Chexiyaning Charlz universitetida matematika yoʻnalishi bo'yicha magistratura bosqichida oʻqish uchun grant

01/03/2024 Qabul boshlanishi
Bepul ta'lim Moliyalash turi
Chexiya Davlat
30.04.2024 Oxirgi muddat

Muhim tafsilotlar

Kimlar uchun

Bakalavr talabasi , Oliy ma'lumotli (bakalavr)
Dastur tili

Ingliz tili
Yosh chegarasi

Chegaralanmagan
IELTS talabi

minimum 6.5

Doʻstlar bilan ulashing

Umumiy maʻlumotlar

Chexiya Respublikasi Prague Mathematics Tuition Fee Scholarships (PMTFS) grantini eʼlon qiladi. Grant Charlz Universitetining “Matematika va fizika” fakulteti magistratura bosqichida oʻqish uchun moʻljallangan. Dasturda 8 yoʻnalishdan birida oʻqish imkoni mavjud va har bir yoʻnalish uchun 2 tagacha nomzod qabul qilinadi. Magistratura bosqichida oʻqish 2 yil davom etadi.

Dastur uchun ishtirokchilarning akademik koʻrsatkichi va istiqomat qiladigan davlatiga qarab 4,000 yevrodan 20,400 yevrogacha mablagʻ ajratiladi. Yaʼni grantni qoʻlga kiritgan ishtirokchilar kontrakt toʻlovidan toʻliq ozod qilinadi. Universitetning magistratura bosqichiga alohida, grant uchun alohida ariza topshiriladi. Grant uchun ham universitet uchun ham ariza qabul qilish jarayoni 2024-yil 30-aprelgacha davom etadi. Ajratilgan grantlar soni - 16 ta.

Dastur haqida ushbu havola orqali toʻliq maʼlumot olish mumkin.

Maqbullik shartlari

Dasturda ishtirok etish uchun quyidagi talablar mavjud:

Grantga barcha davlat, jumladan, Oʻzbekiston fuqarolari ham ariza topshirishlari mumkin;
Dasturga magistratura bosqichini Charlz Universiteti “Matematika va fizika” fakultetining quyidagi yoʻnalishlardan birida oʻqishni xohlovchilar ariza topshirishlari mumkin:

-Computational Mathematics;

-Financial and Insurance Mathematics;

-Mathematical Analysis;

-Mathematical Structures;

-Mathematics for Information Technologies;

-Probability;

-Mathematical Statistics and Econometrics;

-Mathematical Modelling in Physics and Technology;

Darslar ingliz tilida oʻqitiladi, shuning uchun ham nomzodlardan ingliz tilini bilish va til bilish sertifikati talab qilinadi. Hujjat topshirish jarayonida ingliz tilini bilish boʻyicha IELTS 6,5 ga teng xalqaro sertifikat qabul qilinadi.
Dastur saralash bosqichida nomzodlarni tanlab olish universitet matematika va fizika fakulteti dekani tomonidan amalga oshiriladi. Nomzodlarni saralashda ularning akademik koʻrsatkichlariga alohida eʼtibor qilinadi. Shuning uchun ham ishtirokchilarning akademik koʻrsatkichlari yaxshi boʻlishi kerak;
Nomzodlar ayni damda boshqa grant yoki dastur ishtirokchisi boʻlmasligi lozim;
Ishtirokchilardan belgilangan muddatgacha universitetga ham grantga ham ariza topshirish soʻraladi. Agar nomzod universitetga qabul qilinmasa grant sohibiga ham aylana olmaydi.

Dastur talablari haqida ushbu havola orqali batafsil maʼlumot olish mumkin.

Foydali tomonlari

Dasturning quyidagi foydali jihatlari mavjud:

2 yilgacha magistratura bosqichida o'qish uchun kontrakt puli qoplab beriladi;
Talabalar dunyoning eng nufuzli universitetlari roʻyxatida 248-oʻrinni egallab turgan Charlz universitetida oʻqish imkonini qoʻlga kiritishadi.

Hujjat topshirish

Dasturga ariza topshirish jarayoni quyidagicha:

Universitetning magistratura bosqichiga alohida, grant uchun alohida ariza topshiriladi. Grant uchun ham universitet uchun ham ariza qabul qilish jarayoni 2024-yil 30-aprelgacha davom etadi;
Nomzodlardan avvalambor Student Information System tizimida roʻyxatdan olish soʻraladi. (Roʻyxatdan oʻtish uchun “Create a new application” qismiga kirish kerak);
Soʻngra ishtirokchilar universitetdagi yoʻnalishlardan birini tanlab hujjat topshirishlari kerak;
Universitetga hujjat topshirilgandan keyin grant uchun ham ariza topshiriladi. Grantga ariza topshirish jarayonida quyidagi hujjatlar talab qilinadi:

-CV;

-Motivatsion xat;

-Ilmiy ishlar roʻyxati (agar chop etilgan ilmiy ishlar boʻlsa);

-Diplom ilovasi;

-Grant uchun yozilgan ariza;

-Ish joyi yoki ilmiy rahbar tomonidan berilgan 2 ta tavsiyanoma;

Dastur uchun saralangan nomzodlar 2024-yil may oyi oʻrtalarida onlayn intervyuga chaqiriladi;
Intervyudan muvaffaqiyatli oʻtgan ishtirokchilar 2024-yil 31-mayda eʼlon qilinadi. Agar biror tanlagan nomzod universitetda oʻqishni rad etsa, uning oʻrniga boshqa ishtirokchi tanlab olinadi;
Nomzodlar grant asosida faqatgina Charlz universitetida oʻqishlari mumkin. Oʻqishni boshqa universitetga koʻchirish imkoni yoʻq;
Charlz universitetining magistratura yoʻnalishlaridan biriga ariza topshirish uchun 1500 krona (taxminan $64 dollarga teng) miqdorida badal puli mavjud.

Eslatma! Barcha hujjatlar ingliz tiliga tarjima qilingan boʻlishi kerak. Hujjatlarni pdf formatida yuklash soʻraladi. Grant arizasi ushbu havola orqali “PMTFS application-your name” (your name qismiga ishtirokchilar ism-familiyalarini yozishlari kerak) shaklida nomlab joʻnatiladi. Tavsiyanomani esa toʻgʻridan toʻgʻri ushbu havolaga “PMTFS recommendation – your name” shaklida nomlab joʻnatish kerak boʻladi. Agar ishtirokchilar hali bakalavr diplomini olmagan va universitetning yakuniy bosqichida oʻqiyotgan boʻlishsa, buni tasdiqlovchi hujjat soʻraladi.

Dasturga ariza topshirish jarayoni va talablari haqida ushbu havola orqali maʼlumot olish mumkin.

Rasmiy havola Hujjat topshirish