Felix Schoeller Photo Award 2023 — professional va endi o'sib kelayotgan fotograflar uchun xalqaro tanlov; €5 000-€10 000 pul mukofoti taqdim etiladi

Felix Schoeller Photo Award - professional fotograflar va yosh fotografik isteʼdod egalari uchun xalqaro fotografiya mukofotlari.

Felix Schoeller Group 2013-yildan buyon har ikki yilda bir marta xalqaro miqyosda fotosuratlar tanlovini tashkil qiladi va eng munosib nomzodlarni taqdirlaydi. Tanlovda 18 yoshdan katta boʻlgan barcha professional yoki endi o'sib kelayotgan (masalan, professional treninglarda qatnashayotgan) fotograflar oʻz ijodiy ishlari bilan ishtirok etishi mumkin. Ishtirok etish mutlaqo bepul.

Tanlov 5ta toifa boʻyicha tashkil etiladi:

1. Portret. Ushbu toifada inson qiyofasining istalgan uslubdagi kreativ portret fotosuratlari bilan ishtirok etish mumkin;
2. Fotojurnalistika. Ushbu toifada jurnalistik ahamiyatga ega boʻlgan voqealar yoki faktlar fotografik vositalar yordamida noodatiy tarzda hujjatlashtirilgan ishlar bilan ishtirok etish mumkin;
3. Barqarorlik. Ushbu toifada Yer yuzi va jamiyatda barqaror rivojlanishning ahamiyatini aks ettiruvchi ishlar bilan ishtirok etish mumkin;
4. Rivojlanayotgan fotografning eng yaxshi ishi. Rivojlanayotgan fotograflar mukofoti professional fotografiya olamidagi yosh isteʼdodlarni taqdirlaydi.
5. Fotografiya uchun Germaniya Tinchlik Mukofoti fotografiya vositasida “tinchlik” mavzusiga konseptual tarzda murojaat qilgan ijodiy ishlarni taqdirlaydi.

Tanlov toifalari va ishtirok etish boʻyicha batafsil rasmiy sayt orqali maʼlumot olish mumkin.

Talablar:

• Tanlovda professional yoki endi o'sib kelayotgan (masalan, professional treninglarda qatnashayotgan) fotograflar ishtirok etishi mumkin;
• Tanlov faqat 18 yoshdan katta boʻlgan jismoniy shaxslar uchun ochiq;
• Kompaniyalar, uyushmalar yoki klublar kabi yuridik shaxslar ishtirok eta olmaydi;
• Nomzodlar belgilangan 5ta kategoriyadan biri boʻyicha ishtirok etishi mumkin;
• Ishtirok etish mutlaqo bepul.

Tanlovda ishtirok etish talablari va shartlari haqida batafsil ushbu havola orqali tanishib chiqish mumkin.

Pul mukofoti jamgʻarmasi toifalar kesimida quyidagicha taqsimlanadi:

1. Portret — €5 000
2. Fotojurnalistika — €5 000
3. Barqarorlik — €5 000
4. Rivojlanayotgan fotografning eng yaxshi ishi — €5 000
5. Fotografiya uchun Germaniya Tinchlik Mukofoti — €10 000

• Har bir toifa boʻyicha gʻolib deb topilgan ijodiy ish mualliflari:
  • ijtimoiy tarmoqlarda namoyish etiladi;
  • yuqori sifatli “Winners and Nominees” koʻrgazmasida oʻzlarining nomzodlik ishlari bilan chiqish imkoniga ega boʻladi;
  • taqdirlash marosimiga taklif etiladi.

Shuningdek, saralanganlar roʻyxatiga kiritilgan barcha ijodiy ishlar(shortlisted work) tanlov rasmiy sayti galereyasida namoyish etiladi.

Tanlovda ishtirok etish uchun onlayn arizani toʻldirishdan avval ushbu havola orqali tanlov talablari va shartlari bilan toʻliq tanishib chiqish talab etiladi.

Onlayn arizada quyidagilar soʻraladi:

• Doim ishlaydigan elektron pochta manzili;
• Doimiy pochta manzili;
• “Rivojlanib kelayotgan fotografning eng yaxshi ishi” toifasidagi nomzodlar uchun taʼlim/treningdan dalolat beruvchi hujjat;
• Taqdim etilgan ishning yozma shakldagi konsepsiyasi (maksimal 1000 belgi, ingliz tilida);
• Yozma shaklda CV (maksimal 2000 belgi, ingliz tilida);
• Nomzodning fotografik ishlaridan namunalar (3-5 ta individual fotosuratlar).

Qoʻshimcha savol va murojaatlar uchun: contact@felix-schoeller-photoaward.com.

Shuningdek, mana bu sahifada ko'rsatilgan kontaklardan biriga ham bog'lanish mumkin.