Maʼlumotlar muhandisligi va sunʼiy intellekt boʻyicha Yevropada xarajatlari qoplangan holda oʻqish imkoniyati — DEAI Program

Maʼlumotlar muhandisligi va sunʼiy intellekt boʻyicha Yevropada oʻqish uchun grant dasturi — DEAI (Data Engineering and Artificial Intelligence) taqdim etiladi.

Ushbu dastur yuqori darajadagi, integratsiyalashgan xalqaro taʼlim dastur hisoblangan Erasmus Mundus Joint Master Programme dasturi boʻlib, bir nechta oliy taʼlim muassasalari tomonidan amalga oshiriladi. Dastur butun dunyo boʻylab eng yaxshi magistratura talabalariga toʻliq grant taqdim etishga qaratilgan.

Grant dasturi quyidagi universitetlar tomonidan amalga oshiriladi:

• Universit´e Libre de Bruxelles (ULB), Belgiya;
• Universitat Politècnica de Catalunya (UPC), Ispaniya;
• Technische Universität Wien (TUW), Avstriya;
• Università degli Studi di Padova (UniPD), Italiya;
• Université Claude Bernard Lyon 1 (UCBL), Fransiya.

Dastur magistratura bosqichi uchun 2 yillik oʻquv yilini (2026-2028-yillar) oʻz ichiga oladi va toʻliq ingliz tilida olib boriladi.

Dastur haqida batafsil ushbu havola orqali maʼlumot olish mumkin.

• Barcha davlat fuqarolari qatnashishi mumkin;
• Akkreditatsiyadan oʻtgan universitetdan bakalavr darajasiga ega boʻlish kerak (yaʼni 180 ECTS ga teng);
• Universitet World Higher Education Database (WHED) roʻyxatida boʻlishi yoki quyidagi universitet reytinglaridan biriga kiritilgan boʻlishi lozim:
  • The Times Higher Education;
  • Academic Ranking of World Universities (ARWU);
  • QS World University Rankings.
• Ingliz tilini CEFR boʻyicha B2 yoki unga teng darajada bilish lozim:
  • Cambridge General English FCE;
  • IELTS (Academic) — 5,5;
  • TOEFL (qogʻoz shakli) — 570;
  • TOEFL (kompyuter shakli) — 230;
  • TOEFL (internet orqali) — 72.
• Bakalavriat bosqichida asosiy mutaxassisligi kompyuter fanlari boʻlganlarga ustunlik beriladi;
• Dastur kompyuter fanlariga kuchli yoʻnaltirilgan va quyidagi boshlangʻich bilimlarga ega boʻlish talab etiladi:
  • Relyatsion maʼlumotlar bazalari boʻyicha kurs: SQL, relyatsion algebra va maʼlumotlar bazasini optimallashtirish;
  • Algoritmlar va maʼlumotlar tuzilmalari boʻyicha kurs;
  • Ehtimollar nazariyasi va statistika;
  • Modellashtirish tillari (masalan, UML va ER diagrammalar) bilan ishlash tajribasi;
  • Grafiklar nazariyasi;
  • Toʻplamlar nazariyasi va mantiq;
  • Dasturlash koʻnikmalari.

Saralash mezonlari:

• Bakalavriat dasturida oʻqilgan Kompyuter fanlari tegishli kredit foiziga toʻgʻri kelishi kerak;
• Yuqori akademik natijalarga ega boʻlish lozim;
• Boshqa taʼlimda Kompyuter fanlari boʻyicha olingan kreditlar miqdori hisobga olinadi;
• IT yoki BI (Business Intelligence) sohasida egallagan kasbiy tajriba yaʼni har bir ish yili uchun ball beriladi (egallangan lavozimga bogʻliq holda);
• Motivatsion xat va tavsiyanomaning talablarga mos ravishda yozilganligi.

Eslatma: Tanlov komissiyasi barcha arizalarni sinchkovlik bilan koʻrib chiqadi va har bir mezon boʻyicha nomzodlarga ball ajratadi. Shundan soʻng arizalar umumiy toʻplangan ball asosida reyting qilinadi. Ushbu reyting asosida tanlangan nomzodlar roʻyxati tuziladi.

Bakalavr darajasi boʻyicha Expected profiles and Pre-requisites hamda FAQ boʻlimlaridan maʼlumot olish mumkin.

Dastur haqida batafsil maʼlumot olish uchun ariza topshirish qoʻllanmasi (application manual) bilan tanishish lozim.

• Oʻqish toʻlovlari uchun yiliga Yevropalik talabalar uchun 4,500 yevro, boshqa davlat talabalari uchun 9,000 yevro miqdorida grant ajratiladi;
• Oylik stipendiya beriladi;
• Ishtirok xarajatlari (shu jumladan sugʻurta xarajatlari), safar va joylashish xarajatlari qoplanadi;
• Har bir oʻquv joyida turar joy topishga yordam beriladi.

Dasturga qiziqqanlar ushbu havola orqali ariza topshirishlari mumkin.

Hujjat topshirish quyidagi bosqichlardan iborat:

1. Onlayn ariza tizimida roʻyxatdan oʻtiladi.
2. Onlayn ariza shakli toʻldiriladi:
   1. Shaxsiy maʼlumotlar;
   2. Akademik malaka haqida maʼlumot;
   3. Tavsiyanomalar haqida maʼlumot;
   4. Ish tajribasi haqida maʼlumot;
   5. Til bilish darajasi haqida maʼlumotlar.
3. Talab qilingan hujjatlar tizimga yuklanadi:
   1. Majburiy hujjatlar;
   2. Ixtiyoriy hujjatlar.
4. Onlayn ariza shakli yuboriladi.

Talab qilinadigan majburiy hujjatlar:

• Rasm — yaqinda olingan shaxsiy fotosurat, pasport oʻlchamida, faqat jpg, jpeg, png yoki gif formatlarida boʻlishi kerak;
• Motivatsion xat (PDF formatda);
• Pasportning skanerlangan nusxasi (PDF formatda);
• CV — toʻliq ingliz tilida, Europass CV formatida yozish tavsiya beriladi (PDF formatda);
• Asosiy bakalavriat yoʻnalishi boʻyicha sertifikat (Main bachelor certificate);
• Rasmiy akademik transkriptlar;
• Asosiy bakalavriat yoʻnalishi uchun oʻzini baholash (Self-evaluation for the main bachelor);
• Boshqa bakalavriat/magistratura diplomlari;
• Universitet tomonidan tasdiqlangan boshqa bakalavriat yoki magistratura dasturiga oid akademik natijalar (PDF formatda);
• Boshqa yoʻnalishdagi diplomlar uchun oʻzini baholash (Self-evaluation for other degrees);
• Til bilish sertifikati.

Arizaga ilova qilinishi mumkin boʻlgan ixtiyoriy hujjatlar:

• Bakalavriat/Magistratura dissertatsiyasi (ingliz tilida va faqat PDF formatida);
• Olingan boshqa kurslar boʻyicha sertifikatlar (ingliz tiliga tarjima qilingan va faqat PDF formatida);
• Tavsiyanomalar (ingliz tilida va faqat PDF formatida).

Muhim: Bakalavriatning oxirgi bosqichida oʻqiyotgan talabalar diplomini hali olmagan boʻlsalar ham ariza topshirishlari mumkin.

• Grant dasturga hujjat topshirish uchun oxirgi muddat: 13-yanvar, 2026-yil (17:00);
• Oʻz-oʻzini moliyalashtirishga ariza topshirish uchun oxirgi muddat: 1-mart, 2026-yil (05:00);
• Email: deai_admissions@cs.ulb.ac.be;
• Takroran soʻraladigan savollarga javob bu yerda.