Markaziy Osiyodagi dolzarb masalalarini hal qilish boʻyicha maxsus grant ajratiladigan C5+1 yoshlar konsulligi talabalar tanlovi

C5+1 Yoshlar konsulligi Markaziy Osiyo va Afgʻonistondan boʻlgan lider talabalarga oʻzlarining hududlaridagi muammolarini yechish hamda tashabbuslari va gʻoyalarini amalga oshirishda yordam beradi. C5+1 bu liderlik qobiliyatini oshirish, qaror qabul qilish, ijtimoiy-iqtisodiy masalalar hamda tabiat muammolarini hal qilishga yordam berishni maqsad qilgan yoshlar jamiyati hisoblanadi. Dasturda belgilangan davlatlardan boʻlgan lider talabalar ishtirok etishlari mumkin. Ular Markaziy Osiyoda yoki oʻz davlatlarida dolzarb boʻlgan masala hamda unga boʻlgan yechimlarini taqdim etishlari kerak boʻladi. Gʻolib deb topilgan talabalarga esa oʻzlari taqdim etgan muammolarni yechish va loyihalarini amalga oshirish uchun grant ajratiladi.

Qirgʻiziston, Qozogʻiston, Oʻzbekiston, Tojikiston va Turkmaniston davlatlaridan boʻlgan talabalar roʻyxatdan oʻtishlari va dasturda ishtirok etishlari mumkin. Roʻyxatga olish jarayoni 2022-yil 6-noyabrgacha davom etadi.

Dastur haqida ushbu havola orqali batafsil maʼlumot olish mumkin.

Dasturda ishtirok etish uchun quyidagi talablar mavjud:

• Dasturga Qirgʻiziston, Qozogʻiston, Oʻzbekiston, Tojikiston va Turkmaniston davlatlaridan boʻlgan talabalar ishtirok etishlari mumkin;
• Nomzodlar C5+1 dasturlari hamda C5+1 yoshlar konsulligining ishlariga qiziqishi lozim;
• Dasturda qatnashmoqchi boʻlgan nomzodlar ijtimoiy-iqtisodiy va tabiat muhofazasiga oid muammolarni yechish hamda oʻzlari istiqomat qilayotgan hududdagi himoyasiz ijtimoiy guruhlarni qoʻllab-quvvatlash masalalariga qiziqishlari katta boʻlishi kerak;
• Dastur ingliz tilida boʻlib oʻtadi. Shuning uchun ham nomzodlar ingliz tilini yaxshi bilishlari zarur;
• Dasturda qatnashmoqchi boʻlganlar oʻzlarining davlatlaridan turib onlayn ravishda oʻz tashabbuslarini amalga oshirishga tayyor boʻlishlari lozim.

Dastur talablari haqida ushbu havola orqali toʻliq maʼlumot olish mumkin.

Dasturning quyidagi foydali jihatlari mavjud:

• Nomzodlar dasturda ishtirok etish orqali o'zlari taklif etgan muammolarga yechim topish hamda uni amalga oshirish orqali o'z davlatlari yoki hududlarida barqaror rivojlanishni o'rnatishlari mumkin bo'ladi. Ya'ni tanlab olingan ishtirokchilarga o'z tashabbuslarini amalga oshirish uchun maxsus grant ajratiladi;
• Dastur so'nggida nomzodlarga sertifikatlar taqdim etiladi;
• Markaziy Osiyodan bo'lgan yoshlar bilan fikr almashish, ularning g'oya va tashabbuslari bilan tanishish imkoniyati mavjud;
• Dastur yoshlarga o'zlarining tashabbuslarini amalga oshirishga yordam beradi. 

Dasturning foydali jihatlari haqida ushbu havola orqali ma'lumot olish mumkin. 

Dasturga ariza topshirish jarayoni 2022-yil 6-noyabr soat 22:59 (Bishkek vaqti bilan 23:59)gacha davom etadi.

Ariza topshirish jarayoni quyidagicha:

1. Elektron manzil, ism-familiya va tugʻilgan sanangizni kiriting;
2. Agar mavjud boʻlsa telegram raqamingizni yozing;
3. Istiqomat qilayotgan davlatingiz va viloyatingizni yozing;
4. Tahsil olayotgan universitetingiz, yoʻnalishingiz hamda bosqichingizni yozing;
5. C5+1 yoshlar konsulligi liderlik qobiliyati bor yoshlarni jalb qilishga harakat qiladi. Siz nega oʻzingizni liderman deb hisoblaysiz va C5+1 yoshlar konsulligiga qanday foyda keltirishingiz mumkin? C5+1 yoshlar konsulligi haqida nimalarni bilasiz kabi savollarga javob beruvchi 200 soʻzdan oshmagan javob yozing;
6. Markaziy Osiyo davlatlari yoki Afgʻoniston boʻyicha eng dolzarb deb hisoblagan masalangiz va ushbu masalaga qiziqishingiz sababini yozib qoldiring (100 soʻzdan oshmasligi kerak);
7. Siz nega ushbu masalaga qiziqayotganingiz va uni yechish boʻyicha oʻz takliflaringizni yozing (100 soʻzdan oshmasligi kerak);
8. Oʻzingiz qatnashayotgan va qatnashgan professional klub, jamoa yoki volontyorlik guruhlaridan ikkita asosiysining nomini yozing.

Eslatma! Saralash jarayonida birinchi, ikkinchi yoki uchinchi kurs talabalariga ustunlik beriladi. Nomzodlar toʻldirilgan ariza shakli, intervyu, dasturda qatnashishi kerak boʻlgan ayollar va erkaklar sonining mos kelishi, yozib qoldirilgan muammo hamda unga keltirilgan yechim, nomzodlar tahsil olayotgan universitet va boshqa xususiyatlarga koʻra baholanadi.

Dasturda qatnashish va ariza topshirish jarayoni haqida ushbu havola orqali toʻliq maʼlumot olish mumkin.

Dastur yuzasidan savollar tugʻilgan taqdirda ushbu havola orqali telegram kanalidan javob topish mumkin.

Dastur boʻyicha qoʻshimcha maʼlumotlarni quyidagi ijtimoiy tarmoqlar orqali topish mumkin:

-instagram;

-facebook;

-telegram.