Ilmiy faoliyat bilan shugʻullanayotgan barcha yosh ayol-qizlar uchun toʻliq moliyalashtiriladigan “Ilm-fan oromgohi” loyihasi

Yoshlar ishlari agentligi Ilm-fan oromgohi va Qizlar ovozi klubi bilan hamkorlikda ilmiy tadqiqot ishi olib borayotgan barcha yosh ayol-qizlar uchun toʻliq moliyalashtiriladigan “Ilm-fan oromgohi” loyihasini taqdim etadi. 5 kunlik oromgohda oʻqish, yashash hamda ovqatlanish xarajatlari tashkilotchilar tomonidan qoplab beriladi. Dastur davomida turli sovrinli tadbirlar tashkil etiladi hamda unda faol ishtirok etgan, maʼlum bir natijaga erishgan yoshlarga esdalik sovgʻalari taqdim etiladi.

Yosh ayol-qizlarni ilmiy tadqiqot ishlarini natijadorligini oshirish, ularni ilmiy faoliyatga keng jalb qilish, iqtidorli talaba qizlarni izlab topish, ularni ragʻbatlantirish, ilmiy-tadqiqot ishlariga qiziqishlarini orttirish va ilm-fanga jalb qilish loyihaning asosiy maqsadi hisoblanadi.

Dastur davomida ishtirokchilar ilmiy faoliyat boʻyicha quyidagi bilimlarga ega boʻladilar:

• Ilmiy faoliyatni amalga oshirish;
• Plagiatni aniqlash;
• Ilmiy maqolani chop etishda eʼtibor berilishi kerak boʻlgan jihatlar;
• Ilmiy faoliyatda ilmiy rahbarni oʻrni;
• Ilmiy ishni himoya qilishdagi jarayonlar;
• Ilmiy ish uchun talab qilinadigan bilimlar;
• H-indeksi haqida maʼlumot.

Loyiha Toshkent viloyati, Boʻstonliq tumani, “Semurgʻ” oromgohida 18-avgustdan 22-avgust kunlari tashkil etiladi. Nomzodlar soha boʻyicha yetakchi mutaxassislar tomonidan suhbat asosida saralanadi. Saralash natijalarining roʻyxati Yoshlar ishlari agentligi va Qizlar ovozi klubining rasmiy sahifasida beriladi.

• Ilmiy faoliyat bilan shugʻullanayotgan va 31 yoshga toʻlmagan barcha ayol-qizlar ishtirok etishi mumkin;
• Bakalavriat va magistratura talabalari, tayanch doktorantlar, mustaqil hamda erkin tadqiqotchilar qatnashishi mumkin.

Nomzodlar quyidagi mezonlar asosida saralandi:

• Nomzod tahsil olayotgan sohasi;
• Ilmiy tadqiqot ishining mavzusi;
• Tadqiqot ishi doirasida chop etgan ilmiy-metodologik maqolalari;
• Xorijiy tillarni bilishi.

Eslatma: Xorijiy tillarni bilishga qoʻyilgan maxsus talablar yoʻq. Lekin chet tillarini bilish nomzodga ustunlik beradi.

• Loyihada bepul qatnashish mumkin;
• Oʻqish, yashash va ovqatlanish xarajatlari qoplanadi;
• Sertifikat, maxsus forma va esdalik sovgʻalari taqdim etiladi;
• Ilmiy faoliyat boʻyicha chuqur bilimga ega boʻlish imkoniyati mavjud.

Muhim: Dastur davomida barcha yoʻl xarajatlari qoplanadi. Biroq viloyatda istiqomat qiladigan ishtirokchilar Toshkentga kelib-ketish xarajatlarini oʻzlari qoplashlari kerak.

Dasturda qatnashishni istaganlar ushbu havola orqali roʻyxatdan oʻtishlari mumkin.

Roʻyxatda oʻtishda quyidagi hujjatlar talab qilinadi:

• Tadqiqot ishi doirasida chop etilgan ilmiy-metodologik maqolalar (barchasi umumiy bitta PDF fayl koʻrinishida yuklanadi);
• Loyihada ishtirok etish sababini tasvirlagan insho (maksimal 500 ta soʻz).

Eslatma: Ilmiy maqolalarni istalgan tilda yuklash mumkin.

• Saralash 11-16-avgust kunlari amalga oshiriladi;
• Dastur boʻyicha qoʻshimcha savollar bilan Telegram orqali masʼul xodimga murojaat qilish mumkin;
• Oxirgi muddat: 10-avgust, 2023-yil.