Janubiy Koreyaning eng nufuzli universiteti — KAISTdan bakalavr bosqichini toʻla moliyalashtirilgan holda oʻqish uchun KAIST Scholarship granti

Mamlakat doirasida birinchi, Osiyo universitetlari orasida toʻqqizinchi oʻrinda turuvchi, ilm-fan va texnikaga ixtisoslashgan Janubiy Koreyaning eng oldi universiteti — KAIST 2026-oʻquv yilidan boshlab bakalavr bosqichini toʻla moliyalashtirilgan holda bepul oʻqish istagida boʻlganlarga grant ajratishini maʼlum qiladi. 

Oʻz millati va jamiyatga manfaat keltirish istagida boʻlgan, ilm-fan hamda texnika sohasida tadqiqot oʻtkazishga moyilligi bor, kashfiyot qilishga qiziquvchi, insoniyat kelajagi haqida chuqur qaygʻuruvchi barcha millat vakillari dasturga ariza topshirishi mumkin. 

Oʻqishga qabul qilingan talabalar dastlabki oʻquv yilida umumiy fanlardan saboq olib, 2-kursdan boshlab oʻzlarini qiziqtirgan yoʻnalishlardan biri: tabiiy va hayotiy fanlar, injenerlik, bioinjeneriya, biznes boʻyicha tahsil olishni davom ettiradilar. 

Grant yutib olgan eng salohiyatli hamda iqtidorli talabalar oʻquv xarajatlarida toʻla ozod qilinish bilan birga, oylik stipendiya va bepul tibbiy sugʻurta bilan taʼminlanadilar. Talabalarga qoʻyiladigan yagona talab esa fanlarni aʼlo darajada oʻzlashtirish va doimiy izlanishdan toʻxtamaslikdir.

Dasturning maqbullik shartlari:

• 2026-yil 31-avgustigacha o‘rta maktabni tamomlagan yoki tugatadigan nomzodlar ariza yuborishi mumkin (erta qabul uchun);
• Arizachining ota-onasi ham, oʻzi ham Janubiy Koreya fuqarosi boʻlmasligi kerak (Xalqaro talabalar uchun);
• Ariza bergan vaqtida nomzod boshqa universitetga hujjat topshirmagan boʻlishi shart;
• Kelib chiqishi koreyalik boʻlgan abituriyentlar maktabni Koreyadan tashqarida bitirgan boʻlishlari lozim;
• Stipendiya iqtidorli talabalargagina berilgani bois, talaba birinchi oʻquv yilini 4.3 dan kamida 2.7 natija (GPA) bilan tugatishi shart.

Eslatma: Dasturga Koreya fuqarolari ham ariza topshira oladilar. Talablar bilan batafsil bu yerda tanishish mumkin.

Grant yutib olgan arizachilar uchun quyidagi imtiyozlar belgilangan:

1. 8 ta semestr (4 yil) uchun oʻqish pulidan ozod qilinadilar.
2. Yashash xarajatlari uchun 350,000 KRW (~$240) oylik stipendiya toʻlanadi.
3. Tibbiy sugʻurta puli qoplab beriladi.

Hozirda doimiy qabul bo'yicha arizalar qabul qilinmoqda.

Arizachilar quyidagi tartibda hujjat topshirishlari lozim:

1. Online arizani toʻldirish (Ariza badali: $80 yoki 80,000 KRW).
2. Notarial tasdiqlangan maktab attestati yoki universitet diplomi va baholar ilovasi nusxasi (ingliz tilida).
3. 1 ta tavsiyanoma xati.
4. Arizachining pasportidan nusxa.
5. Ingliz tilini bilish darajasini tasdiqlovchi hujjatning test markazi tomonidan yuborilgan rasmiy nusxasi (Ixtiyoriy; eng kamida IELTS-6.5, TOEFL iBT 83 yoki shu natijaga teng boshqa test).
6. Moliyaviy taʼminot haqida maʼlumotnoma (Onlayn arizaning ichida: KAIST grant dasturini yoki homiylik orqali qoplanishini belgilashi shart).
7. Yutuq va mukofotlarni tasdiqlovchi 5 tagacha hujjat nusxasi (ixtiyoriy).
8. Nomzod maktabining profil manzili (veb-sayt, broshyura va b.).
9. Rasmiy standart test natijalarining test markazi tomonidan yuborilgan rasmiy nusxasi (SAT, AP, IB, GCE A-Level, ACT, yakuniy imtihon natijasi, universitetga kirish bali yoki Xalqaro olimpiada sertifikati).

Eslatma: Arizachilarning grant uchun alohida hujjat topshirishlari shart emas, balki kirish talablariga javob berishning oʻzi yetarli. Tavsiyanoma xati muddat tugagunga qadar joʻnatilishi lozim. Onlayn arizani toʻldirishning imkoni boʻlmaganda, hujjatlarni pochta orqali joʻnatish kerak. Ariza qabul qilingach unga hech qanday oʻzgartirish kiritib boʻlmaydi. Batafsil bu yerda tanishishingiz mumkin.

KAIST universiteti uchun uchta qabul muddati: 

• erta qabul;
• doimiy qabul;
• kechki qabul (kuzgi semestr uchun) mavjud.

Doimiy qabulga ariza yuborishning oxirgi muddati: 06-yanvar, 2026-yil.

Qabul vaqtlari bilan bu yerda batafsil tanishish mumkin.

Arizasi muvaffaqiyatli qabul qilingan nomzodlar intervyu uchun taklif qilinadilar. Intervyu muddati va yakuniy natija xabarini oʻtkazib yubormaslik uchun arizachilardan elektron pochtalarini doimiy tekshirib turish soʻraladi. Qabul, intervyu va yakuniy natija muddatlari bilan batafsil bu sahifada tanishish mumkin. Grant uchun alohida hujjatlar talab qilinmagani bois, yakuniy xulosaga koʻra oʻqishga qabul qilingan barcha talabalar avtomatik tarzda KAIST grantiga tavsiya etiladilar.

Qoʻshimcha maʼlumot va savollar uchun:

• Tel: +82-42-350-4803
• Fax: +82-42-350-2420
• Elektron pochta: creative.adm@kaist.ac.kr
• Vebsayt;
• Tezkor savol-javoblar;
• Pochta manzili: Undergraduate Admissions Team, Office of Admissions, KAIST, #102, Yang Boon Soon Bldg. (E16-1), 291 Daehak-ro, Yuseong-gu, Daejeon 34141, Republic of Korea.