Maktab oʻquvchilari uchun biznes sohasi bo’yicha Wharton Global High School Investment Competition tanlovi

AQShning Pensilvaniya shtatida joylashgan Wharton University of Pennsylvania tomonidan har yili tashkillashtiriladigan Wharton Global High School Investment Competition bu maktab oʻquvchilari va oʻqituvchilar uchun bepul, global sarmoya kiritish tajribasini shakllantiruvchi tanlov hisoblanadi. Dastur Wharton Investment Simulator (WInS) platformasida boʻlib oʻtadi. Bu platforma universitet, maktab va moliyaviy xizmat sanoatidagi yetakchi birja bozori simulyatsiyasiyalaridan biridir. Dasturda 14-18 yosh oraligʻidagi 9-12-sinf oʻquvchilari 4-7 kishilik jamoa asosida ishtirok etishlari kerak boʻladi. Har bir jamoada uni boshqarish, ragʻbatlantirib turish, roʻyxatdan oʻtkazish bilan shugʻullanuvchi bitta yetakchi oʻqituvchi boʻlishi kerak.

Wharton Investment Simulator (WInS) platformasida tanlov jarayoni 2025-yil 30-sentyabrda boshlanib 6-dekabrgacha davom etadi. Dastur doirasida har bir jamoaga $100,000 virtual pul portfoliosini boshqarish vazifasi yuklanadi. Bu jarayonda ishtirokchilar sarmoya kiritishda strategiya qoʻllash, jamoa bilan ishlash, muloqot qilish, taxmin qilish, sarmoyani oshirish, kompaniya va sanoatlarni tahlil qilish kabi koʻplab koʻnikmalarni shakllantiradi va amaliyotda qoʻllaydi. Tanlovga jami 11 hafta ajratilgan boʻlib, shundan 10 haftasi treyding, qoʻshimcha bir hafta esa yakuniy hisobotni taqdim etish uchun ajratilgan. Ushbu vaqtni qanday taqsimlash, loyiha davomida qanchadan vaqt ajratish jamoaning oʻziga, tajribasi va qobiliyatiga bogʻliq.

Yetakchi oʻqituvchilar jamoalarini 2025-yil 17-iyundan 13-sentyabrgacha roʻyxatdan oʻtkazishlari mumkin.

Dastur haqida ushbu havola orqali batafsil maʼlumot olish mumkin.

Dasturda qatnashish uchun quyidagi talablar mavjud:

• Tanlovda 14 yoshdan 18 yoshgacha boʻlgan maktabning yuqori, yaʼni 9-12-sinf oʻquvchilari qatnashishlari mumkin;
• Dasturga biznes va moliya sohalariga qiziquvchi, ushbu yoʻnalishda bilim va malakasini oshirishni xohlovchi nomzodlar ariza topshirishi mumkin;
• Ishtirokchilardan birja bozoriga oid tajriba talab qilinmaydi;
• Dasturda nomzodlar 4-7 kishilik jamoa asosida ishtirok etishlari shart. Har bir jamoa tarkibida 4 tadan kam 7 tadan koʻp boʻlmagan ishtirokchi boʻlishi kerak. Jamoa tarkibini sunʼiy shakllantirish va faqat rasmiyatchilik uchun jamoa aʼzosini qoʻshib qoʻyish, uning jarayonda qatnashmasligi gʻirromlik hisoblanadi va bu tanlovdan chetlatilishga olib borishi mumkin. Bir nomzod birdan ortiq jamoa tarkibida qatnasha olmaydi;
• Har bir jamoa oʻziga bitta yetakchi oʻqituvchi tanlashi kerak. U jamoani boshqarish, ragʻbatlantirib turish, roʻyxatdan oʻtkazish bilan shugʻullanadi;
• Jamoa aʼzolarining barchasi bir maktabdan boʻlishi lozim. Agar maktabda turli yoʻnalishlar mavjud boʻlsa, oʻquvchilar va ularning yetakchi oʻqituvchisi bir yoʻnalishdan boʻlishi zarur;
• Uyda tahsil oladigan yoki shaxsiy oʻqituvchi orqali oʻqitiladigan oʻquvchilar ham dasturga ariza topshirishlari mumkin. Bu turdagi nomzodlar ushbu havola orqali yozma talabnoma joʻnatishlari va uni dastur maʼmuriyati tomonidan tanlov uchun roʻyxatga oʻtishdan avval tasdiqlatishlari zarur;
• Har bir jamoa oʻziga guruh sardori tayinlashi kerak;
• Nomzodlar 2025-yil 30-sentyabrgacha maktabni bitirmagan va diplom olmagan boʻlishi zarur.

Eslatma! 2025-2026-yilgi tanlov shartlari hali toʻliq eʻlon qilingani yoʻq, qabul iyun oyida ochiladi va shunda shartlar va qabul sanalari ham oʻzgarishi mumkin. 

Dastur talablari haqida ushbu havola orqali toʻliq maʼlumot olish mumkin.

Dasturning quyidagi foydali jihatlari mavjud:

• Barcha yarim final va final qatnashchilari maxsus sertifikatlarga ega boʻlishadi;
• Finalga chiqqan jamoadagi har bir ishtirokchi Future of the Business World, Essentials of Leadership, Moneyball Academy: Training Camp FLEX yoki Moneyball Academy: Training Camp yozgi onlayn dasturlarida qatnashish imkonini qoʻlga kiritadi;
• Finalga chiqqan 10 ta jamoaning har bir qatnashchisi Understanding Your Money onlayn kursida hech qanday toʻlovlarsiz oʻqish muvaffaqiyatiga sazovor boʻladi;
• Tanlovga biznes taʼlimi boʻyicha jahon yetakchisi The Wharton School mezbonlik qiladi. Finalga chiqqan jamoalar AQShning Pensilvaniya shtatida joylashgan ushbu maktabga tashrif buyurish imkoniga ega boʻladi;
• Ishtirokchilar qimmatli qogʻozlar va strategiyalarning qiziqarli dunyosi bilan tanishish, moliyaviy koʻnikmalarni oʻzlashtirish, jamoa bilan ishlash, yetakchilik va muloqot qobiliyatlarini rivojlantirish, butun dunyo jamoalari bilan raqobatlashish imkoniyatini qoʻlga kiritadi.

Eslatma! Tanlovning final bosqichi yaʼni, Global Finale in Philadelphiaga chiqqan jamoaning Filadelfiyaga borish-kelish, yashash va boshqa xarajatlari dastur tomonidan qoplanmaydi. Lekin ular Filadelfiyaga bora olmagan taqdirda final bosqichida videokonferensiya orqali onlayn qatnashishlari mumkin.

Dasturning foydali jihatlari haqida ushbu havola orqali toʻliq maʼlumotga ega boʻlish mumkin.

Tanlovga roʻyxatdan oʻtish jarayoni ikki bosqichda boʻlib oʻtadi:

1. Birinchi bosqichda yetakchi oʻqituvchi oʻzi roʻyxatdan oʻtishi kerak boʻladi. Bu jarayon quyidagicha amalga oshiriladi:

• Yetakchi maslahatchi shaxsiy kabineti uchun foydalanuvchi nomi va kalit soʻz oʻylab toping;
• Ishtirokchilarning maktab elektron manzili va qoʻshimcha ravishda tanlov xabarlari joʻnatiladigan yana bir elektron manzilni koʻrsating;
• Maktab nomi va veb sahifasi, shuningdek, maktab direktorining ism-familiyasi hamda manzilini kiriting;
• Jamoa uchun ochilgan kabinetni havola qiling (5 tagacha).

2. Ikkinchi bosqichda yetakchi oʻqituvchi Wharton Investment Simulator (WInS) treyding platformasida jamoa aʼzolarini roʻyxatdan oʻtkazadi. Bu jarayon 2025-yil 17-iyundan 13-sentyabrgacha davom etadi va quyidagicha amalga oshiriladi:

• Yuqori oʻng burchakdagi “Admin” soʻzining ustiga bosing;
• “Instructor Adminstration” soʻzining ustiga bosing;
• “Add Team” tugmasining ustiga bosing;
• Foydalanuvchi nomini kiriting. Jamoa sardorining ism-familiyasini, elektron manzili va maktabni bitiradigan yilini kiriting. Eslatma! Qolgan jamoa aʼzolarining maʼlumotlari 2025-yil 18-oktyabrdan soʻng kiritiladi;
• “Submit” tugmasini bosing, soʻng platforma avtomatik ravishda kalit soʻzni chiqarib beradi;
• Foydalanuvchi nomi va kalit soʻzni jamoa sardorlariga yetkazing;
• Har bir roʻyxatdan oʻtish jarayoni shu ketma-ketlikka amal qilinadi. Bir yetakchi oʻqituvchi 5 tagacha jamoani boshqarishi mumkin;
• Jamoalar 2025-yil 13-sentyabr Oʻzbekiston vaqti bilan soat 15:00dan kechikmagan holda roʻyxatdan oʻtkazilishi shart.

Eslatma! Oʻquvchilar oʻzlari ariza topshirishlari mumkin emas, aks holda tanlovga qatnashish uchun ruxsat berilmaydi. Oʻtgan yili tanlovda qatnashgan jamoalar bu yil uchun qaytadan ariza topshirishlari kerak boʻladi. Ariza topshirish davomida barcha soʻralgan qismlar toʻldirilishi kerak, badal puli mavjud emas. Shaxsiy kabinet har bir jamoa aʼzosi uchun alohida ochilmaydi, butun jamoa bir kabinet orqali qatnashadi.

Dasturning 2025-2026-yilgi soni uchun qabul iyun oyida ochiladi va qoʻshimcha maʻlumotlar ham shunda eʻlon qilinadi. Baʻzi qoʻshimchalar kiritilishi ham mumkin. 

Dasturning ketma-ketligi, tashkil qilinish jarayoni va dars rejalarini ushbu havola orqali yuklab olish hamda maʼlumot olish mumkin.

Avvalgi yillarda boʻlib oʻtgan Wharton Global High School Investment Competition haqida ushbu havola orqali maʼlumot olish mumkin.

Tanlov uchun jamoani shakllantirish boʻyicha qoʻshimcha yoʻriqnomalar bilan ushbu havola orqali tanishish mumkin.

Dastur haqida quyidagi ijtimoiy tarmoqlar orqali ham maʼlumot olish mumkin:

-Twitter;

-Facebook;

-LinkedIn;

-YouTube;

-Instagram.