Umumiy maʻlumotlar
Uppsala universiteti har yili mazkur universitetda magistratura bosqichini oʻqish istagida hujjat topshirgan xalqaro talabalarga universitet kontrakt toʻlovini toʻliq qoplaydigan holda oʻqish imkonini beruvchi Uppsala University Global Scholarship dasturini taklif etadi.
Mazkur grant dasturi Uppsala universitetida bepul tahsil olish imkonini beradi (grant universitet kontrakt toʻlovini toʻliq moliyalashtirishga qaratilgan). Grant xalqaro talabalar uchun ajratilgan.
Grant dasturi haqida batafsil ushbu havola orqali bilib olish mumin.
Maqbullik shartlari
- Dastur ishtirokchisi Yevropa Ittifoqi/Yevropa Iqtisodiy Zonasi va Shveysariya davlati fuqarosi boʻlmasligi kerak;
- Nomzod oʻz akademik qobiliyatini namoyish eta olishi va taʼlimga boʻlgan qiziqishini koʻrsata olishi kerak;
- Universitet qabul muddati tugashidan oldin magistratura bosqichiga hujjat topshirgan boʻlishi va uning qabul talablariga toʻgʻri kelishi kerak.
Uppsala Universiteti grant dasturi nomzodning qobiliyati, akademik yutuqlariga qarab gʻoliblikni belgilaydi. Mazkur grant dasturlarining bosh maqsadi akademik qobiliyatini namoyish eta oladigan va taʼlimga boʻlgan qiziqishini koʻrsata oladigan qobiliyatli talabalarga imkoniyat berishdir.
Nomzod erishgan akademik yutuqlar universityadmissions.se saytidagi magistratura yoki bakalavr dasturi uchun hujjat topshirish jarayonida topshirilgan hujjatlar orqali aniqlanadi. Grant dasturi saralash komissiyasi tomonidan gʻoliblikni belgilashda nomzod grant uchun onlayn ariza topshirish jarayonida yozgan motivatsion xatga ham eʼtibor beriladi. Moliyaviy ehtiyojmand boʻlish dastur gʻolibi boʻlishda muhim omil hisoblanmaydi.
Eslatma: Ariza topshirish toʻlovi va talab etilgan barcha hujjatlar qabul muddati tugashidan oldin Universitet qabul komissiyasi tomonidan qabul qilingan boʻlishi kerak.
Grant dasturi maqbullik shartlari haqida batafsil ushbu havola orqali bilib olish mumkin.
Foydali tomonlari
- O'quv kontrakt toʻlovi toʻliq qoplanadi.
Eslatma: ushbu dastur yashash xarajatlarini oʻz ichiga olmaydi.
Hujjat topshirish
Uppsala University Global Scholarship dasturiga ariza topshirish istagida boʻlgan nomzodlar ikki bosqichdan iborat shaklda hujjat topshirishi kerak.
1-bosqich: Magistratura dasturiga hujjat topshirish
- Nomzod Uppsala universiteti magistratura bosqichida oʻqish uchun ushbu saytda keltirilgan oʻquv dasturlaridan birini tanlab ariza topshirishi kerak;
- 2024-yil kuzgi semestrda boshlanadigan dasturlar uchun 2023-yil 16-oktabrdan 2024-yil 15-yanvargacha boʻlgan muddatda onlayn ariza topshirish talab etiladi;
- Arizalar ushbu saytda topshirilganidan soʻng, arizachiga sakkiz raqamdan iborat shaxsiy ariza raqami taqdim etiladi. Grant dasturiga ariza topshirishda ushbu raqam kerak boʻlishini inobatga olib, ariza raqamini saqlab qoʻyish talab etiladi.
Eslatma: Agar nomzodning arizasi ushbu saytda qabul muddatidan kechikib topshirilgan deb topilsa, u holda nomzod Uppsala University Scholarship dasturiga hujjat topshira olmaydi.
Magistratura dasturiga ariza topshirish haqida batafsil ushbu havoladan bilib olish mumkin.
2-bosqich: Grant dasturiga onlayn ariza topshirish.
Oʻquv dasturi uchun (magistratura bosqichi nazarda tutilmoqda) ariza topshirish muddati tugagandan soʻng, Uppsala University Global Scholarship dasturi uchun ariza topshirish jarayoni boshlanadi. Taʼkidlash kerakki, Uppsala universitetida tahsil olish uchun va universitet taklif etadigan grantlar uchun ariza topshirish ikki xil jarayon hisoblanib, har biriga alohida shaklda ariza topshirish talab etiladi.
2024-yil 10-yanvardan 22-yanvargacha boʻlgan muddatda Uppsala University Global Scholarship dasturiga onlayn shaklda ariza topshirish mumkin.
Uppsala University Global Scholarship dasturiga onlayn arizani toʻldirish mobaynida nomzoddan hech qanday hujjat topshirishi soʻralmaydi. Ariza shaklida quyidagi maʼlumotlarni kiritish talab etiladi:
- shaxsga oid maʼlumotlar;
- nomzod birinchi tanlov sifatida tanlagan magistratura bosqichi dasturi;
- ushbu saytda berilgan maxsus ariza raqami;
- qaysi grant dasturiga ariza topshirayotganligi;
- nima uchun ushbu grant gʻolibi boʻlishga munosib ekanligini ifodalab beradigan motivatsion xat. Shuni aytish muhimki, nomzod yozgan motivatsion xat 350 soʻzdan oshmasligi va grant dasturida keltirilgan talablarga javob berishi kerak.
Maqbullik shartlariga (eligibility criteria)ga toʻla mos kelgan nomzod Uppsala Universiteti taklif etadigan bir nechta grantlarga ariza topshirishi mumkin. Ammo yodda saqlash kerakki, nomzod topshirgan grant dasturlaridan faqatgina bittasining gʻolibi boʻla oladi.
Uppsala Universiteti grant dasturlariga ariza topshirish bepul hisoblanadi, lekin universitetning ushbu saytidagi oʻquv dasturlariga (bakalavr yoki magistratura) hujjat topshirishda ariza topshirish toʻlovi mavjud.
Grant dasturi qabul komissiyasi kechikib topshirilgan arizalarni qabul qilmasligini inobatga olib, nomzoddan grant dasturiga ariza topshirishda belgilangan qabul muddatlariga ahamiyat berishi va oʻz vaqtida topshirishi soʻraladi.
Eslatma: Agar nomzod quyidagi talablarga toʻgʻri kelmasa, grant dasturiga ariza topshirishi tavsiya etilmaydi:
- Uppsala Universitetiga qabul qilinish talablariga javob bermasa;
- ushbu saytda keltirilgan oʻquv dasturlaridan birini birinchi tanlov sifatida tanlab ariza topshirmagan boʻlsa.
Grant dasturiga ariza topshirish haqida batafsil ushbu havola bilib olish mumkin.
Qoʻshimcha maʻlumotlar
Grant dasturiga ariza topshirish bilan bogʻliq qoʻshimcha savollar tuitiongrants@uu.se. emailiga yuborilishi mumkin;
Magistratura bosqichiga hujjat topshirish bilan bogʻliq qoʻshimcha savollarga masterprogrammes@uu.se emailiga murojaat qilish orqali javob olish mumkin.
