Enterprise Singapore agentligidan yangi innovatsion yechimlarga ega startaplar uchun SLINGSHOT — 2023 tanlovi. Umumiy mukofot — S$ 1,2 million!

Enterprise Singapore agentligi Agorize kompaniyasi bilan hamkorlikda innovatsion yechimlarga ega yangi va qiziqarli startaplarni kashf etish maqsadida SLINGSHOT —2023 tanlovini eʼlon qiladi. Ishtirokchilar dunyoning eng yaxshi innovatsion markazlaridan biri Singapurda oʻz gʻoyalarini global miqyosdagi investorlar auditoriyasiga namoyish qilishlari va 1,2 million Singapur dollarigacha pul mukofotlari yutishlari mumkin.

Tanlovda yaxshi deb topilgan 50 ta startap uchun Osiyoning yetakchi startap hamjamiyatiga oʻz innovatsion yechimlarini namoyish qilish imkonini beruvchi, Singapur innovatsiyalar va texnologiyalar haftaligi doirasida boʻlib oʻtadigan finalga borish uchun xarajatlar tashkilot tomonidan qoplanadi.

Musobaqa quyidagi bosqichlarda amalga oshiriladi:

• Birinchi bosqich — saralash. Startaplar 2023-yil 10-apreldan 17-iyulgacha qabul qilinadi. Ushbu bosqich oxirida 250 ta startap ikkinchi bosqichga oʻtish uchun tanlanadi;
• Ikkinchi bosqichda startaplar 2023-yil 25-avgustdan 12-sentabrgacha qabul qilinadi. Ushbu bosqich oxirida 50 ta ish finalga oʻtish uchun tanlanadi;
• Uchinchi bosqich — final. Startaplar 2023-yil 31-oktabrdan 2-noyabrgacha qabul qilinadi. Final oflayn tarzda Singapurning Marina koʻrfaziga qaraydigan kurortda boʻlib oʻtadi.

Saralashda nomzodning ijodkorligi, soha boʻyicha qobiliyati va murakkab muammolarni hal qilishda zukkoligi hisobga olinadi.

Maʼlumot uchun: Enterprise Singapore kompaniyalarning rivojlanishini qoʻllab-quvvatlovchi davlat agentligi hisoblanadi. Agentlik kompaniyalarning oʻz innovatsiyalari bilan xalqaro miqyosda ishlash imkoniyatini yanada oshirish bilan shug'ullanadi.

Tanlov haqida batafsil ushbu havola orqali maʼlumot olish mumkin.

• Faoliyat yoʻnalishidan qatʼi nazar, innovatssion va soʻnggi 10 yil ichida davlat roʻyxatidan oʻtgan barcha kompaniyalar oʻz startaplari bilan qatnashishi mumkin;
• Ingliz tilini yaxshi bilish lozim (sertifikat soʻralmaydi);
• Finalchilar tanlov doirasida rejalashtirilgan barcha oflayn tadbirlarda ishtirok etishlari shart;
• Nomzodlar faqatgina yangi gʻoyalarni emas, balki muammoga berilgan amaliy va kengaytiriladigan yechimlarni jamlagan startaplarni taqdim qilishi lozim;
• Startaplar quyidagi yoʻnalishlardan biriga oid muammolarga yechim taklif etishi lozim:
  • Transformative Digital Technologies (Transformativ raqamli texnologiyalar);
  • Health and Biomedical (Salomatlik va biotibbiyot);
  • Manufacturing, Trade and Connectivity (Ishlab chiqarish, savdo va ulanish);
  • Environment, Energy and Green Technologies (Atrof-muhit, energiya va yashil texnologiyalar);
  • Consumer Media, Goods and Services (Isteʼmolchi ommaviy axborot vositalari, tovarlar va xizmatlar);
• Ushbu tanlovda tashkilotchi va Agorize xodimlari hamda ularning oila aʼzolari, shuningdek, tanlovning oldingi mavsumlarining gʻoliblari ishtirok eta olmaydi.

Eslatma: Yuqoridagi talablar nomzodlarga qoʻyilgan umumiy talablar hisoblanadi. Ishtirokchilarga qoʻyilgan talablar bilan batafsil ushbu havola orqali tanishib chiqish lozim.

• Tanlovda bepul ishtirok etish mumkin;
• Oʻz gʻoyasini xalqaro auditoriyaga taqdim etish va 1,2 million Singapur dollarigacha pul mukofotlarini yutish imkoniyati:
  • Asosiy gʻolib (Grant winner) — 200,000 Singapur dollari;
  • 1-oʻrin — 150,000 Singapur dollari;
  • 2-oʻrin — 100,000 Singapur dollari;
  • Saralangan 10 nafar gʻolibga har biri uchun 50,000 Singapur dollardan;
• Mukofot 12 oy davomida 2 ga boʻlib toʻlanadi;
• Eng yaxshi deb topilgan 50 ta startapning Singapurda oʻtkaziladigan finalga borishi uchun yoʻl va turar joy xarajatlari qoplanadi (guruh aʼzolaridan faqat bir kishi uchun);
• Global miqyosdagi yetakchi investorlar, startap akseleratorlari va korporatsiyalar bilan yaqindan tanishish;
• Maxsus treninglar, korporativ saytlarga kirish va oʻrganish hamda Singapur startaplari doirasida jonli muhitni his qilish.

Eslatma: Yoʻl xarajati oʻz mamlakatidan Singapurga aviachipta (ekonom klassda) bilan taʼminlashdan iborat.

Muhim: Tashkilotchilar sovrinni unga teng qiymatga ega boʻlgan boshqa narsaga almashtirish huquqiga ega. Bunday qaror faqat tashkilotchilarning ixtiyorida hisoblanadi va shikoyat qilishning imkoni yoʻq.

• Birinchi bosqich uchun har bir jamoa yaratgan startapi haqida 10 ta slayddan iborat PDF formatda bitta hujjat tayyorlashi kerak va u quyidagilarni oʻz ichiga olishi lozim:
  • Problem/solution (muammo/yechim);
  • Market and total addressable market;
  • Value proposition and positioning;
  • Go-to-market strategy;
  • Business/revenue model;
  • Traction: KPI metrics and milestones;
  • Forecast 2023/2024;
  • Team presentation (guruh taqdimoti).
• Ikkinchi bosqichda har bir jamoa 2 minutlik video tayyorlashlari kerak;
• Tanlovda ishtirok etish istagida boʻlgan nomzodlar ushbu havola orqali roʻyxatdan oʻtishlari lozim;
• Tanlovda muvaffaqiyatli roʻyxatdan oʻtgandan soʻng ishtirokchiga elektron pochta orqali tasdiqnoma keladi. Agar 24 soat ichida hech qanday tasdiqnoma olinmasa, ridihka.chopra@agorize.com manziliga murojaat qilish lozim;
• Ariza topshirishda kiritilgan maʼlumotlarni tahrirlash imkoni mavjud;
• Nomzodlar ariza topshirish davomida barcha savollarga toʻgʻri va toʻliq javob berishi kerak. Qoidalarga amal qilinmagan yoki toʻliq boʻlmagan ishlar tanlovdan chetlashtiriladi.

Muhim: Barcha hujjatlar va maʼlumotlar ingliz tilida boʻlishi shart.

Tez-tez beriladigan savollarga javob bu yerda.

Oxirgi muddat: 17-iyul, 2023-yil (20:59);

Email: ridihka.chopra@agorize.com