Maktabgacha va maktab taʼlimi vazirligidan innovatsion gʻoyalarga ega oʻqituvchilar uchun “Yilning eng yaxshi oʻzbek tili oʻqituvchisi” tanlovi

Oʻzbekiston Respublikasi Maktabgacha va maktab taʼlimi vazirligi hamda Oʻzbekiston kasaba uyushmalari Federatsiyasi hamkorlikda oʻqituvchilarning taʼlim sifatini oshirishga qaratilgan innovatsion gʻoyalarini qoʻllab-quvvatlash, ularning pedagogik faoliyatini ommalashtirish maqsadida “Yilning eng yaxshi oʻzbek tili oʻqituvchisi” tanlovini eʼlon qiladi. Gʻoliblar diplom, pul mukofoti, monoblok va noutbuk bilan taqdirlanadi.

Tanlovda umumiy oʻrta taʼlim maktablarining ona tili va oʻzbek tili fani oʻqituvchilari “Men tavsiya etaman…” nomli video-taqdimotlari bilan ishtirok etishlari mumkin.

Tanlovning asosiy maqsadi ona tili (milliy sinflarda), oʻzbek tili (davlat tili sifatida) fanlarini oʻqitishda eng samarali metodlarni qoʻllash orqali oʻzbek tilining davlat tili va ona tili sifatidagi mavqeyini oshirish hamda maktab jamoasida vatanparvarlikni, tilni milliy qadriyat sifatida asrab-avaylashga befarq boʻlmaslikni targʻib qilish hisoblanadi.

Tanlov 2023-yil 22-sentyabrdan 20-oktyabrga qadar oʻtkaziladi.

Dastur haqida batafsil ushbu havola orqali maʼlumot olish mumkin.

• Tanlovda vazirlik tizimidagi umumiy oʻrta taʼlim maktablarining ona tili va oʻzbek tili fani oʻqituvchilari ishtirok etishlari mumkin;
• Oʻqituvchilar shaxsiy ish tajribasi misolida “Men tavsiya etaman…” nomli video-taqdimot yoki taqdimot (slayd) yaratishlari lozim.

Video-taqdimotga qoʻyiladigan talablar:

• Video-taqdimotning davomiyligi 5-7 daqiqagacha boʻlishi kerak;
• Har qanday ixtiyoriy qurilmadan foydalangan holda tasvirga olinishi mumkin.

Slaydlarga qoʻyilgan talablar:

• Microsoft Power Point dasturida tayyorlanishi kerak;
• Slaydlar soni maksimal 10 bet;
• Matnlar Times New Roman, 24 shriftda yozilishi lozim;
• Ranglardan, rasm va chizmalardan foydalanishda sifat va qulaylikka eʼtibor berilishi kerak.

Baholash mezonlari:

• Tinglab tushunishga doir koʻnikmalarni rivojlantiruvchi usullarning berilganligi;
• Nutq soʻzlash, gapirishga doir koʻnikmalarni rivojlantiruvchi usullarning berilganligi;
• Oʻqish va yozish koʻnikmalarini rivojlantiruvchi usullarning berilganligi;
• Har bir metod, texnologiyaga izoh, sharh, tushuntirishlarning berilganligi;
• Har bir metod, texnologiyani darsning qaysi qismida (uyga vazifa soʻrash berishda, yangi mavzu bayonida, mustahkamlash, takrorlash va boshqalar) foydalanishga tavsiya berilganligi;
• Har bir metod va texnologiyani qaysi mavzularda va qaysi sinflarda qoʻllashga tavsiyaning mavjudligi, ilmiy-metodik adabiyotlardan foydalanilganligi hamda ilmiy asoslangan maʼlumotlar bilan boyitilganligi; 
• Tavsiyalarning oʻziga xosligi, yangiligi, samaradorligi, qoʻllashda qulayligi;
• Grammatik, orfografik, uslubiy hamda tinish belgilari bilan bogʻliq xatoliklarning boʻlmasligi;
• Taqdimotda faqat matndan foydalanmasdan, mavzuni yoritishda zamonaviy shakl: animatsion, infografika va diagrammalardan foydalanilganligi;
• Taqdimotga mazmun va shakl jihatdan kreativ yondashuvi.

Eslatma: Har bir oʻqituvchi faqat bitta (ona tili yoki oʻzbek tili) fandan onlayn roʻyxatdan oʻtish va qatnashish huquqiga ega.

Tanlovning maqbullik shartlari bilan batafsil ushbu havola orqali tanishib chiqish mumkin.

Tanlovning respublika bosqichi gʻoliblari oʻzbek tili bayrami arafasida quyidagi mukofotlar bilan taqdirlanadilar:

• 1-oʻringa “Yilning eng yaxshi oʻzbek tili oʻqituvchisi” I darajali diplomi, 25 mln soʻm pul mukofoti;
• 2-oʻringa “Yilning eng yaxshi oʻzbek tili oʻqituvchisi” II darajali diplomi, monoblok;
• 3-oʻringa “Yilning eng yaxshi oʻzbek tili oʻqituvchisi” III darajali diplomi, noutbuk.

Tanlovda ishtirok etish istagida boʻlgan oʻqituvchilar 2023-yil 22-sentyabrdan 29-sentyabrga qadar Telegram bot orqali onlayn roʻyxatdan oʻtishi va taqdimotlarini video formatda joylashtirishi kerak.

Muhim: Oʻzi haqida toʻgʻri va toʻliq maʼlumot taqdim etmagan ishtirokchilar tanlovda ishtirok etmaydi.

• Dasturga ariza topshirish uchun oxirgi muddat: 29-sentyabr, 2023-yil (18:00);
• Tanlov gʻoliblarini eʼlon qilish va taqdirlash 21-oktabr Oʻzbek tili bayrami arafasida amalga oshiriladi;
• Tel: (71)202-09-09.

Tanlov quyidagi bosqichlarda oʻtkaziladi:

• 1-bosqich tuman (shahar): taqdimotlarni qabul qilish 22-sentabrdan 29-sentabrga qadar davom etadi. Taqdimotlar Hakamlar hayʼati tomonidan 3-6-oktabr kunlari koʻrib chiqiladi va gʻoliblar aniqlanadi.
• 2- bosqich (Qoraqalpogʻiston Respublikasi, Toshkent shahar va viloyatlar): birinchi bosqichda gʻolib deb topilgan taqdimotlar Hakamlar hayʼati tomonidan 9-10-oktabr kunlari koʻrib chiqiladi va gʻoliblar aniqlanadi.
• 3- bosqich: 20-oktabrga qadar Toshkent shahrida oʻtkaziladi.

Tanlov haqida quyidagi ijtimoiy tarmoqlar orqali qoʻshimcha maʼlumot olish mumkin:

• Facebook;
• Instagram;
• Telegram;
• Youtube.