Maktab oʻquvchilari uchun umumiy mukofot jamgʻarmasi 37 million soʻm miqdoridagi “Jadid bobomga maktub” tanlovi
-
30/06/2025 Qabul boshlanishi
-
Mukofot Moliyalash turi
-
Oʻzbekiston Davlat
-
20.08.2025 Oxirgi muddat
Umumiy maʻlumotlar
“Jadid” gazetasi tahririyati Oʻzbekiston Respublikasi maktabgacha va maktab taʼlimi vazirligi bilan hamkorlikda “Dolzarb 90 kun” loyihasi doirasida maktab oʻquvchilari uchun “Jadid bobomga maktub” tanlovini eʼlon qiladi. Umumiy mukofot jamgʻarmasi – 37 million soʻmni tashkil etadi.
Dasturdan maqsad maktab oʻquvchilari orasida Vatanga boʻlgan mehr-u muhabbat va sadoqatni kuchaytirish, milliy qadriyat va anʼanalar ruhini mustahkamlash, maʼrifatparvar jadid bobolarning ibratli faoliyatini mustaqil tahlil va talqin etishga chorlashdan iborat.
Dastur haqida batafsil ushbu havola orqali maʼlumot olish mumkin.
Maqbullik shartlari
- Dasturda barcha maktab oʻquvchilari qatnashishi mumkin;
- Jadid bobolardan biriga qoʻlda, husnixat bilan yozilgan, insho tarzidagi maktub qabul qilinadi.
Insho hakamlar hayʼati tomonidan 100 ballik tizim boʻyicha quyidagi mezonlar asosida baholanadi:
- Mazmun-mantigʻi, milliy qadriyat va anʼanalarga mosligi, jadidlar merosi haqida tasavvur darajasi va badiiy ifodasi – 30 ball;
- Ijodiy yondashuv va oʻziga xoslik – 20 ball;
- Til va uslub (lugʻat boyligi, grammatik toʻgʻrilik, badiiy vositalardan foydalanish) – 20 ball;
- Ezgulikka undashi, zamonaviy dunyo bilan hamohangligi – 20 ball;
- Noanʼanaviy yondashuv – 10 ball.
Muhim: Insholarni baholash jarayonida koʻchirmakashlik (yoki sunʼiy intellekt ishtiroki) aniqlangan taqdirda, material tanlovdan olib tashlanadi va media vositalar orqali mazkur insho plagiat (adabiy oʻgʻrilik) ekanligi eʼlon qilinadi.
Foydali tomonlari
Tanlov gʻoliblari diplom, jadid bobolar qalamiga mansub kitob jamlanmasi va quyidagicha pul mukofoti bilan taqdirlanadi:
- 1 ta birinchi oʻrin – 5 000 000 (besh million soʻm);
- 2 ta ikkinchi oʻrin – 4 000 000 (toʻrt million soʻmdan, jami: 8 mln.);
- 3 ta uchinchi oʻrin – 3 000 000 (uch million soʻmdan, jami: 9 mln.);
- 10 ta ragʻbatlantiruvchi oʻrin – 1 000 000 (bir million soʻmdan, jami: 10 mln. soʻm);
- Tanlov gʻoliblarining insholari Mustaqillik bayrami arafasida “Jadid” gazetasida chop etiladi;
- Birinchi oʻrinni egallagan gʻolib oʻzi oʻqiyotgan maktabda hayʼat aʼzolari, taniqli ijodkorlar tomonidan tantanali taqdirlanadi va maktab kutubxonasiga 1000 ta badiiy, ilmiy-ommabop kitob taqdim etiladi;
- Tanlov gʻoliblari va sovrindorlari matbuotda, xususan, “Jadid” gazetasining ijtimoiy tarmoqlardagi sahifalarida eʼlon qilinadi.
Qoʻshimcha maʻlumotlar
- Dasturga hujjat topshirish uchun oxirgi muddat: 20-avgust, 2025-yil;
- Email: jadidgzt@mail.ru;
- Murojaat uchun telefon: (77) 199-22-10/(95) 795-75-09;
- Telegram bot orqali ham murojaatlar qabul qilinadi;
- Tahririyat manzili: Toshkent shahri Shayxontohur tumani Navoiy koʻchasi 69-uy;
- Nomzodlar tomonidan tanlovda ishtirok etish uchun taqdim etilgan materiallar boʻyicha izoh yoki sharh berilmaydi hamda ular egalariga qaytarilmaydi.