Chexiyaning Charlz universitetida bakalavr va magistratura bosqichida oʻqish uchun grantlar

25/03/2024 Qabul boshlanishi
Grant Moliyalash turi
Chexiya Davlat
30.04.2024 Oxirgi muddat

Muhim tafsilotlar

Kimlar uchun

Maktab o'quvchilari (yuqori sinflar), O'rta ma'lumotli (maktab/kollej bitiruvchisi), Bakalavr talabasi , Oliy ma'lumotli (bakalavr), Magistr talabasi, Oliy ma'lumotli (magistr), PhD talabasi , Falsafa fanlari doktori
Dastur tili

Ingliz tili
Yosh chegarasi

Chegaralanmagan
IELTS talabi

minimum 6.5

Doʻstlar bilan ulashing

Umumiy maʻlumotlar

Chexiya davlati Charlz universitetining matematika va fizika fakulteti kompyuter fanlariga oid yoʻnalishlarda oʻqish niyatidagi nomzodlarga Computer Science Tuition Fee Scholarship (CSTFS) grantini eʼlon qiladi. Grant bakalavr va magistratura bosqichi uchun ajratilgan boʻlib, ishtirokchilar ingliz tilida oʻqitiladi. Bakalavr bosqichi 3 yil, magistratura bosqichi esa 2 yil davom etadi. Dastur doirasida bakalavr bosqichi uchun 5 ta hamda magistratura bosqichi uchun esa 2 ta oʻrin ajratilgan. Nomzodlar ularning akademik koʻrsatkichlariga qarab saralanadi.

Dastur uchun 4,000 yevrodan 20,400 yevrogacha mablagʻ ajratilgan boʻlib, ushbu mablagʻ ishtirokchilarning kontrakt toʻlovini toʻlab berish uchun ishlatiladi.

Grantga hujjat topshirish jarayoni 2024-yil 30-aprelgacha davom etadi. Hujjatlar berilgan yoʻriqnomaga qarab universitet veb-sahifasi va elektron manziliga joʻnatiladi.

Dastur haqida ushbu havola orqali toʻliq maʼlumot olish mumkin.

Maqbullik shartlari

Dasturda ishtirok etish uchun quyidagi talablar mavjud:

Grant 2024-2025-oʻquv yilidan boshlab Charlz universitetining matematika va fizika fakultetida kompyuter fanlari boʻyicha oʻqish uchun mo'jallangan;
O'qishni bitirgan yoki tamomlash arafasida turganlar ariza berishi mumkin;
Universitetda o'qish talablariga mos kelishi va ariza topshirishi kerak;
Bakalavr hamda magistratura bosqichida oʻqish uchun IELTS 6,5 yoki shunga teng ingliz tilini bilish boʻyicha xalqaro til sertifikati talab qilinadi.

Dastur va til sertifikati talablari haqida ushbu havola orqali batafsil maʼlumot olish mumkin.

Foydali tomonlari

Dasturning quyidagi foydali jihatlari mavjud:

Nomzodlarning tanlagan yoʻnalishi, akademik koʻrsatkichlari va qaysi davlat fuqarosi ekanligiga qarab har yili 4,000 yevrodan 6,800 yevrogacha miqdordagi kontrakt puli to’liq qoplab beriladi. Bu miqdor Yevropa Ittifoqi tarkibiga kiruvchi davlatlardan boʻlgan fuqarolar uchun 4,000 yevro, boshqa davlat fuqarolari uchun esa 6,800 yevroni tashkil etadi;
Bakalavr bosqichida grantni qoʻlga kiritganlarning 2024-2025-oʻquv yilidan boshlab 2026-2027-oʻquv yiligacha boʻlgan, yaʼni 3 yillik kontrakt xarajatlari toʻlab beriladi;
Magistratura bosqichida grantni qoʻlga kiritganlarning 2024-2025 hamda 2025-2026-oʻquv yillari uchun boʻlgan 2 yillik kontrakt xarajatlari toʻlab beriladi.

Hujjat topshirish

Grantga ariza topshirish jarayoni quyidagicha:

Hujjatlarni qabul qilish jarayoni 2024-yil 30-aprelga qadar davom etadi;
Dasturda ishtirok etish uchun avvalambor Charlz universitetining talabalarga axborot berish markazi (Student Information System) tizimida roʻyxatdan oʻtish kerak;
Tizimda roʻyxatdan oʻtilgandan soʻng kerakli bosqich va yoʻnalishni tanlab talab qilingan hujjatlar yuklanadi;

Dastur uchun soʻraladigan hujjatlar roʻyxati quyidagicha:

-CV (rezyume);

-Motivatsion xat;

-Chop etilgan ilmiy ishlar, maqolalar yoki tezislar roʻyxati (agar mavjud boʻlsa);

-Akademik koʻrsatkichlar (baholar transkripti);

-Grantga topshirilgan ariza (qatʼiy bir ariza shakli belgilanmagan, masalan, ism-familiya toʻliq yozilgan va grantga ariza topshirish yoritilgan elektron pochta xabari ham ariza sifatida qabul qilinadi);

-Nomzodning ish joyi yoki oʻqish joyidagi oʻqituvchisi tomonidan yozilgan 2 ta tavsiyanoma;

Barcha hujjatlar ingliz tilida boʻlishi yoki ushbu tilga tarjima qilingan boʻlishi lozim;
Demak, yuqoridagi roʻyxatda keltirilgan hujjatlar talabalarga axborot berish markazi (Student Information System) tizimiga yuklanishi, ariza boʻlsa elektron pochta orqali joʻnatilishi kerak. Yuborilayotgan elektron xabar mavzusi quyidagi shaklda yozilishi zarur: “CSTFS application-ism familiya);
Tavsiyanomalar uni beruvchining shaxsan oʻzi tomonidan admission@matfyz.cuni.cz elektron manziliga “CSTFS recommendation- ism familiya (nomzodniki)“ mavzusi bilan joʻnatilishi lozim.

Eslatma! Oʻqishning oxirgi bosqichida oʻqiyotgan va hali diplomini olmagan nomzodlar, oʻzining oxirgi bosqichda oʻqiyotganini isbotlovchi hujjat taqdim etishi, diplomni esa berilgandan soʻng yuklashi mumkin.

Dastur saralash jarayoni quyidagicha:

Saralash jarayoni Charlz universitetining matematika va fizika fakulteti dekani tomonidan amalga oshiriladi;
Nomzodlarni saralashda ularning akademik koʻrsatkichlari inobatga olinadi;
Grantni bekor qilish yoki gʻoliblarni tanlab olish fakultet dekani tasarrufidadir;
Saralash natijalari 2024-yil 31-mayga qadar eʼlon qilinadi. Gʻolib oʻqishdan bosh tortgan taqdirda grant boshqa nomzodga taklif qilinadi;
Grant faqatgina Charlz universitetida oʻqish uchun ajratilgan boʻlib, boshqa universitetni tanlash yoki oʻqishni koʻchirish imkoni yoʻq;
Qabul qilingan bakalavr talabalaridan 3 yil, magistratura talablaridan esa 2 yil davomida toʻliq vaqtda oʻqish, universitet tomonidan qoʻyilgan talablarini talab darajasida bajarish talab qilinadi. Aks holda nomzodga berilgan grant bekor qilinadi.

Eslatma! Charlz universitetiga hujjat topshirish uchun 1,500 chex krona (taxminan $64) miqdorida badal puli mavjud.

Dasturga ariza va tavsiyanomalarni ushbu havola orqali joʻnatish mumkin.

Dasturga kerakli hujjatlarni ushbu havola orqali yuklash mumkin.

Rasmiy havola Hujjat topshirish