Indoneziyada yetakchi yoshlar uchun xalqaro sammit — YPDS Jakarta 2026

Young Public Diplomacy Summit (YPDS) 2026 — strategik fikrlash, madaniy diplomatiya va global innovatsiyalarni rivojlantirish maqsadida yosh yetakchilar, talabalar va yosh mutaxassislarni birlashtiradigan xalqaro sammitdir. Sammitning navbatdagi toʻrtinchi mavsumi Indoneziyaning diplomatiya va xalqaro hamkorlik markazi hisoblangan Jakarta shahrida boʻlib oʻtadi.

Dastur davomida ishtirokchilar diplomatiya, geosiyosat, nizolarni tinch yoʻl bilan hal qilish va strategik kommunikatsiya kabi muhim mavzularda oʻtkaziladigan amaliy mashgʻulotlar, simulyatsiyalar va siyosiy laboratoriyalarda qatnashadilar.

Sammit 2026-yil 13-avgustdan 16-avgustgacha davom etadi.

Ushbu nufuzli sammit doirasida 10 ta toʻliq va 15 ta qisman moliyalashtiriladigan xalqaro grantlar (stipendiyalar) taklif etiladi.

Nomzodlarga qoʻyiladigan talablar:

• Oʻzbekiston va dunyoning istalgan mamlakatidan boʻlgan yosh yetakchilar, universitet talabalari va yosh mutaxassislar ariza topshirishlari mumkin;

• Ariza topshirish vaqtidagi yosh chegarasi 16 yoshdan 40 yoshgacha boʻlishi lozim;

• Diplomatiya, xalqaro munosabatlar yoki global masalalarga qiziqish mavjudligi;

• Rasmiy diplomatik tajriba talab etilmaydi;

• Ingliz tilini muloqot va darslarda ishtirok etish darajasida erkin bilish lozim.

Sammitda ishtirok etish uchun bir nechta moliyaviy paketlar taklif etiladi:

1) Toʻliq grant (10 ta oʻrin):

• Barcha amaliy mashgʻulotlar va seminarlarda bepul ishtirok etish;

• Sammit davomidagi bepul oziq-ovqat (tushlik va kechki ovqatlar);

• Aviachipta xarajatlari va transport koʻmagi;

• Sammit davomida 3 kechalik bepul turarjoy;

• Rasmiy taklifnoma xati, sertifikat va virtual kurs sertifikati taqdim etiladi.

2) Qisman grant (15 ta oʻrin):

• Ushbu turdagi grant turar joy va aviachiptadan tashqari deyarli barcha xarajatlarni (seminarlar, oziq-ovqat, taklifnoma, sertifikatlar) qoplab beradi.

3) Oʻzini-oʻzi moliyalashtirish (Self-finance):

• Toʻliq paket (barcha xarajatlar ishtirokchining oʻzidan, turar joy kiritilgan) — $599 (keyinchalik $699);

• Faqat sammitga kirish (turar joysiz) — $200.

Dasturda hujjat topshirish quyidagi bosqichlardan iborat:

1. Hujjat topshirish uchun onlayn roʻyxatdan oʻtiladi;

2. Ariza shakli toʻliq ingliz tilida toʻldiriladi va shaxsiy maʻlumotlar kiritiladi;

3. Grant (stipendiya) uchun ariza topshirganda $15.99 dollar miqdorida ariza toʻlovi (application fee) onlayn tarzda toʻlanishi lozim;

4. Ariza topshirilgandan soʻng nomzodlarning akademik koʻrsatkichlari, yetakchilik salohiyati va motivatsiyasi koʻrib chiqiladi.

Eslatma: Grant (Scholarship) uchun hujjat topshirishda $15.99 miqdorida qaytarib berilmaydigan ariza toʻlovi mavjud. Toʻlovsiz topshirilgan grant arizalari koʻrib chiqilmaydi.

Muhim sanalar:

• Hujjat topshirishning oxirgi muddati: 2026-yil 5-iyul;

• Sammit oʻtkazilish sanalari: 2026-yil 13–16-avgust.

Tashkilotchilar bilan bogʻlanish:

Dastur va boshqa savollar boʻyicha batafsil maʻlumot olish uchun tashkilotning rasmiy CSCD veb-sahifasi orqali bogʻlanishingiz mumkin.