Ijtimoiy-gumanitar soha tadqiqotchilari uchun Germaniyada amaliyot qilish imkonini beruvchi 6 oylik dastur — International Senior Fellowship Programme

Germaniyadagi University Alliance Ruhrning bir qismi boʻlgan Ijtimoiy va gumanitar fanlar kolleji xalqaro ilmiy hamda mahalliy tadqiqotchilar yaqin hamkorlikda ishlashlari uchun International Senior Fellowship Programme dasturini eʼlon qiladi. 

Dastur davomida ishtirokchilarga oylik stipendiya beriladi va moliyaviy yordam koʻrsatiladi. Shuningdek, ular turli seminar, maʼruza va konferensiyalarda qatnashish, kutubxona, axborot texnologiyalaridan bepul foydalanish kabi imkoniyatlarni ham qoʻlga kiritishadi. 

Dasturda qatnashish uchun nomzodlar doktorlik darajasini kamida 6 yil oldin olgan boʻlishlari va ariza topshirishgacha tandem hamkori tanlashlari lozim. Ishtirokchilar ingliz tilini bilishlari kerak, nemis tilini bilish esa majburiy emas. 

Dastur 2026-yil 1-martdan 1-sentyabrgacha davom etadi.

Dasturga qabul jarayoni 2025-yil 25-may, Oʻzbekiston vaqti bilan 26-may soat ertalabki 02:59 gacha davom etadi.

Dastur haqida ushbu havola orqali toʻliq maʼlumot olish mumkin.

Dasturda qatnashish uchun ishtirokchilarga quyidagi talablar qoʻyilgan:

• Dasturda universitet yoki tadqiqot markazi xodimlari qatnashishlari mumkin (R4 darajadagi (tadqiqot guruhi rahbari yoki boshqaruvchilari) tadqiqotchilarga saralash jarayonida ustunlik beriladi);
• Xorijiy universitet yoki muassasaning faol aʼzosi boʻlishlari kerak;
• Ijtimoiy-gumanitar fanlar sohasida aʼlo darajadagi tadqiqot tajribasiga ega boʻlishlari zarur (chop etilgan ishlarga eʼtibor qaratiladi);
• Doktorlik darajasini kamida 6 yil oldin olgan boʻlishlari lozim;
• Dastur hamkorlikka asoslanganligi sabab nomzodlar ariza topshirishdan avval UA Ruhr (University of Duisburg-Essen, Ruhr University Bochum, TU Dortmund University)dan mos keladigan tandem hamkorini aniqlashlari kerak;
• Dastur ingliz tilida boʻlgani uchun nomzodlardan ingliz tilini bilish talab qilinadi, nemis tilini bilish majburiy emas;
• Dastur davomida Ruhr hududida istiqomad qilishlari zarur;
• Tadqiqotda haftasiga kamida 3 kun (Sesh-Pay) ishtirok etishlari talab qilinadi;
• Haftalik ravishda konferensiya, leksiya va seminarlarda qatnashishlari zarur;
• Doimiy ravishda tandem hamkori bilan aloqada boʻlishlari kerak;
• Tandem hamkori bilan kamida bir tadbir (seminar, leksiya va boshqalar) tashkillashtirishlari lozim.

Tandem hamkorlik haqida ushbu havola orqali batafsil maʼlumot olish mumkin.

Dastur talablari haqida ushbu havola orqali toʻliq maʼlumot olish mumkin.

Dasturning quyidagi foydali tomonlari mavjud:

1. Ishlayotgan muassasasidan ish haqi olgan holda dasturda qatnashayotganlarga quyidagicha yordam beriladi:

• Har oy 3,050 yevro miqdorida stipendiya beriladi;
• Germaniyaga oilaviy ketishni reja qilayotganlarga oylik 250 yevro moliyaviy yordam beriladi;
• Koʻchib joylashish xarajatlari uchun oylik 125 yevro moddiy yordam beriladi.

2. Ishlayotgan muassasasidan ish haqi olmagan holda dasturda qatnashayotganlarga quyidagicha yordam beriladi:

• Bunda nomzodlar kompensatsiya shartnomasi orqali ish haqlarini moliyalashtirishlari kerak boʻladi. Shunda oyiga soliqlar bilan ilmiy unvoniga qarab har oy 7,100 yevrogacha moliyaviy yordam yoki 5,000 yevro stipendiya taqdim etiladi.

3. Shuningdek, nomzodlarning yoʻl va viza xarajatlari ham maʼlum bir talablarga koʻra qoplab beriladi.

Eslatma! Turar-joy, tibbiy sugʻurta va boshqa xarajatlar tadqiqotchining oʻzi tomonidan qoplanadi (ammo bularga yetarli darajada stipendiya beriladi).

Dasturga ariza topshirish jarayoni quyidagicha:

• Dastur talablari va shartlari bilan tanishib chiqing;
• Quyidagi hujjatlarni tayyorlang (fayllar 5 Mbdan oshmasligi kerak):

-Tadqiqot loyihasi taʼrifi (10,000 soʻzdan oshmagan);

-CV;

-Chop etilgan ishlar roʻyxati (eng muhim 5 tasi);

-Tandem hamkoridan taklif xati;

• Arizani yuklang;
• Arizalarni qabul qilish jarayoni 2025-yil 25-may, Oʻzbekiston vaqti bilan 26-may soat ertalabki 02:59 gacha davom etadi..

Dasturga ariza topshirish jarayoni haqida ushbu havola orqali batafsil maʼlumot olish mumkin.

Saralash jarayoni 2025-yil iyul oyida boʻlib oʻtadi va bu jarayonda onlayn intervyu oʻtkazilishi mumkin.

Dastur boʻyicha eng koʻp berilgan savollarga javoblarni ushbu havola orqali oʻqish mumkin.

Dasturga oid qoʻshimcha savollar tugʻilgan taqdirda Sophia-Helena Zwaka bilan quyidagilar orqali bogʻlanish mumkin:

E-mail: fellowship@college-uaruhr.de;

Tel: +49 201 183-6543.