CBU Coding Challenge 2025 – model tuzish musobaqasi

Oʻzbekiston Respublikasi Markaziy banki tomonidan Boston Consulting Group xalqaro konsalting kompaniyasi hamkorligida va Oʻzbekiston Respublikasi Raqamli texnologiyalar vazirigi, IT-park hamda Amity universiteti koʻmagida qarz oluvchilarning kredit toʻlovi qobiliyatini baholash va “defolt” holatini taxmin qilishga asoslangan model tuzish musobaqasi tashkil etilmoqda.

Tanlovning asosiy maqsadi muqobil skoring modelini ishlab chiqish doirasida maʼlumotlar bilan ishlash va modellar qurish sohasidagi yosh mutaxassislarni topish, ularni stajirovkaga va keyinchalik ishga jalb qilishdan iborat.

Tanlovda 18 yoshdan katta 4-kurs talabalari, oliy taʼlim va maxsus oʻquv markazlari bitiruvchilari qatnashish vakolatiga ega. Qatnashuvchilar 18 yoshdan oshgan 3-5 kishilik jamoa tuzishlari kerak boʻladi. Dastur oʻzbek, rus va ingliz tillarida oʻtkaziladi. Tanlovda Markaziy bankning 300 000 000 soʻm miqdorida mukofot fondi belgilangan.

Tanlov 15-16-noyabr kunlari Toshkent shahrida boʻlib oʻtadi, tanlovda qatnashish uchun 10-noyabrgacha roʻyxatdan oʻtish mumkin.

Tanlov haqida ushbu havola orqali batafsil maʼlumot olish mumkin.

Tanlovda quyidagi nomzodlar uchtadan beshtagacha jamoa tashkil etib ishtirok etishiga ruxsat etiladi:

• 18 yoshga toʻlgan;
• matematika yoki statistika yoʻnalishida mutaxassislikka va/yoki matematika va statistika boʻyicha chuqur bilimga ega;
• katta maʼlumotlar bazasi bilan ishlash usullarini tushunish, gipotezalarni tuzish va tekshirish koʻnikmasiga ega;
• maʼlumotlarni tahlil qilish, modellashtirish va prognozlash boʻyicha tajribaga ega;
• oliy taʼlim muassasalarining 4-bosqich talabalari;
• oliy taʼlim muassasalari yoki ITga ixtisoslashtirilgan oʻquv markazlari bitiruvchilari.

Tanlovning quyidagi foydali jihatlari mavjud:

• Tanlovning barcha ishtirokchilariga Markaziy bankning sertifikatlari taqdim etiladi;
• Gʻoliblar Markaziy bank jamoasining yangi aʼzolari boʻlish imkoniyatiga ega boʻladilar;
• Tanlovda Markaziy bankning 300 000 000 soʻm miqdorida mukofot fondi belgilangan. Tanlovning gʻolib va sovrindorlari quyidagi tartibda mukofot pullari bilan taqdirlanadilar:

-1-oʻrin — 150 000 000 soʻm;

-2-oʻrin — 100 000 000 soʻm;

-3-oʻrin — 50 000 000 soʻm.

• Tanlov 15-16-noyabr kunlari Toshkent shahrida boʻlib oʻtadi;
• Dasturda qatnashish uchun 10-noyabrgacha roʻyxatdan oʻtish mumkin;
• Tanlovning arizalarni saralash bosqichidan oʻtgan nomzodlardan iborat yakuniy ishtirokchilar roʻyxati Tashkiliy qoʻmita tomonidan shakllantiriladi.

Tanlovga arizalar ushbu havola orqali qabul qilinadi.

• Tanlov arizalarni saralash va bellashuv bosqichlarida oʻtkaziladi;
• Saralash bosqichida tashkiliy qoʻmita tomonidan arizachilarning Tanlovda ishtirok etish uchun munosibligi tekshirilib, yakuniy ishtirokchilar roʻyxati shakllantiriladi.
• Ishtirokchilarning yakuniy roʻyxatini shakllantirish uchun ulardan qoʻshimcha hujjatlar (sertifikat, diplom, yoki loyihalari doirasida tajribasi toʻgʻrisidagi maʼlumotlar) talab etilishi mumkin. Tanlov 15-16-noyabr kunlari 2 kun davomida oʻtkaziladi.
• Tanlovning birinchi kunida ochilish marosimi, vazifa bilan tanishtiruv, ishtirokchilarga mentorlik koʻmagi boʻlib oʻtadi.
• Tanlovning ikkinchi kunida vazifani yakunlash, taqdimot oldidan kodlarning sifat tekshiruvi, taqdimotlarni tayyorlash va taqdim qilish, hakamlar hayʼati tomonidan baholash, gʻoliblarni aniqlash va taqdirlash marosimi oʻtkaziladi.