Norvegiyadagi ISFiT 2027 xalqaro talabalar festivali — bepul turarjoy va oziq-ovqat bilan ishtirok eting

ISFiT (International Student Festival in Trondheim) — 2027-yilning 11-21-fevral kunlari Norvegiyaning Trondxaym shahrida boʻlib oʻtadigan dunyodagi eng yirik xalqaro talabalar festivalidir. Dastur butun dunyodan 350 nafar faol talabani global muammolarni muhokama qilish hamda madaniy almashinuv loyihalarida ishtirok etish uchun birlashtiradi.

Festivalning 2027-yilgi mavzusi 'Changing Winds' (Oʻzgarishlar shamoli) deb nomlangan boʻlib, u yoshlarning siyosiy, iqlimiy va global oʻzgarishlar sharoitida kelajakni shakllantirishdagi roliga bagʻishlanadi. Ishtirokchilar festival davomida turli munozaralar, vorkshoplar, debatlar, san'at va musiqa tadbirlarida qatnashadilar.

• Dunyodagi istalgan davlat, jumladan Oʻzbekiston fuqarolari ham ariza topshirishlari mumkin;

• 2027-yilning bahorgi semestrida rasman talaba (bakalavr, magistr yoki PhD) maqomiga ega boʻlish lozim;

• Dastur faoliyatida erkin qatnashish uchun ingliz tilini yaxshi bilish talab etiladi;

• Tashkilotchilar nomzodlarni tanlashda akademik koʻrsatkichlar yoki ish tajribasiga emas, balki ularning motivatsiyasi va yangi gʻoyalarga ochiqligiga e'tibor berishadi;

• Hujjat topshirish vaqtida ta'lim muassasasida oʻqiyotganlikni tasdiqlovchi ma'lumotnoma (enrollment certificate) taqdim etilishi kerak.

• Festivalda ishtirok etish mutlaqo bepul;

• Tashkilotchilar barcha qabul qilingan ishtirokchilarni bepul oziq-ovqat va turarjoy bilan toʻliq ta'minlaydi;

• Nomzodlar yoʻl xarajatlarini qoplash uchun qoʻshimcha moliyaviy yordam (travel grant) olish uchun ariza topshirishlari mumkin;

• Dunyoning turli burchaklaridan kelgan tengdoshlar va soha mutaxassislari bilan professional hamda shaxsiy aloqalar oʻrnatish imkoniyati yaratiladi;

• Madaniy va ijtimoiy tadbirlarda bepul qatnashish imkoniyati taqdim etiladi.

Dasturda hujjat topshirish quyidagi bosqichlardan iborat:

1. Ariza topshirish 2026-yil 7-iyun kuni boshlanadi va 2-avgust kuni Toshkent vaqti bilan soat 02:59 gacha (23:59 CEST) davom etadi;

2. Nomzodlar ISFiT rasmiy arizalar portali — Participant Web orqali roʻyxatdan oʻtishlari lozim;

3. Onlayn ariza shaklida shaxsiy ma'lumotlar, qiziqishlar va festivalda qatnashish motivatsiyasi haqidagi savollar toʻldiriladi;

4. Oʻquv muassasasidan oʻqish joyi haqida ma'lumotnoma (ingliz yoki boshqa tillarda boʻlishi mumkin) yuklanadi.

Muhim: Agar nomzodda 2027-yil bahorgi semestr uchun oʻqish joyidan ma'lumotnoma hali tayyor boʻlmasa, undan oldingi semestr hujjatini yoki talabalik guvohnomasini yuklashi mumkin. Biroq dasturga qabul qilingandan soʻng yangi ma'lumotnomani taqdim etish majburiydir.

Muhim sanalar:

• Arizalar qabuli: 2026-yil 7-iyun – 2-avgust;

• Natijalar e'lon qilinishi: 2026-yil sentyabr oyi oʻrtalaridan boshlab.

Tashkilotchilar bilan bogʻlanish: Savollar yuzasidan question@isfit.no elektron pochta manzili orqali bogʻlanish mumkin.

Viza haqida ma'lumot: Norvegiyaga kirish uchun viza talab qilinadigan ishtirokchilar ushbu vizani oʻzlari rasmiylashtirishlari lozim. Batafsil ma'lumotni Norvegiya migratsiya xizmati (UDI) rasmiy saytidan olishingiz mumkin.