Niderlandiyaning Hague akademiyasidan xalqaro huquq bo'yicha tahsil olish uchun to'liq grant

Niderlandiyaning Gaaga xalqaro huquq akademiyasi tomonidan xalqaro huquq sohasida tahsil olayotgan talabalar va ushbu sohadagi huquqshunos, diplomat, advokat va shu kabi mutaxassislar uchun qishki va yozgi kurslar eʼlon qilingan. Darslar ingliz va fransuz tillarida olib boriladi va sinxron tarzda qolgan tillarga tarjima qilinadi. Shuning uchun ham nomzodlardan ingliz yoki fransuz tillaridan birini bilish talab qilinadi.

Dastur doirasida ishtirokchilarga huquq sohasidagi Public International Law va Private International Law kurslarida oʻqish imkoniyati yaratilgan. Dasturda grant orqali qatnashayotganlar ushbu kurslardan faqatgina bittasida, oʻz mablagʻi orqali qatnashayotganlar esa ikkalasida ham ishtirok etishlari mumkin boʻladi. Dasturda ajratilgan oʻrinlarning 15% foizi grant uchun, qolganlari esa oʻz hisobidan qatnashayotganlar uchun ajratiladi. Grant sohiblarining turar-joy, yoʻl va kursda oʻqish xarajatlari toʻliq qoplab beriladi. Dasturning yozgi kurslariga qabul jarayoni 2024-yil 1-noyabrdan Toshkent vaqti bilan 2025-yil 31-yanvargacha davom etadi.

Dastur haqida ushbu havola orqali toʻliq maʼlumot olish mumkin.

Dasturda ishtirok etish uchun quyidagi talablar mavjud:

• Dasturda barcha davlat fuqarolari ishtirok etishlari mumkin;
• Dasturga huquq sohasida kamida 3-kursda oʻqiyotgan talabalar yoki universitetni bitirib shu sohada faoliyat yuritayotganlar ariza topshirishlari mumkin. Agar nomzod universitetda aynan huquq sohasida emas, lekin xalqaro huquq sohasida maʼruza oʻqiladigan yoʻnalishda kamida 4 yil oʻqigan (4-kurs) boʻlsa ham ariza topshirish huquqiga ega;
• Ishtirokchilardan ingliz yoki fransuz tillaridan birini akademik darajada bilish talab qilinadi. Chunki darslar ingliz va fransuz tillarida olib boriladi;
• Nomzod ariza shaklini topshirish jarayonida (motivatsion xat yozish mobaynida) dasturda qatnashish uchun kuchli qiziqishini namoyon etishi lozim;
• Avval ham ushbu grantni yutib olgan nomzodlar grant uchun qaytadan ariza topshira olmaydilar;
• Dasturda grant orqali ishtirok etmoqchi boʻlganlar ikki kursdan faqat biri uchungina ariza topshirishlari mumkin.

Dastur talablari haqida ushbu havola orqali batafsil maʼlumot olish mumkin.

Dasturning quyidagi foydali jihatlari mavjud:

• Dasturda ishtirok etish xarajatlari toʻlab beriladi;
• Nomzodning yoʻl xarajatlari dastur maʼmuriyati tomonidan qoplanadi. Yoʻl xarajatlari uchun pul poyezd bilan keladiganlar uchun 2-klass, samolyotda keladiganlar uchun esa ekonom klassga yetadigan miqdorda beriladi. Bu miqdor Markaziy Osiyo, shuningdek Oʻzbekiston fuqarolari uchun 350 yevroni tashkil etadi;
• Ishtirokchilarning turar joy xarajatlari uchun ham kurs boshlanishidan oldin 600 yevro ajratiladi.

Eslatma! Ishtirokchilar dasturda oʻz hisoblaridan yoki grant orqali qatnashishlari mumkin. Qatnashchilarning 15% qismi uchun grant ajratiladi va kurs xarajatlari toʻliq qoplab beriladi. Ammo oʻz hisobidan ishtirok etadiganlar barcha xarajatlarni oʻzlari toʻlashlari kerak boʻladi. Ular uchun bir kursda qatnashish narxi 1300 yevro, ikki kursda qatnashish narxi esa 2300 yevro miqdorida boʻladi.

Dasturning foydali tomonlari haqida ushbu havola orqali maʼlumot olish mumkin.

Dasturda quyidagi yozgi kurslar mavjud:

• Public International Law kursi 2025-yil 7-25-iyul kunlari oʻtkaziladi;
• Private International Law kursi 2025-yil 28-iyul-15-avgust kunlari oʻtkaziladi.

Dasturda grant asosida roʻyxatdan oʻtish uchun quyidagilar talab qilinadi:

• Eng avvalo, dastur shartlari bilan tanishib chiqish lozim;
• Ariza topshirishdan avval barcha hujjatlarni tayyorlab olish kerak;
• Pasport yoki ID karta nusxasi;
• Shaxsiy rasm;
• Agar nomzod hali ham talaba boʻlsa universitetda tahsil olayotganlik toʻgʻrisidagi maʼlumotnoma soʻraladi;
• Agar nomzod ishlayotgan boʻlsa ish joyidan maʼlumotnoma talab qilinadi;
• Nomzodning universitetdan olgan ilmiy darajasini isbotlovchi diplom yoki uning nusxasini topshirish kerak. Agar nomzod hali universitetni tamomlamagan boʻlsa baholar transkripsiyasi kerak boʻladi;
• CV (rezyume);
• 1,5 betdan koʻp boʻlmagan kompyuterda yozilgan motivatsion xat;
• Xalqaro huquq sohasi professori tomonidan berilgan tavsiyanoma. Tavsiyanoma uni yozgan professorning shaxsan oʻzi tomonidan ushbu havola orqali elektron manzilga joʻnatilishi zarur.

Dasturda oʻz hisobidan qatnashadiganlardan quyidagilar talab qilinadi:

• Eng avvalo dastur shartlari bilan tanishib chiqish lozim;
• Ariza topshirishdan avval barcha hujjatlarni tayyorlab olish kerak;
• Pasport yoki ID karta nusxasi;
• Shaxsiy rasm;
• Agar nomzod hali ham talaba boʻlsa oʻqishga qabul qilinganlik toʻgʻrisidagi maʼlumotnoma soʻraladi;
• Agar nomzod ishlayotgan boʻlsa ish joyidan maʼlumotnoma talab qilinadi;
• Nomzodning universitetdan olgan ilmiy darajasini isbotlovchi diplom yoki uning nusxasini topshirish kerak. Agar nomzod hali universitetni tamomlamagan boʻlsa baholar transkripsiyasi kerak boʻladi.

Eslatma! Nomzod grant yoki oʻz hisobidan qatnashishiga qarab soʻraladigan hujjatlar farq qilishi mumkin. Agar topshirilayotgan hujjat ingliz yoki fransuz tilida boʻlmasa uni ingliz yoki fransuz tillaridan biriga tarjima qilish soʻraladi. Tarjima rasmiy boʻlishi lozim. Ariza natijalari 2-4 hafta ichida eʼlon qilinadi.

Ariza topshirish jarayonida quyidagilarga eʼtibor berish lozim:

• Dasturga roʻyxatdan oʻtish jarayoni 1-noyabrdan boshlanadi;
• Oxirigacha yakunlanmagan ariza shakli qabul qilinmaydi;
• Roʻyxatdan oʻtish jarayoni va dastur uchun foydalanilgan barcha e-mail manzillari bir xil boʻlishi kerak;
• Ariza shaklini faqatgina bir marta onlayn shaklda toʻldirish soʻraladi. Bir martadan ortiq toʻldirilgan yoki oflayn shaklda joʻnatilgan arizalar qabul qilinmaydi;
• Rasmdan tashqari, ariza uchun joʻnatilgan barcha hujjatlar pdf shaklida boʻlishi lozim;
• Ariza topshirish jarayonida muammolar yuzaga kelgan taqdirda boshqa internet brauzeri orqali urinib koʻrish tavsiya qilinadi.

Dasturga ariza topshirish haqidagi qoʻshimcha maʼlumotlar bilan ushbu havola orqali tanishish mumkin.

Dastur boʻyicha berilgan qoʻshimcha savollar va ularga berilgan javoblar bilan ushbu havola orqali tanishish mumkin.

Maʼlumot uchun:

E-mail: info@hagueacademy.nl;

Tel: 0031 – 70 -3024242.

Dastur haqida quyidagi ijtimoiy tarmoqlar orqali ham qoʻshimcha maʼlumot olish mumkin:

-facebook;

-twitter;

-instagram;

-linkedIn;

-youtube.