Bakalavr, magistratura va PhD talabalari uchun Ispaniyada xarajatlari toʻliq qoplanadigan ikki haftalik oromgoh — ECAMPUZ project dasturi
-
20/10/2023 Qabul boshlanishi
-
Toʻliq Moliyalash turi
-
Ispaniya Davlat
-
31.12.2023 Oxirgi muddat
Umumiy maʻlumotlar
“ECAMPUZ — European World Talent Camp for Uzbekistan Scientists in Food Science and Technology” oromgohi oziq-ovqat xavfsizligining asosiy jihatlarini, jumladan oziq-ovqat tarkibidagi asosiy patogen mikroorganizmlarni va qayta ishlash jarayonida zaharli birikmalarning shakllanishini oʻrganish jarayonini qamrab oladi. Dasturning maqsadi Oʻzbekistonda sogʻlom oziq-ovqat ishlab chiqarishni koʻpaytirish uchun yangi innovatsion va zamonaviy metodologiyalarni qanday tatbiq etish mumkinligini o'rganishdan iborat.
Oromgohda Ekstremadura universiteti va Kopengagen universiteti trenerlari tomonidan talabalarga oziq-ovqat xavfsizligi va sifati, oziq-ovqatning haqiqiyligini taʼminlash va turli zaharli birikmalarni tekshirish boʻyicha Yevropa Ittifoqi mamlakatlarida qoʻllaniladigan ilgʻor texnologiyalar oʻrgatiladi.
Bu yilgi oromgohning bosh mavzusi: “Food Safety and Food Microbiology”. Dastur toʻliq ingliz tilida olib boriladi.
Dasturga Toshkent kimyo-texnologiya instituti, Oʻzbekiston Milliy universiteti, Buxoro muhandislik-texnologiya instituti, Andijon davlat universiteti, Urganch davlat universitetidan 25 nafar ENG iqtidorli bakalavr, magistratura va 1-kurs PhD talabalari tanlab olinadi.
Oromgoh 2024-yilning may-iyun oylarida 2 hafta davomida Ispaniyada boʻlib oʻtadi. Barcha xarajatlar qoplab beriladi.
Dastur uchun ariza topshirishning soʻnggi muddati — 31-dekabr, 2023-yil.
Dastur haqida batafsil maʼlumotni ushbu havola orqali bilib olish mumkin.
Maqbullik shartlari
- Mazkur oromgohda quyidagi OTMlarning bakalavr, magistratura va PhD talabalari qatnashishi mumkin:
— Toshkent kimyo-texnologiya instituti;
— Oʻzbekiston Milliy universiteti;
— Buxoro muhandislik-texnologiya instituti;
— Andijon davlat universiteti;
— Urganch davlat universiteti. - Ingliz tilini B2-C1 darajasida bilish kerak. (Sertifikat soʻralmaydi, ammo tashkilotchilar tomonidan til bilish darajasi tekshiriladi).
Dastur talablari haqida batafsil ushbu havola orqali oʻqish mumkin.
Foydali tomonlari
- Oromgohda yashash xarajatlari, turarjoy, ovqatlanish va borish/kelish biletlari bilan bogʻliq xarajatlar qoplab beriladi;
- Dastur gʻoliblariga viza olish jarayonida yordam beriladi.
Qoʻshimcha maʻlumotlar
- Dastur ishtirokchilari baholari, tajribalari, analitik, shuningdek, kommunikativ va ingliz tili koʻnikmalariga koʻra tanlab olinadi. Bundan tashqari, tanlov jarayonida gender tengligi hisobga olinadi. Agar nomzodlar ijtimoiy-iqtisodiy jihatdan kam taʼminlangan va/yoki qishloq joylardan boʻlsa, (shu jumladan, yetim talabalar va/yoki ota-ona qaramogʻisiz qolgan talabalar) ular buni loyiha maʼmuriyatiga maʼlum qilishi mumkin.
- Oromgohning 1-mavsumi haqida videorolikni ushbu havola orqali koʻrish mumkin.
Dastur bilan bogʻliq qoʻshimcha savollarni ecampuzproject@gmail.com elektron manziliga yuborish yoki +99897 264 55 65 telefon raqamiga qoʻngʻiroq qilish orqali javob olish mumkin.