishlari mumkin.

Hujjat topshirishda quyidagilar soʻraladi:

• Shaxsiy maʼlumotlar;
• Topshiriladigan ish turi (yozma, audio-vizual, vizual);
• Nomzod taqdim etadigan ish nomi;
• Ishning asosi, maqsadi va undan kutilayotgan natijalarni koʻrsatuvchi qisqacha xulosa (150-300 ta soʻz);
• Ishning original va boshqa joyda nashr etish uchun taqdim etilmaganligini tasdiqlash;
• Taqdim etilgan ishlar boʻyicha toʻliq mualliflik huquqiga ega ekanlikni tasdiqlash;
• Tanlovning barcha qoidalariga rioya qilishga roziligi va agar qoidalarni buzgan taqdirda tanlovdan chetlatilishini bilishini tasdiqlash;
• Ish Google Drive orqali yuklanadi va havolasi taqdim etiladi.

Eslatma: Arizani ingliz yoki rus tilida toʻldirish mumkin.

• Dasturga hujjat topshirish uchun oxirgi muddat: 31-iyul, 2024-yil;
• Yakuniy natija va gʻoliblar roʻyxati 12-avgust Xalqaro yoshlar kunida eʼlon qilinadi.