Bishkekdagi OSCE akademiyasidan loyiha boshqaruvi boʻyicha barcha xarajatlari qoplanadigan 5 kunlik trening
-
01/06/2023 Qabul boshlanishi
-
Toʻliq Moliyalash turi
-
Qirgʻiziston Davlat
-
24/06/2023 23:00 Oxirgi muddat
Umumiy maʻlumotlar
Qirgʻizistonning Bishkek shahrida joylashgan OSCE akademiyasi xalqaro tashkilotlar, xalqaro taraqqiyot tashkilotlari, xalqaro nodavlat (notijorat) tashkilotlari, davlat va jamoat institutlarining mutaxassislari uchun loyiha boshqaruvi boʻyicha 2023-yil 7-avgustdan 11-avgustgacha oʻtkaziladigan bepul trening taqdim etadi. Ushbu treningda loyihalarning asoslari hamda uning boshlanishidan to yakunlash va yetkazib berishgacha boʻlgan jarayoni koʻrib chiqiladi. Trening davomida ishtirokchilar quyidagi imkoniyatlarga ega boʻlishlari mumkin:
- Loyiha va uning asoslarini batafsil oʻrganish;
- Muvaffaqiyatli loyihalarni samarali boshqarish va amalga oshirish uchun amaliy koʻnikmalarga ega boʻlish;
- Soha boʻyicha professional malakaga ega mutaxassislar bilan fikr almashish.
Trening dunyoning yetakchi tashkilotlarida 22 yildan ortiq konsalting tajribaga ega, biznes va loyiha boshqaruvi boʻyicha 15 yildan beri maʼruza berib kelayotgan doktor Valid Guma tomonidan olib boriladi.
Maʼlumot uchun: OSCE akademiyasi 2002-yilda Qirgʻizistonda Yevropa Xavfsizlik va Hamkorlik Tashkiloti (YeXHT) va Qirgʻiziston Respublikasi oʻrtasidagi hamkorlik shartnomasi asosida tashkil etilgan jamoat fondidir. Ushbu akademiya oliy oʻquv yurtidan keyingi taʼlim, kasbiy tayyorgarlik va intellektual almashinuv orqali mintaqaviy hamkorlikni rivojlantirishga koʻmaklashadi, mojarolarning oldini olish va Markaziy Osiyoda samarali boshqaruvni qoʻllab-quvvatlaydi. Akademiya “Iqtisodiy boshqaruv va taraqqiyot”, “Siyosat va xavfsizlik” yoʻnalishlari boʻyicha magistrlik dasturlarini taqdim qiladi, yoʻnalish boʻyicha mutaxassislar tayyorlaydi va talablarga asoslangan holda tadqiqotlar olib boradi.
Dastur haqida batafsil ushbu havola orqali maʼlumot olish mumkin.
Maqbullik shartlari
- Nomzodlar Qirgʻiziston, Qozogʻiston, Oʻzbekiston, Turkmaniston, Moʻgʻuliston yoki Qirgʻiziston hududida istiqomat qilayotgan Afgʻoniston va Tojikiston fuqarolari boʻlishi lozim;
- Bakalavr yoki magistr darajasiga ega boʻlish kerak;
- Ingliz tilini yaxshi bilish talab qilinadi (sertifikat soʻralmaydi);
- Nomzodlar professional faoliyatini boshlayotgan boʻlishi yoki xalqaro tashkilotlar, xalqaro taraqqiyot tashkilotlari, xalqaro nodavlat (notijorat) tashkilotlari, davlat va jamoat tashkilotlarida 5-7 yildan ortiq boʻlmagan professional tajribaga ega boʻlishi lozim;
- Taklif etilgan ishtirokchilar dasturda toʻliq ishtirok etishlari, barcha oʻquv tadbirlarini yakunlashlari va trening davomida sezilarli yutuqlarga erishishlari talab qilinadi.
Foydali tomonlari
- Ishtirokchilar treningda bepul ishtirok etishlari mumkin;
- Barcha sessiyalarning kamida 95 foizida qatnashgan va barcha topshiriqlarni, shu jumladan, yakuniy imtihonni muvaffaqiyatli topshirgan ishtirokchilarga sertifikat beriladi;
- Sayohat va viza xarajatlari qoplanadi;
- Aeroport transferi bilan taʼminlanadi;
- Trening oxirida ishtirokchilar quyidagi bilim va koʻnikmalarga ega boʻlishadi:
- Loyiha boshqaruvi va uning turli ish muhitlaridagi ahamiyatini yaxlit tushunish;
- Vaqt, resurslar, xarajat hamda loyihaning muvaffaqiyati va muvaffaqiyatsizligi sabablarini barqarorlashtirishni oʻrganish;
- Loyiha rejalarini yaratish;
- Loyihaning byudjet rejalarini tuzish;
- Loyiha rejalarini bajarish va boshqarishni oʻrganish.
Maʼlumot uchun: Aeroport transferi — yoʻlovchilarni yuklari bilan birga aeroportdan istalgan boshqa joyga yoki boshqa joydan aeroportga olib borish uchun bir tomonlama transport xizmati.
Qoʻshimcha maʻlumotlar
- Saralangan nomzodlar 2023-yil 7-iyulgacha tanlanadi va xabardor qilinadi;
- Tel: +996 (312) 54-32-00;
- Faks: +996 (312) 54-23-13.