Imkoniyati cheklangan iqtidorli talabalar uchun “Eng yaxshi talaba” tanlovi

Oliy va oʻrta maxsus taʼlim vazirligi tashabbusi bilan iqtidorli talaba-yoshlarni aniqlash va ularni munosib ragʻbatlantirish maqsadida Talaba va oʻquvchilarning maʼnaviy yuksalishiga koʻmaklashish markazi imkoniyati cheklangan talabalar oʻrtasida “Eng yaxshi talaba” tanlovini eʼlon qiladi.

Tanlov ikki bosqichda tashkil etiladi:

• birinchi oliy taʼlim muassasasi bosqichi;
• respublika final bosqichi.

Hujjatlar 2022-yil 25-oktyabrga qadar qabul qilinadi. Tanlovda ishtirok etish istagida boʻlgan yoshlar oʻzi taʼlim olayotgan fakultet rahbariyatiga murojaat etishlari mumkin.

Tanlov haqida batafsil tanlov nizomida oʻqish mumkin.

• Tanlovda oliy taʼlim muassasasida uzliksiz (akademik taʼtilsiz) kunduzgi taʼlim shaklida oʻqib kelayotgan nogironligi boʻlgan (1 va 2-guruh) talabalari ishtirok etishi mumkin.

• Tanlovning oliy taʼlim muassasi bosqichida 1, 2 va 3-oʻrinlarni egallagan gʻoliblar oliygoh rektoratining faxriy yorligʻi hamda tegishli ravishda 1-oʻrin sohibi BHMning 10 barobari, 2-oʻrin 8 barobari va 3-oʻrin 6 barobari miqdorida moddiy ragʻbatlantiriladi.
• Respublika bosqichining 1-oʻrin sohibi esa Oliy va oʻrta maxsus taʼlim vazirligining maxsus diplomi hamda bazaviy hisoblash miqdorining 100 barobari miqdorida bir martalik pul mukofoti bilan taqdirlanadi.

Tanlov 2 ta bosqichda oʻtkaziladi:

1. OTM bosqichi.
2. Respublika bosqichi.

Tanlovning oliy taʼlim muassasasidagi bosqichi oktabr oyida oʻtkaziladi.

Tanlovning olib borilish tartibi:
1. Tanlovning oliy taʼlim muassasasi bosqichi ikkita turda oʻtkazilganligi toʻgʻrisidagi yigʻilish (har bir tur boʻyicha alohida) bayonnomalari tanlov komissiyasi aʼzolari imzosi bilan tasdiqlanadi va ikkita bayonnoma gʻolib toʻgʻrisidagi maʼlumotlar yigʻmajildi bilan birgalikda Respublika tashkiliy qoʻmitasiga taqdim etiladi.
2. Tanlov komissiyasi oliy taʼlim muassasasining maʼmuriy-boshqaruv xodimlari, mutaxassis-oʻqituvchilar, hamkor tashkilotlardan jalb etilgan mutaxassislar, jamoat tashkilotlari vakillaridan iborat tarkibda tashkil etiladi.
3. Tanlovning oliy taʼlim muassasasi bosqichida ishtirok etish istagini bildirgan talabalar tomonidan taqdim etilgan hujjatlar toʻplami tegishli fakultet dekanati tomonidan saralanadi va oktabr oyining ikkinchi oʻn kunligida hujjatlar toʻplamini tanlov komissiyasiga taqdim etiladi.

Batafsil maʼlumotni rasmiy telegram sahifasidan olish mumkin.