Kitobxonlar uchun noyob kitoblar yutib olish imkoniyatini beruvchi “WikiKitob II” tanlovi

Oʻzbekcha Vikipediya sifatini oshirish, eng sara ilmiy-ommabop va badiiy adabiyotlarni taqdim qilish, kitobxonlikka qiziqishi yuqori boʻlgan yoshlarni qoʻllab-quvvatlashga qaratilgan ijtimoiy loyiha hisoblangan — “WikiKitob II” tanlovi taqdim etiladi.

Tanlov oʻz faoliyatini WikiMarafon jamoasi va 1000KITOB, Yoshlar ishlari agentligi hamkorligida olib boradi.

Tanlovning asosiy maqsadi – talaba va oʻquvchilar oʻrtasida maʼnaviy-maʼrifiy va tarbiyaviy ishlar samaradorligini oshirish, shuningdek, ularning darsdan boʻsh vaqtini mazmunli tashkil qilish, kitobxonlik madaniyatini yuksaltirish va kitob mutolaasini keng targʻib qilish, yoshlarni oʻz mustaqil fikriga ega, dunyoqarashi keng qilib tarbiyalash va qoʻllab-quvvatlashdan iborat.

Loyihaning asosiy vazifalari:

• Talaba va oʻquvchilarning kitob oʻqishga boʻlgan qiziqishlarini yanada oshirish, ularning soʻz boyligini kengaytirish, ijtimoiy faolligi va millat taqdiriga daxldorligini oshirish, yoshlarni vatanparvarlik ruhida tarbiyalash;
• Yoshlarning barcha qatlamlarini kitob oʻqishga daʼvat etish hamda kitob oʻqishga boʻlgan qiziqish va intilishlarini qoʻllab-quvvatlash, joylarda adabiy muhit shakllanishiga erishish;
• Yoshlar ongida Vatanimiz tarixi, milliy va umuminsoniy qadriyatlar, ijtimoiy hayot haqidagi tushuncha va bilim-koʻnikmalarini yanada yuksaltirish;
• Oʻzbek va jahon adabiyotining eng sara namunalarini keng targʻib etish, yoshlar orasida kitobxonlik madaniyatini yuksaltirish, Oʻzbekcha Vikipediya orqali adabiy bilimlarni mustahkamlash va raqamli maʼnaviyatni rivojlantirish.

Tanlov 2026-yil 6-apreldan 26-aprelgacha davom etadi.

Dastur haqida batafsil ushbu havola orqali maʼlumot olish mumkin.

• Tanlovda Oʻzbekiston Respublikasida istiqomat qiladigan barcha kitobxonlar ishtirok etishi mumkin;
• Har bir talabgor faqat yakka tartibda qatnashishi kerak;
• WikiMarafonning boshqa ost va yon loyihalarida qatnashayotganlar ham “Wiki1000KITOB” loyihasida ishtirok eta olishi mumkin.

Eslatma: Tanlov davomida ishtirokchining ikki yoki undan koʻp akkauntlardan ishtirok etayotganligi aniqlansa, tanlovdan chetlatiladi va natijasi bekor qilinadi.

• Tanlovda yuqori oʻrinlarni egallagan 15 ta ishtirokchi 10 dona kitob va elektron sertifikat bilan taqdirlanadi;
• “Eng faol targʻibotchi” nominatsiyasi gʻoliblaridan 5 nafar ishtirokchiga 10 dona kitob va elektron sertifikat taqdim etiladi.

Muhim: Tanlov jarayonida test ishlagan hamda yuqori oʻrinlarni egallay olmagan barcha ishtirokchilar natijasidan qatʼiy nazar elektron sertifikat bilan taqdirlanadi.

Tanlovda ishtirok etish quyidagi tartibda olib boriladi:

• Dasturga qiziqqanlar @WikiTanlov_bot orqali roʻyxatdan oʻtishlari kerak;
• Telegram bot orqali belgilangan tartibda roʻyxatdan oʻtilgandan soʻng, maxsus oyna orqali belgilangan kunda 40 ta testni yechishlari lozim;
• Testlar maxsus platformada mavjud (WikiMarafon jamoasi tomonidan tayyorlanadi) kitoblarga oid maqolalar yuzasidan tuziladi. Test sinovi 26-aprel sanasida boʻlib oʻtadi. Har bir test savoli uchun 1 daqiqa vaqt beriladi;
• Telegram bot orqali belgilangan tartibda roʻyxatdan oʻtgan ishtirokchilar bot taqdim qiladigan maxsus havolani doʻstlariga ulashish orqali tanlov targʻiboti boʻyicha maxsus tanlovda qatnashishi mumkin. Ishtirokchilarga har bir taklif qilgan doʻsti uchun 1 referal ball beriladi.

Eslatma: Tanlovning test natijalari boʻyicha ishtirokchilarning natijalari teng kelib qolgan taqdirda, testni bajarib boʻlgan vaqtga qaraladi. Qoʻshimcha natijalari yuqori boʻlgan ishtirokchiga ustunlik beriladi.

• Dasturga qabul 2026-yil 26-aprelgacha davom etadi;
• Natijalar 2026-yil 1-maygacha eʼlon qilinadi;
• Manzil: Oʻzbekiston Respublikasi Toshkent shahri, Shayxontohur tumani Alisher Navoiy koʻchasi, 11A-uy;
• Email: wikimarafon@gmail.com;
• Tanlov davomida tashkilotchilar ishtirokchining shaxsini tasdiqlovchi hujjatini koʻrsatishini (onlayn yuborishini) talab qilishi hamda yuqori oʻrindagi ishtirokchilarning natijalariga shubha paydo boʻlganida ular bilan videochat yoki telefon orqali qoʻshimcha savol-javob oʻtkazishi mumkin.