Koreya Taraqqiyot Institutida magistratura dasturi uchun toʻliq grantlar — KDI School of Public Policy and Management

KDI School of Public Policy and Management Fall 2025 — Koreya taraqqiyot instituti davlat siyosati va boshqaruv maktabi magistratura dasturlariga qabul eʼlon qilindi. Koreya Taraqqiyot Instituti butun Koreyada va dunyoda rivojlanishni oʻrganish, rivojlanish iqtisodiyoti va davlat siyosati sohasida tadqiqot va oʻrganish boʻyicha yetakchi muassasa sifatida tan olingan.

Quyidagi magistratura dasturlariga qabul ochiq va grant imkoniyatlari mavjud:

1. Davlat siyosati magistri (Master of Public Policy);
2. Rivojlanish siyosati magistri (Master of Development Policy);
3. Davlat boshqaruvi magistri (Master of Public Managment).

Dastur oʻqish shakli: toʻliq kunduzgi (full-time). Dastur 4 akademik semestrni (taxminan 1,5 yil) oʻz ichiga oladi:

• KTI maktabida 3 semestr (taxminan 1 yil);
• 4-semestr: bitiruv tadqiqot loyihasi uchun oʻz vataniga qaytib keladi.

Dastur davomida quyidagi sohalarga eʼtibor beriladi:

• Moliya va makroiqtisodiy siyosat;
• Savdo va sanoat siyosati;
• Davlat moliyasi va ijtimoiy siyosat;
• Hududlarni rivojlantirish va ekologiya siyosati;
• Barqaror rivojlanish;
• Xalqaro taraqqiyot;
• Davlat boshqaruvi va yetakchilik;
• Strategik menejment;
• Global boshqaruv va siyosiy iqtisod.

Dastur haqida batafsil rasmiy sayt hamda ushbu hujjat orqali tanishib chiqish mumkin.

• Nomzodlar bakalavr darajasi yoki ekvivalentiga ega boʻlishlari lozim;
• Koreya fuqaroligiga ega boʻlmasligi kerak;
• Nomzod kamida 16 yillik taʼlimni tamomlagan boʻlishi kerak(maktab, kollej/litsey + bakalavr);
• Ingliz tilini yetarli darajada bilishi lozim.

Grant dasturlari talablari va shartlari haqida ushbu havola orqali batafsil tanishib chiqish mumkin.

Koreya taraqqiyot instituti davlat siyosati va boshqaruv maktabi magistratura dasturlari doirasida quyidagi grantlar mavjud:

• Global Ambassador Scholarship(GAS) — toʻliq oʻqish toʻlovi va oylik stipendiya;
• Seoul G20 Global Leaders Scholarship — toʻliq oʻqish toʻlovi, oylik stipendiya va borish-qaytish uchun aviachipta.

Dasturga hujjat topshirish uchun onlayn ariza portalidan roʻyxatdan oʻtish lozim. Dasturga ariza topshirish jarayoni 2025-yil 18-fevral O'zbekiston vaqti bilan soat 05:00 dan 3-mart soat 14:00 gacha davom etadi. 

Kerakli hujjatlar:

• Yuqori maktab/kollej/litsey taʼlimini tamomlaganligi haqida maʼlumot: barcha akademik tabel baholari, oʻtilgan fanlar, qabul qilinish va bitirish sanalari va boshqalar;
• Onlayn soʻrovnoma. Soʻrovnoma ariza portalining oxirgi bosqichida toʻldiriladi.
• Bakalavriat darajasini beruvchi muassasalardan (universitet, institut) bakalavr (kamida 3 yil) rasmiy sertifikati/diplomi;
  • Yakuniy (umumiy) CGPAni oʻz ichiga olgan rasmiy transkript. Transkript baholash tizimi talablarga mos kelmasa, qoʻshimcha hujjat talab etiladi.
  • Oʻqish yillari davomida olgan kurslarning toʻliq roʻyxati;
• 2 ta tavsiyanoma. Tavsiyanomalar nomzodning akademik yoki professional sharoitda ishlashi haqidagi maʼlumotlarni oʻz ichiga olishi va tavsiya qiluvchi shaxslar tomonidan portalga yuklanishi lozim;
• Ingliz tilini bilish darajasini tasdiqlovchi hujjat: TOEFL, IELTS-6, TOEIC-750 va boshqalar;
• Ish tajribasini tasdiqlovchi hujjat (Rasmiy ish tajribasi borlarga tegishli): Hujjat nomzodning ishlagan muddati va lavozimini aniq koʻrsatishi va muassasa HRi tomonidan rasmiy tasdiqlangan boʻlishi kerak;
• Pasport nusxasi va nomzod rasmi;
• Video (ixtiyoriy). Videoda “Nima bilan shugʻullanasiz? Va sizning fikringizcha, KTI maktabidagi taʼlim sizning qilayotgan ishingizni qanday oʻzgartiradi?” savollariga javob berish lozim.

Muhim: Transkriptlar (jumladan, ingliz tilidan boʻlmagan hujjatning tarjimasi) 1) Apostil qoʻyilgan yoki 2) Koreya elchixonasi tomonidan tasdiqlangan boʻlishi kerak.

Hujjatlarni tayyorlash talablari, jarayoni haqida batafsil ushbu havola orqali maʼlumot olish mumkin.

Qoʻshimcha savol va murojaatlar uchun email manzillari:

• internationaladmissions@kdis.ac.kr KTI maktabining ichki stipendiyalari uchun (GAS, Seul G20);
• internationaladmissions2@kdis.ac.kr yoki boshqa tashqi stipendiyalar uchun.

Pochta manzili (qabul qilingan talabalar uchun hujjatlarni topshirish):

Qabul komissiyasi, KTI Davlat siyosati va boshqaruv maktabi
263 Namsejong-ro, Sejong, Koreya (30149) +82-44-550-1175/1281