Dunyoning eng nufuzli universitetlaridan biri Oksford universitetidan magistratura bosqichi uchun Oxford-Pershing Square Graduate Scholarships dasturi. Yillik stipendiya — £20,780

Buyuk Britaniyaning eng nufuzli universitetlaridan biri University of Oxford oliygohi Oksford 1+1 MBA dasturida oʻqishni xohlovchilar uchun Oxford-Pershing Square Graduate Scholarships dasturini taklif qiladi. Dasturda akademik va ijtimoiy jihatdan faol, kuchli bilim va salohiyatga ega boʻlgan nomzodlar ishtirok etishi mumkin.

Dasturga qabul qilinganlar dunyoning eng nufuzli universitetida bepul oʻqish, kuchli professorlar darslari orqali oʻz bilim va tajribalarini oshirish bilan birga dastur davomida yillik stipendiya bilan ham taʼminlanadilar.

Dasturda avvalgi yillarda ishtirok etganlar haqida batafsil ushbu havola orqali maʼlumot olish mumkin.

Dasturda ishtirok etish uchun nomzodlar quyidagi talablarga javob berishi lozim:

• Nomzod ushbu universitetning Oksford 1+1 MBA dasturi talablariga javob berishi va oʻsha dastur uchun hujjat topshirib qabul qilingan boʻlishi kerak;
• Yuqori akademik koʻrsatkichga va GMAT/ GRE sertifikati yoki boshqa mukofotlarga ega boʻlishi lozim;
• Kuchli yetakchilik qobiliyatiga ega boʻlishi va uni ariza topshirish jarayonida koʻrsatib bera olishi kerak;
• Oksford 1+1 MBA dasturi kelajakdagi karyerasi uchun qanday ahamiyatga egaligini toʻliq isbotlay olishi lozim;
• Ingliz tilini mukammal darajada bilishi shart.

Dastur talablari haqida batafsil ushbu havola orqali maʼlumot olish mumkin.

Dasturga qabul qilingan nomzodlar quyidagi imtiyozlarga ega boʻladi:

• Dastur davomida oʻquv kontrakt toʻlovidan ozod etiladi;
• 2 yillik oʻqish davomida yashash xarajatlari uchun yillik £20,780 ($27,296) stipendiya bilan taʼminlanadi.

Eslatma! Bu yilgi dastur uchun 5 nafar nomzod qabul qilinadi.

Dasturga ariza topshirish uchun nomzodlar tegishli kurs uchun onlayn ariza topshirishlari va koʻrib chiqilishi uchun 1+1 MBA dasturi arizasining “Funding” boʻlimiga motivatsion inshosini yuklashlari kerak. Insho 500 soʻzdan oshmasligi va ushbu savolga toʻliq javob berishi lozim:

• How do you intend to change the world and what does this tell us about you as a person?

Magistratura kurslarining alohida ariza shakli, muddati va talablari mavjud. Batafsil ushbu havola orqali tanishish mumkin.

Pershing Square Scholarship dasturi uchun ariza topshirishning soʻnggi muddati 2026-yil 7-yanvar hisoblanadi.

Saralash bosqichidan oʻtgan nomzodlar roʻyxati 2026-yil aprel oyining boshlarida eʼlon qilinadi va ular keyingi bosqich uchun aprel oyi oxiri yoki may oyi boshlarida intervyuga chaqiriladi.

Qoʻshimcha savol va murojaatlar uchun: ps.scholars@sbs.ox.ac.uk