Innovatsion rivojlanish vazirligi tomonidan Jizzax viloyati yosh olimlarini ilmiy stajirovkalarga yuborish bo‘yicha tanlov

Innovatsion rivojlanish vazirligi Jizzax viloyatida joylashgan oliy taʼlim va ilmiy-tadqiqot muassasalarining yosh olimlarini qisqa muddatli ilmiy stajirovkalarga yuborish yuzasidan maqsadli tanlov eʼlon qildi.

Nomzodlar 2022- yilning 18- mart sanasiga qadar stajirovka o'tashga tavsiya qilinishlari to'g'risidagi ma'lumot (hujjat)larni 1-ilova va 2- ilovaga muvofiq taqdim etishlari so'raladi.

Nomzodlar toʻgʻrisidagi maʼlumot (hujjat)lar oliy taʼlim va ilmiy-tadqiqot muassasalari tomonidan Oʻzbekiston Respublikasi Vazirlar Mahkamasining 2021-yil 19-apreldagi 222-son qarori bilan tasdiqlangan “Yosh olimlarni yetakchi xorijiy ilmiy tashkilotlarga qisqa muddatli ilmiy stajirovkalarga yuborish tartibi toʻgʻrisida”gi Nizom talablariga muvofiq rasmiylashtirilgan holda Vazirlikning info@mininnovation.uz elektron manziliga yuboriladi.

Shuningdek, Nizomning 5 — bandiga asosan stajirovka oʻtashga tavsiya etilayotgan nomzodlarni mutaxassislik fanidan chet tilida suhbat oʻtkazish, axborot-kommunikatsiya texnologiyalari boʻyicha bilim darajasi va koʻnikmalarini aniqlash yuzasidan dastlabki saralash tanlovini oʻtkazish bevosita buyurtmachilar tomonidan amalga oshirilishi belgilangan.

• Nomzodlar 20 yoshdan 40 yoshgacha boʻlib, mutaxassislik fani va xorijiy tillarni mukammal bilishlari soʻraladi; 
• Nomzodlar bir yil davomida ikki marotaba yetakchi xorijiy ilmiy tashkilotlarda (markazlar, universitetlar va boshqalar) oʻtashlar mumkin emas, oldin qatnashganlar bir yil ichida yana qayta qatnasholmaydilar; 
• Tanlovlarda gʻolib deb topilgan nomzodlar stajirovka oʻtab kelgandan hamda mazkur stajirovka boʻyicha hisobot taqdim etgandan soʻng navbatdagi kalendar yilidagi eʼlon qilingan tanlovlarga nomzod sifatida tavsiya etilishi mumkin.

Stajirovka shartlari haqida batafsil ushbu link orqali bilib olish mumkin.

• Yosh olimlar o‘z sohalari bo‘yicha yetakchi xorijiy ilmiy tashkilotlarda ilmiy stajirovka o‘tash imkoniyatiga ega bo‘lishadi;
• Stajirovka uchun talab etiladigan mablagʻ: transport, yashash, ovqatlanish va boshqa xarajatlar har biri alohida koʻrsatilgan holda murojaat qilinsa, tashkilotchilar tomonidan moddiy yordam berilishi mumkin.

Saralash ikki bosqichda maxsus ekspert guruhi tomonidan koʻrib chiqiladi.

• Birinchi bosqichda kiritilgan maʼlumot (hujjat)lar Nizomning 11-bandiga mos ravishda toʻliq taqdim etilganligi va rasmiylashtirilganligi koʻrib chiqiladi;
• Ikkinchi bosqichda nomzodlar oʻz stajirovka dasturlarini chet tilida taqdimot (prezentatsiya) koʻrinishida himoyasini oʻtkazadilar;
• Saralash tanlovlar davrida taqdimot himoyasida ishtirok etmagan (kelmagan) nomzodlarning hujjatlari maxsus ekspert guruhining qaroriga asosan rad etilishi mumkin;
• Taqdimot himoyasida nomzodlar tanlangan tadqiqot ishini qisqa, loʻnda va asoslangan holda ochib berishi hamda puxta tayyorgarlik koʻrgan holda ishtirok etishlari talab etiladi.

Bunda, maxsus ekspert guruhi taqdimot natijalariga asosan yakuniy xulosa tayyorlashda quyidagi mezonlarga amal qiladi:

• xorijiy tillarni oʻzining ish faoliyatini amalga oshirishda zarur boʻlgan darajada bilishi va qoʻllay olishi — 30 ballgacha;
• stajirovka maqsad va vazifalarining dolzarbligi hamda ilmiy yoki iqtisodiy samaradorligi — 40 ballgacha;
• stajirovkaning oliy taʼlim va/yoki ilmiy tashkilotning yoʻnalishlari, ehtiyojlari va talablariga mosligi — 30 ballgacha.

Taqdimot natijalariga asosan kamida 60 ball toʻplagan nomzodlar maxsus ekspert guruhi qarori bilan gʻolib deb topiladi.

Murojaatda keltirilgan maʼlumotlarga asosan Qozon shahrida joylashgan oliy taʼlim va ilmiy-tadqiqot muassasalaridan buyurtmachilarga taklifnomalarni olish va stajirovka dasturlarini kelishish muhokamalarini tashkil etish Innovatsion rivojlanish hududiy boshqarmasiga yuklanadi.

Qoʻshimcha maʼlumotlar uchun: 

1. Ilmiy stajirovkalarni va laboratoriya asbob-uskunalari xaridini tashkil etish boʻlimi boshligʻi S. Taxirovga murojaat qilish mumkin.

• Tel: (90) 989 24 05
• Elektron manzil: s.takhirov@minninovation.uz

    2. Shuningdek, yetakchi mutaxassis S. Sultonovga murojaat qilish mumkin.

• Tel: (94) 420 68 70 
• Elektron manzil: s.sultanov@mininnovation.uz.