Oksford universitetida magistratura va doktorantura bosqichini istalgan sohada oʻqish uchun 200 o'rinli toʻliq moliyalashtiriladigan Clarendon granti

01/09/2022 Qabul boshlanishi
Toʻliq Moliyalash turi
Buyuk Britaniya Davlat
15.01.2023 Oxirgi muddat

Muhim tafsilotlar

Kimlar uchun

Oliy ma'lumotli (bakalavr), Magistr talabasi, Oliy ma'lumotli (magistr), PhD talabasi , Falsafa fanlari doktori
Dastur tili

Ingliz tili
Yosh chegarasi

Chegaralanmagan

Doʻstlar bilan ulashing

Umumiy maʻlumotlar

Clarendon granti har yili dunyoning turli burchaklaridan boʻlgan bakalavr bosqichini tamomlagan turli soha vakillari uchun toʻliq moliyalashtiriladigan grantni eʼlon qiladi. Grant magistratura va doktorantura bosqichini Oksford universitetida oʻqish imkonini yaratib beradi. Shuningdek, ishtirokchilar nafaqat uzluksiz taʼlim (full-time), balki sirtqi taʼlim (part-time) shaklida oʻqish uchun ham ariza topshirish imkoniga egalar. Oksford dunyoning eng nufuzli universitetlaridan biri hisoblanadi. Clarendon granti eʼlon qilingan yil, yaʼni 2001-yildan boshlab 2,500 dan ortiq nomzodlar grant sohibiga aylangan. Ushbu dastur nomzodlarga nafaqat hayotlarida burilish nuqtasini yasovchi Oksford universitetida oʻqish imkonini, balki jamiyatda uzoq davom etadigan ijtimoiy, akademik va professional aloqalarni oʻrnatishga yordam beradi.

2022-yil dasturga 200 dan ortiq nomzodlar saralab olinadi. Yanvar oyigacha Oksford universitetiga hujjat topshirganlar Clarendon granti uchun alohida ariza topshirishlari shart emas, yaʼni avtomatik ravishda grant nomzodiga aylanishadi. Dastur ishtirokchilarining oʻqish kontrakti va boshqa xarajatlari toʻliq qoplab beriladi, shuningdek, talabalar maʼnaviy jihatdan ham qoʻllab-quvvatlanadi. Grant sohiblari oʻqish mobaynida 15609 funt sterling stipendiyani ham qoʻlga kiritishadi. Dasturga ariza qabuli qilish 2023-yilning 15-yanvarigacha davom etadi.

Dastur haqida ushbu havola orqali batafsil maʼlumot olish mumkin.

Maqbullik shartlari

Dasturda ishtirok etish uchun quyidagi talablar mavjud:

Nomzodlar 2023-yil 15-yanvarga qadar Oksford universitetidan oʻzlariga tegishli yoʻnalishni tanlab hujjat topshirishgan boʻlishlari lozim;
Ishtirokchilar ingliz tilini bilishlari shart. Sertifikatning soʻraladigan bali esa nomzod topshiradigan yoʻnalishiga qarab farq qiladi;
Dasturda barcha millat vakillari oʻzlari istagan yoʻnalishdagi magistratura yoki doktorantura bosqichida oʻqishlari mumkin. Grantning alohida ajralib turadigan jihati shundaki, ushbu dastur butun dunyo boʻylab akademik koʻrsatkichi yuqori, faol va harakatchan talabalarni saralab oladi;
Saralash jarayonida nomzodlarning akademik koʻrsatkichlari va muvaffaqiyatlariga asosiy eʼtibor qaratiladi. Ishtirokchilarning akademik koʻrsatkichlari GPA tizimida 4dan kamida 3,7 boʻlishi lozim (balli tizimda 100 balldan 96 ballga toʻgʻri keladi);
Nomzodlar grantni yutish va universitetda oʻqishga boʻlgan ishtiyoqi, qobiliyati va akademik potensiallarini ariza topshirish jarayonida, yaʼni motivatsion xat, tavsiyanoma va tadqiqot rejasi kabi hujjatlarda namoyon qilib bera olishlari lozim. Saralash jarayonida ushbu hujjatlar asosiy oʻrin tutadi.

Dastur talablari haqida ushbu havola orqali batafsil maʼlumot olish mumkin.

Foydali tomonlari

Dasturning quyidagi foydali jihatlari mavjud:

Dastur gʻoliblari universitetda oʻqish uchun kontrakt pulidan ozod qilinadilar;
Talabalarga oʻqish davomida 15609 funt-sterling miqdorida stipendiya taqdim etiladi;
Oʻqish davomidagi yashash xarajatlari ham grant tomonidan qoplab beriladi. Shu asnoda dastur maʼmuriyati talabalarning faqatgina oʻqishga eʼtibor qaratishlarini taʼminlashni rejalashtirgan;
Yaratib berilgan imkoniyatlar orqali grant sohiblari oʻqish davomida Oksforddagi aktiv hayotni yashash imkoni va eng muhimi, darslardan boʻsh vaqtda dam olish hamda yangi doʻstlar orttirish imkoniga ega boʻlishadi;
Grantning sirtqi taʼlim (part-time) shaklida oʻqiyotgan talabalariga esa faqatgina oʻqish bilan bogʻliq toʻlovlar toʻlab beriladi.

Dasturning foydali jihatlari haqida ushbu havola orqali koʻproq maʼlumot olish mumkin.

Hujjat topshirish

Dasturga ariza topshirish jarayoni quyidagicha:

Oksford universitetining kerakli yoʻnalishi tanlanadi;
Ariza topshirish jarayoni bilan bogʻliq yoʻriqnoma koʻrib chiqiladi;
Dastur talablari bilan tanishib chiqiladi;
Til bilish darajasi boʻyicha talablar haqida maʼlumot olinadi;
Kerakli yoʻnalishga kirish orqali ariza toʻldirish qismiga oʻtiladi;
Soʻralgan hujjatlar joʻnatiladi;
Ariza toʻlovi amalga oshiriladi (75 funt-sterling).

Eslatma! Agar nomzodlar Oksford universitetining magistratura yoki doktorantura yoʻnalishlarida biriga yanvargacha ariza joʻnatishsa, ularning arizalari avtomatik ravishda Clarendon granti uchun koʻrib chiqiladi. Yaʼni, yanvargacha ariza topshirganlar grant uchun ariza joʻnatishlari shart emas. Arizalarni koʻrib chiqish jarayonida dastur maʼmuriyati dunyo boʻylab eng olgʻir va bilimdon talabalarni tanlab olishga harakat qiladi.

Grantning koʻrib chiqilish jarayoni quyidagicha:

Dekabrdan yanvar oyigacha tanlangan yoʻnalishga mos ravishda Clarendon granti uchun ariza topshirish jarayoni boʻlib oʻtadi;
Nomzodlarning arizalari oʻz har bir yoʻnalishning masʼullari tomonidan koʻrib chiqiladi. Baholash jarayonida nomzodlarning akademik koʻrsatkichlari hamda yutuqlari inobatga olinadi;
Oksfordga oʻqishga qabul qilinganlar orasidan Clarendon granti talablariga mos keladigan nomzodlar roʻyxati tanlab olinadi;
Universitet fakultetlari tomonidan fevral va mart oylari oraligʻida Clarendon grantining yoʻnalishlar boʻyicha taqsimlanish jarayoni boʻlib oʻtadi. Natijalar ariza topshirilgan kundan boshlab 8-10 hafta ichida eʼlon qilinadi;
Grant gʻoliblari aniqlanganidan soʻng, grant maʼmuriyati ular bilan bogʻladi;
Grant sohibiga aylanganlar aprel oyining oxirigacha e-mail orqali eʼlon qilinadi;
Ariza topshirgan nomzodlarning soni koʻpligi tufayli, arizasi qabul qilinmagan nomzodlar bilan aloqaga chiqilmasligi mumkin. Shuning uchun ham agar iyun oyigacha arizalar natijasi joʻnatilmasa, bu afsuski nomzodning grantga tavsiya qilinmaganligini bildiradi;
Agarda grant sohiblaridan birortasi oʻqishdan voz kechsa, uning oʻrniga oʻqish uchun yozgi qabul eʼlon qilinadi, ammo bu holat kamdan kam kuzatiladi.