Italiyadagi BolognaFiere S.p.A. kompaniyasidan grafik dizayn, tasviriy sanʼat sohasidagi mutaxassis va havaskorlar uchun plakatlar tanlovi
-
10/05/2023 Qabul boshlanishi
-
Bepul Moliyalash turi
-
Italiya Davlat
-
30/11/2023 04:00 Oxirgi muddat
Umumiy maʻlumotlar
Italiyadagi BolognaFiere S.p.A. kompaniyasi Yoshlar uchun kitoblar boʻyicha Xalqaro kengash va Accademia Drosselmeier bilan hamkorlikda Bolonya bolalar kitoblari koʻrgazmasi doirasida barcha illyustrator, grafik dizayner, kitob dizayneri, vizual rassom va nashriyot xodimlari uchun “Join The Revolution! Giving Every Child Good Books” mavzusida plakatlar tanlovini eʼlon qiladi.
Ushbu tanlovni tashkil qilishdan asosiy maqsad butun dunyo boʻylab yoshlar orasida kitobxonlikni targʻib qilish, ularning oʻqishga boʻlgan qiziqishni oshirish va Yoshlar uchun kitoblar boʻyicha Xalqaro kengashining asosiy tamoyillarini amalda qoʻllashga qaratilgan. Ushbu mavzuning berilishidan asosiy sabab dunyoning istalgan joyidagi barcha bolalarni kitob oʻqishga chorlash hamda taʼlimdagi qashshoqlikka qarshi kurashish zaruratidir va bu muammoni yechishda kitoblar eng samarali vosita hisoblanadi.
Yoshlar uchun kitoblar boʻyicha Xalqaro kengashning butunjahon Kongressi davomida plakatlarning amalda foydalanish imkoniyatlari koʻrib chiqiladi. Kengash qaroriga koʻra, maʼqul deb topilgan plakatlar tegishli mamlakatlarning shaharlaridagi devorlarga, maktablar, kutubxonalar va boshqa jamoat binolariga (masalan: pochta boʻlimlari, banklar, jamoat transporti va hokazolar) yopishtirilishi mumkin.
Maʼlumot uchun: Bognafiere S.p.A. xalqaro koʻrgazmalar tashkilotchisi sifatida faoliyat olib boradigan tashkilot boʻlib, koʻrgazma markazlari va tadbirlarni boshqaradi, shuningdek, konferensiya xizmatlarini taklif qiladi. BolognaFiere Group ushbu tashkilot sektoridagi asosiy ishtirokchilardan biri boʻlib, Italiyada va butun dunyoda 100 dan ortiq koʻrgazmalarga ega va Osiyo, Rossiya va Shimoliy Amerika kabi davlatlarda erishilgan tovar aylanmasining ulushi boʻyicha Italiyada birinchi oʻrinda turadi. BolognaFiere Group Italiyada va xorijda 80 dan ortiq tadbirlarni tashkil qiladi. Tashkilot Italiyada umumiy maydoni 400 000 kvadrat metrdan ortiq boʻlgan uchta koʻrgazma maydonini boshqaradi.
Tanlov haqida batafsil ushbu havola orqali maʼlumot olish mumkin.
Maqbullik shartlari
Ishtirokchilarga qoʻyilgan talablar:
- 2006-yil 31-dekabrdan oldin tugʻilgan barcha illyustrator, grafik dizayner, kitob dizayneri, vizual rassom va nashriyot xodimlari ishtirok etishlari mumkin;
- Har bir ishtirokchi faqat bitta ijodiy ish bilan qatnasha oladi;
- Nomzodlar tanlov mavzusini grafik tarzda tasvirlaydigan ijodiy ishlarni yaratishlari lozim;
- Ishtirokchilar oʻz ishlarining mutlaq egalari boʻlib qoladilar, lekin shu bilan birga 10 yil davomida BolognaFiere va Yoshlar uchun kitoblar boʻyicha Xalqaro kengashi ularning ishlaridan bepul foydalanishiga rozi boʻlishlari kerak (muallif ismi koʻrsatilgan holda);
- Ingliz tilini bilish lozim (sertifikat soʻralmaydi).
Plakatlarga qoʻyilgan texnik talablar:
- Taqdim etilgan ish mavzuga asoslangan boʻlib, tanlov uchun maxsus asl nusxada taqdim etilishi kerak;
- Ijodiy ishlar oq-qora yoki rangli boʻlishi mumkin;
- Plakat oldin nashr qilinmagan boʻlishi lozim;
- Ijodiy ishlar quyidagi xususiyatlarga ega boʻlishi kerak:
- Plakat formati: 70x100 sm;
- Fayl: JPG yoki PNG;
- DPI: 300;
- Plakatga qoʻshilishi kerak boʻlgan matn: “Join The Revolution! Giving Every Child Good Books”. Boshqa logotip yoki matnni oʻz ichiga olgan ishlar qabul qilinmaydi;
- Ishlar tanlovning belgilangan maqsadiga mos kelishi kerak.
Eslatma: Gʻoliblar Xalqaro ekspertlar hayʼati tomonidan aniqlanadi. Hakamlar hayʼatining qarori yakuniy hisoblanadi va oʻzgartirilmaydi.
Foydali tomonlari
- 2024-yil avgust-sentyabr oylarida Triyest shahrida boʻlib oʻtadigan Yoshlar kitoblari boʻyicha xalqaro kengashning butunjahon Kongressida gʻoliblar eʼlon qilinadi va ularning plakatlari xalqaro auditoriga taqdim etiladi (bunda har bir plakatning muallifi koʻrsatiladi);
- Saralangan ijodiy ishlar tegishli mamlakatlarning serqatnov joylariga yopishtiriladi;
- Gʻolib plakatlar 2025-yilgi Bolonya bolalar kitoblari koʻrgazmasida bepul namoyish etiladi.
Muhim: Gʻoliblar ijodiy ishlarini yuqori aniqlikdagi fayl koʻrinishida elektron pochta orqali yuborilgan maxsus manzilga joʻnatishlari kerak.
Qoʻshimcha maʻlumotlar
- Oxirgi muddat: 30-noyabr, 2023-yil (04:00);
- Tel: +39 051 282111;
- Email: bookfair@bolognafiere.it;
- Quyidagi ijtimoiy tarmoqlar orqali qoʻshimcha maʼlumot olish mumkin: