“Boʻlajak olim” tanlovi doirasida innovatsion startap loyihalarni moddiy qo'llab quvvatlash dasturi

O'zbekiston Respublikasi Innovatsion Rivojlanish vazirligi “Bo'lajak olim” tanlovi doirasida innovatsion startap loyihalarni moddiy qo'llab quvvatlash dasturini e'lon qiladi.

“Boʻlajak olim” tanlovning asosiy maqsadi – iqtidorli va isteʼdodli yosh olimlarning innovatsion faoliyati natijalari va tashabbuslarini davlat tomonidan qoʻllab-quvvatlash, ularning ilmiy izlanishlari uchun zarur shart-sharoitlarni yaratib berish hamda salohiyatli yoshlarni ilm-fanga keng jalb etishdan iborat.

Mazkur tanlov Oʻzbekiston Respublikasi Vazirlar Mahkamasining “Ilmiy va innovatsion faoliyat bilan shugʻullanib kelayotgan iqtidorli yoshlarni qoʻllab-quvvatlash chora-tadbirlari toʻgʻrisida” 2021-yil 19-apreldagi 222-son qarorining 2-ilovasi “Boʻlajak olim” tanlovini oʻtkazish tartibi toʻgʻrisidagi nizomida belgilangan talablarga muvofiq oʻtkaziladi.

Boʻlajak olim tanlovi doirasida yosh olimlarning:

• Ilmiy gʻoyalari ragʻbatlantiriladi;
• Ilmiy va startap loyihalari moliyalashtiriladi.

Startap loyiha — amalga oshish xavfi yuqori boʻlgan sharoitda yangi mahsulot yoki xizmat turini yaratuvchi innovatsion ishlanmalarning qoʻllanilishi, koʻlami va tez oʻsish surʼati bilan farqlanadigan yangi biznes loyiha. Tanlovdan muvaffaqiyatli o'tgan startap loyihalar moddiy qo'llab quvvatlanadi. 

Topshiriladigan startap loyiha shartlari:

1. Loyiha ijrochilarining yoshi ularning ilmiy darajasi, unvoni, mansabi va ish joyidan qatʼiy nazar 40 yoshdan oshmasligi;
2. 1 ta jamoa 1 ta loyiha bilan ishtirok etishi (jamoa aʼzolari soni 5 nafardan oshmasligi lozim);
3. Startap loyihalarni amalga oshirishning eng koʻp muddati bir yilgacha boʻlishi;
4. Topshirilgan startap loyiha amalga oshirish miqdori Vazirlar Mahkamasining 2021-yil 19-apreldagi 222-sonli Qarorining 2-ilovasi bilan tasdiqlangan Nizomdagi hajmdan oshmasligi.

Boʻlajak olim tanlovi doirasida yosh olimlarning:

• Ilmiy gʻoyalari ragʻbatlantiriladi;
• Ilmiy va startap loyihalari moliyalashtiriladi.

Tanlov doirasida Startap loyihalar boʻyicha takliflar joriy yilning 31-may soat 18:00 ga qadar qabul qilinadi.

Bunda vazirlik tomonidan taqdim etilgan shakllar asosida quyidagi hujjatlar www.yoshlarakademiyasi.uz veb-sahifasining tanlovlar rukni orqali yuklanishi lozim:

1. Tanlovda ishtirok etish uchun ariza (.pdf), jamoa har bir aʼzosining fuqarolik pasporti yoki identifikatsiya ID kartasi nusxasi (.pdf), 3×4 sm oʻlchamdagi oq fondagi 2 dona rangli fotosurati (.jpeg);
2. Startap loyiha maʼlumotnomasi (.pdf);
3. Startap loyihani amalga oshirish uchun xarajatlar smetasi;
4. Startap loyiha biznes rejasi (.pdf);
5. Startap loyiha taqdimoti. (7 slayddan oshmasligi, startap loyiha mazmuni toʻliq yoritilgani) (.pdf).

• Taqdim etilgan ilmiy gʻoya hamda startap loyihalar tanlov talablariga qatʼiy rioya qilinganligi, loyiha materiallarining ishonchliligi va haqqoniyligi, koʻchirmachilikka (plagiat) yoʻl qoʻyilmaganligi, belgilangan talablar asosida shakllantirilganligi boʻyicha dastlabki texnik ekspertizadan oʻtkaziladi;
• Dastlabki texnik ekspertizadan oʻtmagan loyihalar tanlovning keyingi bosqichiga tavsiya etilmaydi;
• Taqdim etilgan loyihalardagi maʼlumotlarning haqqoniyligi va ishonchliligi, tanlov dasturlari vazifalarida belgilangan, kutilayotgan natijalarni toʻla va oʻz vaqtida sifatli bajarilishiga ilmiy gʻoya hamda startap loyiha mualliflari shaxsan javobgar hisoblanadi.

Loyihalarni topshirish bilan bogʻliq texnik masalalar boʻyicha www.yoshlarakademiyasi.uz saytiga yoki quyidagi telefon raqamiga murojaat qilishingiz mumkin:

• (71) 203-32-23 (233)