Oliy va oʻrta maxsus taʼlim vazirligidan oliy taʼlim muassasalari talabalari uchun respublika miqyosida o o'tkaziluvchi “Yil talabasi-2021” tanlovi

Oʻzbekiston Respublikasi Oliy va oʻrta maxsus taʼlim vazirligi tomonidan talaba yoshlarni ragʻbatlantirish, faol talabalarni moliyaviy jihatdan qoʻllab-quvvatlash maqsadida “Yil talabasi-2021” tanloviga start berildi.

Tanlovning asosiy maqsadi jamiyatga, davlatga yetuk yosh, raqobatbardosh kadrlarni yetishtirib berish, yoshlarni vatanparvarlik ruhida tarbiyalash, intellektual salohiyatini oshirish, oliy oʻquv yurtlaridagi iqtidorli talabalarni aniqlash, ularning oʻz salohiyatlarini namoyon etishlariga imkoniyatlar yaratish, jamoatchilik, fidoyilik fazilatlarini shakllantirish, talabalik nufuzini oshirish hamda ragʼbatlantirishdan iborat.

Tanlov nizomi bilan batafsil ushbu havola orqali tanishish mumkin.

Tanlovning oliy taʼlim muassasasidagi bosqichi noyabr oyida oʻtkaziladi. Tanlovning respublika bosqichi (onlayn tarzda) dekabr oyida oʻtkaziladi. Tanlovda gʻolib boʻlgan talabalar diplom, esdalik sovgʻa va pul mukofoti bilan taqdirlanadilar.

• Tanlovda oliy taʼlim muassasasida uzliksiz (akademik taʼtilsiz) kunduzgi taʼlim shaklida oʻqib kelayotgan 2-,3-,4-kurs talabalari ishtirok etishi mumkin.

Tanlov quyidagi nominatsiyalar boʻyicha oʻtkaziladi:

a) “Yilning eng faol bilimdon talabasi” (oʻz mutaxassisligi boʻyicha), bunda talabaning fanlarni oʻzlashtirishi va oʻquv jarayonlardagi ishtiroki va faolligi, chop etilgan maqola va tezislari hamda ularning mazmun-mohiyati, dolzarbligiga oid ishlar koʻrib chiqiladi;

b) “Yilning eng faol targʻibotchi talabasi”, bunda talabaning oliy taʼlim muassasasi jamoat ishlaridagi va boshqa jamoat tashkilotlari faoliyatidagi amaliy ishtiroki, faollik darajasi, targʻibotchi sifatidagi namunaviy ishlari, tashkilotchilik qobiliyati va shu asosda oʼzi tashkil etgan tadbirlar mazmuni, erishgan yutuqlari koʻrib chiqiladi;

d) “Yilning eng faol ixtirochi-innovator talabasi”, bunda joriy yilda talaba tomonidan yaratilgan ilmiy ishlar, ixtirolar, innovatsion gʻoyalari, ratsionalizatorlik takliflari, ularning yangiligi, dolzarbligi va ilmiy ahamiyati koʻrib chiqiladi;

e) “Yilning eng faol sportchi talabasi”, bunda joriy yilda talabaning xalqaro va respublika miqyosidagi oʻtkazilgan sport musobaqalaridagi yutuqlari va erishgan natijalari koʻrib chiqiladi;

f) “Yilning eng faol bloger talabasi”, bunda talabaning joriy yilda ijtimoiy tarmoqlarda oʻzi yaratgan taʼlim olishga talaba-yoshlarni targʻib qiluvchi ishlanmalari va oliy taʼlim tizimida olib borilayotgan islohotlarni yoritishda faollik darajasi hamda ushbu sohada erishgan yutuqlari koʻrib chiqiladi;

g) “Yilning eng faol ijodkor talabasi”, bunda talabaning ozi tanlagan mutaxassisligi yoʻnalishidan qat‟iy nazar musiqa, adabiyot, sanat va teatr sohasidagi qiziqishlari va joriy yilda erishgan natijalari koʻrib chiqiladi;

h) “Yilning eng faol tadbirkor talabasi” (xotin-qizlar uchun), bunda joriy yilda mustaqil ravishda tadbirkorlik faoliyatini yolga qoʻygan talaba-qizlarning erishgan yutuqlari hamda yoshlarni ish bilan taʼminlaganlik darajasi koʻrib chiqiladi.

Nominatsiyalar boʻyicha birinchi bosqichda 1, 2 va 3-oʻrinlarni egallagan gʻolib va sovrindorlar tegishli ravishda taqdirlanadilar:

• 1-oʻrin sohibi bazaviy hisoblash miqdorining 8 barobari miqdorida;
• 2-oʻrin sohibi bazaviy hisoblash miqdorining 6 barobari miqdorida;
• 3-oʻrin sohibi bazaviy hisoblash miqdorining 4 barobari miqdorida moddiy ragʻbatlantiriladi.

Tanlovning Respublika bosqichida har bir nominatsiyalar boʻyicha 1, 2 va 3-oʻrin sovrindorlari boʻlgan ishtirokchilar tanlov statuetkasi, guldasta, Oliy va orta maxsus taʼlim vazirligining tegishli darajadagi diplomlari va:

• 1-oʻrin sohibi bazaviy hisoblash miqdorining 15 barobari miqdorida pul mukofoti:
• 2-oʻrin sohibi bazaviy hisoblash miqdorining 10 barobari miqdorida pul mukofoti;
• 3-oʻrin sohibi bazaviy hisoblash miqdorining 8 barobari miqdorida pul mukofoti bilan taqdirlanadi.

Tanlovning oliy taʼlim muassasasi bosqichida ishtirok etish istagini bildirgan talabalar tomonidan taqdim etilgan hujjatlar toʻplami tegishli fakultet dekanati tomonidan saralanadi va noyabr oyining ikkinchi oʻn kunligida hujjatlar toʻplamini tanlov komissiyasiga taqdim etiladi.

Ishtirokchiga tegishli boʻlgan quyidagi hujjatlar toʻplami fakultet dekanati tomonidan tayyorlanadi va tanlov komissiyasiga taqdim etiladi:

• tanlov ishtirokchisining qobiliyati, fanlarni oʻzlashtirish darajasi, yetakchilik qobiliyati, erishgan yutuqlari, darslardagi faol ishtiroki, talabalarga oʻrnak boʻladigan jihatlari va jamoat ishlaridagi faoliyati haqidagi maʼlumotlar bayon etilgan ikki betdan oshmaydigan hajmdagi taqdimnoma;
• tanlov ishtirokchisining fanlarni oʻzlashtirish natijalari aks etgan hujjatlar (baholarni qayd etish varaqalari, talabaning baholarni oʼzlashtirish sinov daftarchasi) nusxalari;
• tanlov ishtirokchisining nashr etilgan ilmiy, ilmiy-uslubiy, ijodiy ishlari, ularga tegishli mutaxassislardan olingan taqrizlar bilan birga va ijodiy ishlarning elektron shakli;
• xalqaro va respublikamiz miqyosida oʻtkazilgan tadbirlar, tanlovlarda faxriy yorliqlar va diplomlar bilan taqdirlanganligi toʻgʻrisidagi maʼlumotlar (nusxalari ilova qilinadi);
• grantlarda ishtirok etganligi toʻgʻrisidagi maʼlumotnoma, grantning nomi, moliyalashtirish hajmi, ishtirokning shakli va darajasi koʻrsatiladi;
• konferensiyalardagi ishtiroki haqidagi maʼlumotlar, ilmiy ishlar roʻyxati va ilmiy ishlar nusxalari ilova sifatida taqdim etiladi; hujjatlar toʻplamiga kiritilgan materiallar va axborotlar joriy yil davomida chop etilgan boʻlishi lozim.

Tanlov komissiyasi tomonidan ishtirokchilar taqdim etilgan hujjatlar 25-noyabrgacha koʻrib chiqiladi. Tanlovning oliy taʼlim muassasasi bosqichi gʻoliblari 30-noyabrgacha aniqlanib, keyingi respublika bosqichga tavsiya etiladi.

Tanlov komissiyalari tanlovning respublika bosqichiga taqdim etilgan ishtirokchilarning hujjatlarini 10 ish kuni mobaynida koʻrib chiqadi hamda har bir nominatsiya boʻyicha komissiya aʼzolari tomonidan ishlab chiqilgan mezonlar asosida tanlov ishlari baholash orqali har bir nominatsiya boʻyicha gʻoliblar (1, 2 va 3-oʻrin) aniqlanadi. Tanlov komissiyalari majlislari bayonnomalari Tashkiliy qoʻmita raisi tomonidan tasdiqlanadi.

Tanlov haqida qoʻshimcha maʼlumotlar bilan ushbu havola orqali maʼlumot olish mumkin.