Niderlandiyada huquq, iqtisod va boshqaruv bo'yicha magistrlik dasturlarida bepul oʻqish imkoniyatini taqdim etuvchi Utrecht Excellence Scholarship dasturi

Niderlandiyaning Utrecht universiteti iqtidorli talabalarni qoʻllab-quvvatlovchi Utrecht Excellence Scholorship Law, Economics and Governance International Talent Scholarship (UES-LEGITS) grant dasturiga taklif etadi. Grant dasturi universitetning 2022-yil sentyabrdan boshlanadigan huquq, iqtisod va boshqaruv yoʻnalishlaridagi magistrlik dasturlariga qabul qilingan yuqori salohiyatli talabalarga taqdim etiladi.

Grant dasturiga barcha davlat fuqarolari hujjat topshirishlari mumkin. Har yili taxminan 6 nafar yuqori akademik salohiyatga ega va tanlagan sohasidagi potensiali yuqori boʻlgan talabalarga taqdim etiladi.

Grant dasturiga hujjat topshirish uchun talaba ingliz tilida oʻqitiladigan huquq, iqtisod va boshqaruv fakulteti tomonidan taqdim etiladigan yoʻnalishlarning magistrlik dasturlaridan biriga hujjat topshirishi kerak boʻladi.

Grant sohiblari magistrlik darajasida oʻqish toʻlovidan toʻliq ozod etiladi va qoʻshimcha mablagʻ bilan taʼminlanadi.

Grant uchun nomzodlarga qoʻyiladigan talablar:

• Nomzod Niderlandiya oʻrta taʼlim darajasiga ega boʻlmasligi kerak;
• Huquq, iqtisod va boshqaruv oliy maktabining ingliz tilida oʻqitiladigan magistrlik dasturlaridan biriga 2022-yil 1-sentyabrdan boshlab qabul qilingan boʻlishi kerak.

Grant amal qiladigan magistrlik dasturlari bilan ushbu havola orqali tanishib chiqishingiz mumkin.

Nomzodlar quyidagi mezonlar asosida stipendiya uchun tanlab olinadi:

• Nomzodning akademik salohiyati va oldingi taʼlim natijalari, masalan, baholar, test ballari, nashrdan chiqqan maqola/ishlar, tavsiyanomalar asosida;
• Professional maqsadlari va rejalari, sohadagi potensiali;
• Ijtimoiy faolligi (darsdan tashqari faoliyati);
• Magistrlik dasturi uchun motivatsiya xatining sifati va dolzarbligi;
• Taqdim etilgan arizaning sifati (toʻliqlik, aniqlik, izchillik).

Dastur talablari bilan batafsil universitet rasmiy saytida tanishib chiqish mumkin.

• Yevropa Ittifoqi/YIHga aʼzo boʻlmagan davlatlar, jumladan Oʻzbekiston talabalarining bir yillik oʻqish toʻlovi toʻliq qoplanadi;
• Immigratsiya va Fuqarolikni Rasmiylashtirish Xizmati tomonidan bir yillik oʻqish uchun yashash ruxsatnomasi bilan bogʻliq talab qilinadigan daromad miqdoridagi mablagʻ bilan taʼminlanadi.

2 yillik magistrlik dasturida grant ikkinchi yilga uzaytirilishi mumkin.

1. Nomzod avval universitet magistrlik dasturlaridan biriga hujjat topshirishi lozim. Grant amal qiladigan magistrlik dasturlari bilan ushbu havola orqali tanishib chiqishingiz mumkin.
2. Magistrlik dasturiga hujjat topshirgandan soʻng, Osiris Online Application portali orqali onlayn ravishda grant uchun ariza toʻldirishni boshlash mumkin.
3. Osiris login maʼlumotlari kiritiladi va ‘New Application' (yangi ariza)boʻlimi tanlanadi.
4. Grant uchun moʻljallangan ariza (UES-LEGITS) savollariga javob beriladi va tavsiyanoma yuklanadi (magistrlik dasturi uchun taqdim etilgan tavsiyanomadan foydalanish mumkin).

Muhim: Magistrlik dasturiga topshirilgan hujjatlar koʻrib chiqilishi uchun 100 yevro ariza badalini toʻlash kerak.

Magistrlik dasturi talablari yoʻnalishlarga qarab farq qilishi mumkin.

Nomzodlardan grant dasturi uchun ariza va hujjatni topshirib boʻlgandan soʻng scholarships.rebo@uu.nl elektron pochta manzili orqali dastur komissiyasiga bogʻlanishi soʻralgan.