Oʻzbekiston Respublikasida istiqomat qiluvchi 10 yoshdan 30 yoshgacha boʻlganlar uchun “Yosh kitobxon” tanlovining 2022-yilgi mavsumi. Bosh mukofot — yengil avtomobil

Oʻzbekiston Respublikasi Yoshlar ishlar agentligi hamda Oʻzbekiston Yoshlar ittifoqi Markaziy kengashi tomonidan 2017-yildan beri oʻtkazilib kelinayotgan mazkur “Yosh kitobxon” tanlovining 2022-yilgi mavsumi ochiq deb eʼlon qilinadi.

Ushbu tanlov yoshlarning barcha qatlamini kitob oʻqishga jalb etish, ularning ongida Vatanimiz tarixi, umuminsoniy qadriyatlarga nisbatan bilim va koʻnikmalarini yuksaltirish hamda ular oʻrtasida kitobxonlik madaniyatini keng ommalashtirishni oʻz oldiga maqsad qilgan.

Tanlov quyidagi 3 ta yosh toifasi boʻyicha alohida-alohida tartibda oʻtkaziladi:

• 10-14 yoshgacha boʻlgan yoshlar;
• 15 yoshdan 19 yoshgacha boʻlgan yoshlar;
• 20 yoshdan 30 yoshgacha boʻlgan yoshlar.

Tanlov uch bosqichda tashkil etiladi:

• 1-bosqich: Tanlovning arizalar qabul qilish va saralash bosqichi boʻlib, unda tanlovda ishtirok etish istagida boʻlgan yoshlardan arizalar qabul qilinadi;
• 2-bosqich: Tanlovning hududiy (Qoraqalpogʻiston Respublikasi, viloyatlar hamda Toshkent shahar) bosqichi boʻlib, dekabr-yanvar-fevral oylari davomida boʻlib oʻtadi va “Badiiy asarlar bilimdoni” sharti hamda “Tezkor savol-javob” shartlari orqali nomzodlar saralab olinadi;
• 3-bosqich: Tanlovning Respublika bosqichi boʻlib, aprel oyining birinchi oʻn kunligida oʻtkaziladigan “Kitobxonlik haftaligi” doirasida teletanlov shaklida oʻtkaziladi. Ushbu bosqichda nomzodlar 5 ta shart: “Badiiy asarlar bilimdoni”, “Tezkor savol-javob”, “Buyuk mutaffakir va adib”, “Sheʼriyat” hamda “Erkin mavzu” shartlari orqali tanlov gʻolibiga aylanadilar.

Dastur haqida batafsil ushbu havola orqali tanishish mumkin.

Dasturda ishtirok etish uchun nomzodlardan quyidagilar talab etiladi:

• Tanlovda millati, irqi, dini, ijtimoiy kelib chiqishi va tilidan qatʼi nazar 10 yoshdan 30 yoshgacha boʻlgan Oʻzbekiston respublikasidagi barcha fuqarolar ishtirok etishi mumkin.

Dastur maqbullik shartlari haqida batafsil ushbu havola orqali tanishish mumkin.

Tanlovning hududiy (Qoraqalpogʻiston Respublikasi, viloyatlar hamda Toshkent shahar) bosqichi gʻoliblari quyidagicha taqdirlanadi:

• Uchta yosh toifasida 1-oʻrinni egallagan nomzodlarning har biri noutbuk, diplom hamda respublika bosqichiga yoʻllanma bilan;
• Uchta yosh toifasida 2-oʻrinni egallaganlar planshet hamda diplom bilan;
• Uchta yosh toifasida 3-oʻrinni egallagan ishtirokchilarning har biri telefon va diplom bilan taqdirlanadi.

Tanlovning respublika bosqichi gʻoliblari quyidagicha mukofotlanadi:

• Uchta yosh toifasida 1-oʻrinni egallagan ishtirokchilarning har biri “Prezident sovgʻasi” yengil avtomobil hamda diplom bilan;
• Uchta yosh toifasida 2-oʻrinni egallagan nomzodlarning har biri 50 million soʻm pul mukofoti hamda diplom bilan;
• Uchta yosh toifasida 3-oʻrinni egallagan nomzodlarning har biri 30 million soʻm pul mukofoti bilan taqdirlanadi.

Dastur imtiyozli jihatlari haqida batafsil ushbu havola orqali tanishish mumkin.

Tanlovga arizalar qabuli 1-sentyabrga qadar davom etadi. Roʻyxatdan oʻtish uchun: @yoshkitobxon_bot

“Yosh kitobxon” tanlovining 2022-yilgi mavsumiga 8-iyul holatiga koʻra 33 117 nafar yoshlar roʻyxatdan oʻtdi.

Tanlovda foydalaniladigan adabiyotlar roʻyxati bilan ushbu havola orqali tanishish mumkin.

2021-yilgi mavsum ishtirokchilarining chiqishlari haqida ushbu havola orqali maʼlumot olish mumkin.

Tanlovning telegram tarmogʻidagi rasmiy sahifasi bilan ushbu havola orqali tanishish mumkin.

Qoʻshimcha savol va murojaatlar uchun: @Kitobxonmurojaatbot