Magistratura talabalari uchun Shveysariyada xarajatlari qoplanadigan yozgi dastur — Lucerne Summer University

YUNESKO homiyligida magistratura talabalari uchun Shveysariyada xarajatlari qoplanadigan Lucerne Summer University: Ethics in a Global Context LSUE dasturi taqdim etiladi. Jami 20 nafar nomzod saralab olinishi rejalashtirilgan.

Dastur yosh talabalarga bugungi va ertangi kunning axloqiy masalalarini akademik sohalar, madaniyat va dinlar chegarasidan tashqarida oʻrganish hamda birgalikda muqobil yechimlarni izlash imkoniyatini yaratadi.

Jamiyatga barqaror taʼsir koʻrsatish uchun quyidagi maqsadlar koʻzlangan:

• Ishtirokchilar axloqiy qiyinchiliklarga qanday munosabatda boʻlishni oʻrganishlari uchun axloqshunoslikda qoʻllaniladigan maxsus usul va vositalarni oʻrgatish (oʻz sohalari boʻyicha);
• Ish muhitida axloqiy savollar va mavzularni hal qilish hamda boshqalarga maslahat berish imkonini berish;
• Koʻnikmalarni butun dunyo boʻylab birlashtirish uchun global tarmoqni yaratish;
• Ishtirokchilarda oʻz sohasi boʻyicha kerakli axloqiy sifatlarni shakllantirish uchun maxsus bilimlar berish.

Dastur 2026-yil 8-maydan 13-maygacha oʻtkaziladi.

Dastur haqida batafsil ushbu havola orqali maʼlumot olish mumkin.

• Yoʻnalishidan qatʼiy nazar barcha magistratura talabalari ishtirok etishi mumkin;
• Nomzod avval ushbu dasturda qatnashmagan boʻlishi shart;
• Ingliz tilini dasturda qatnashish darajasida bilish lozim. Chunki dastur toʻliq ingliz tilida olib boriladi;
• Ishtirokchi grantni yutishi uchun moliyaviy yordamga muhtoj boʻlishi kerak;
• Dastur tugaganida yakuniy maqola yozish lozim (10-12 bet atrofida);
• Talabgor bugun va kelajak uchun ahamiyatli global miqyosdagi axloqiy masalalarga qiziqishi kerak.

• Dasturda bepul qatnashish mumkin;
• Sayohat, turar joy va ovqatlanish xarajatlari qoplanadi;
• Dasturni muvaffaqiyatli tugatganlar kredit tizimi boʻyicha 6 ball (6 ECTS) bilan taqdirlanadi (Kredit ballarini oʻtkazishni tashkil qilish nomzodning zimmasida).

Maʼlumot uchun: ECTS (European Credit Transfer System) Yevropa kredit oʻtkazma tizimini anglatadi. Magistratura dasturi jami 120 ECTS kreditini oʻz ichiga oladi.

Dasturda qatnashmoqchi boʻlganlar ushbu havola orqali ariza topshirish mumkin.

Ariza topshirishda nomzod quyidagilarni koʻrsatishi kerak:

• Dasturning global va fanlararo tarmogʻiga qanday hissa qoʻshmoqchi ekanligini tushuntirish;
• Axloqiy koʻnikma va bilimlar orqali akademik tadqiqotlarda ijobiy taʼsirga qanday erishish mumkinligi haqida nomzod yaratgan rejasini tasvirlab berishi lozim.

Talab qilinadigan hujjatlar:

• CV (jadval shaklida taxminan bir sahifa);
• Ikkita professordan tavsiyanoma (har biri tavsiyanoma uchun bitta sahifa);
• Motivatsion xat (taxminan bir sahifa/maksimal 500 ta soʻz).

Eslatma: Hujjatning maksimal hajmi 20 MB dan oshmasligi va quyidagi formatlardan birida boʻlishi talab qilinadi: jpg, jpeg, gif, png, tif, txt, doc, docx, xls, xlsx, ppt, pptx, pdf. 

Muhim! Dasturda qatnashish uchun hujjat topshirish jarayoni 2025-yil avgust oyidan boshlanadi. Ariza topshirishning soʻnggi muddati ham shunda eʻlon qilinadi. 

Maʻlumot uchun:

• Email: lsue@unilu.ch;
• Tel: +41 41 229 50 00.

Quyidagi ijtimoiy tarmoqlar orqali qoʻshimcha maʼlumot olish mumkin:

• Facebook;
• Twitter;
• YouTube;
• Instagram;
• Linkedin;
• TikTok.